ແຫລ່ງຂ່າວຈາກ ແຂວງຈໍາປາສັກ ໃຫ້ຮູ້ວ່າ: ການກະກຽມສະເຫລີມສະຫລອງບຸນນະມັດສະການພະທາດສາມປາງ ຕິດພັນກັບການເປີດປີທ່ອງທ່ຽວລາວ 2024 ຂອງເມືອງສຸຂຸມາ ແຂວງຈໍາປາສັກ ແມ່ນມີຄວາມພ້ອມໃນແຕ່ລະດ້ານເປັນສ່ວນຫລາຍ ເພື່ອຮອງຮັບໃຫ້ກັບແຂກ ກໍຄື ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ຈະມາທ່ຽວພາຍໃນງານໃຫ້ມີຄວາມປະທັບໃຈ ເຊິ່ງງານດັ່ງກ່າວຈະຈັດຂຶ້ນຢ່າງເປັນທາງການໃນວັນທີ 23-25 ມັງກອນ 2024 ນີ້.
ທ່ານ ສົມເພັດ ບຸດສະດີ ເຈົ້າເມືອງສຸຂຸມາ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 18 ມັງກອນ 2024 ຜ່ານມາ ກ່ຽວກັບຄວາມພ້ອມແຕ່ລະດ້ານ ເຊິ່ງເຫັນວ່າມາຮອດປັດຈຸບັນການກະກຽມສ່ວນໃຫຍ່ແມ່ນມີຄວາມພ້ອມ ເພື່ອຮັບປະກັນເຮັດໃຫ້ງານດັ່ງກ່າວ ມີບັນຍາກາດຄຶກຄື້ນສົມກັບງານເປີດປີທ່ອງທ່ຽວລາວ, ພ້ອມນີ້ພາຍໃນງານຈະມີຫລາຍກິດຈະກຳ ເພື່ອສ້າງສີສັນໃຫ້ແກ່ງານຢ່າງມີຄວາມໝາຍ ຄື: ໃນວັນທີ 23 ມັງກອນ 2024 ເປັນມື້ຕັ້ງ ໄດ້ມີການກະກຽມເຄື່ອງໄຊຍະທານ, ຕັ້ງກອງບຸນ 3 ກອງ; ວັນທີ 24 ມັງກອນ 2024 ເລີ່ມແຕ່ເວລາ 15 ໂມງແມ່ນມີຂະບວນແຫ່ຂອງການນໍາແຂວງ, ການນໍາເມືອງ, ກ້ອນກໍາລັງເຖົ້າແກ່ແນວໂຮມ, ຄູ - ອາຈານ ແລະ ປະຊາຊົນ ແຫ່ອ້ອມທາດສາມປາງ 3 ຮອບ ແລະ ຈູດທູບທຽນສັກກາລະບູຊາພຣະທາດ, ຮັບຊົມການສະແດງສິລະປະຂອງນ້ອງນັກຮຽນ, ເປີດງານນະມັດສະການພຣະທາດສາມປາງ ຢ່າງເປັນທາງການ ແລະ ໃນຕອນຄໍ່າແມ່ນມີການປະກວດນາງທິດາພຣະທາດສາມປາງ.
ສ່ວນວັນທີ 25 ມັງກອນ 2024 ຕອນເຊົ້າ ຈະມີພິທີຕັກບາດຖວາຍສັງຄະທານແດ່ພະສົງ 50 ອົງ. ຈາກນັ້ນ, ກໍຈະມີການຊ່ວງເຮືອປະເພນີ 5 ສີພາຍ, ແຂ່ງຂັນກິລາປະເພດຕ່າງໆ ເປັນຕົ້ນ ບານສົ່ງ, ກະຕໍ້, ເປຕັງ, ທ່ຽວຊົມການວາງສະແດງສິນຄ້າທີ່ເປັນເອກະລັກຂອງເມືອງ (ໂອດັອບ) ເປັນຕົ້ນ: ເສັ້ນເຝີ, ສົ້ມປາ, ເຫລົ້າຂາວ, ຜະລິດຕະພັນກະສິກໍາ, ພືດຜັກຂອງກະສິກອນ ຈາກແຕ່ລະກຸ່ມບ້ານ. ຕອນແລງມີການຄົບງັນຕາມປະເພນີ, ຊົມໝໍລໍາເລື່ອງ ແລະ ຮ່ວມມ່ວນຊື່ນວົງດົນຕີ ດາວຮຸ່ງຈະເລີນໄຊ.
ໂອກາດນີ້, ທ່ານເຈົ້າເມືອງສຸຂຸມາ ໄດ້ເຊີນຊວນທຸກພາກສ່ວນ, ທຸກອົງການຈັດຕັ້ງໃນສັງຄົມ, ບຸກຄົນ, ນິຕິບຸກຄົນ, ພໍ່ແມ່ປະຊາຊົນ, ນັກທ່ອງທ່ຽວ ທັງຢູ່ໃກ້ ແລະ ຢູ່ໄກ, ທັງພາຍໃນ ແລະ ຕ່າງປະເທດ ຜູ້ມີເງື່ອນໄຂ ຈົ່ງສະຫລະເວລາ ມາຮ່ວມງານບຸນພຣະທາດສາມປາງ ນໍາຄະນະພັກ - ອົງການປົກຄອງເມືອງສຸຂຸມາ ດ້ວຍ.
ຂ່າວ-ພາບ: ຈັນທະວີສັກ
