ແຫລ່ງຂ່ສວຈາກ ແຂວງໄຊສົມບູນ ໃຫ້ຮູ້ວ່າ: ພິທີ-ມອບຮັບໂຄງການກໍ່ສ້າງໂຮງຮຽນມັດທະຍົມສົງ ແຂວງໄຊສົມບູນ ຈັດຂຶ້ນໃນວັນທີ 22 ກໍລະກົດ 2023 ທີ່ວັດພູເງິນ ເມືອງອະນຸວົງ ແຂວງໄຊສົມບູນ ໂດຍການເຂົ້າຮ່ວມ ຂອງທ່ານ ພັນຄຳ ວິພາວັນ ອະດີດນາຍົກລັດຖະມົນຕີ(ເຈົ້າຂອງໂຄງການ), ມີທ່ານ ພອຍຄຳ ຮຸ່ບຸນຍວງ ເຈົ້າແຂວງໄຊສົມບູນ, ມີຮອງເຈົ້າແຂວງ, ການນຳພັກ-ລັດ ແຂວງ, ຕາງໜ້າຈາກອົງການພຸດທະສາສະໜາສຳພັນລາວ, ຈາກກົມສາສະໜາ ສູນກາງແນວລາວສ້າງຊາດ, ກະຊວງສຶກສາທິການ ແລະ ກິລາ, ຄອບຄົວການນຳ ແລະ ບໍລິສັດຜູ້ຮັບເໝົາກໍ່ສ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານ ຄຳປຸ່ນ ພູນສີອານຸລັກ ປະທານບໍລິສັດ ພູນສີ ອານຸລັກ ສຳຫລວດ-ອອກແບບ ກໍ່ສາງ ຈຳກັດຜູ້ດຽວ ໃນນາມ ບໍລິສັດຮັບເໝົາກໍ່ສ້າງ ໄດ້ລາຍງານຫຍໍ້ກ່ຽວກັບການໂຄການກໍ່ສ້າງໂຮງຮຽນມັດທະຍົມສົງ ແຂວງໄຊສົມບູນ ຊຶ່ງໂຄງການດັ່ງກ່າວ ປະກອບມີອາຄານ 1 ຫລັງ 2 ຊັ້ນ, ມີ 8 ຫ້ອງຮຽນ ພ້ອມດ້ວຍເພີນີເຈີຄົບຊຸດ, ມີໄລຍະການກໍ່ສ້າງ 12 ເດືອນ ໂດຍເລີ່ມແຕ່ລົງມືກໍ່ສ້າງມາແຕ່ເດືອນຕຸລາ 2022 ຫາ ເດືອນກໍລະກົດ 2023 ຈຶ່ງສຳເລັດ 100% ລວມມູນຄ່າໃນການກໍສ້າງທັງໝົດເກືອບ 3 ຕື້ກີບໂດຍໄດ້ຮັບທຶນການຊ່ວຍເຫລືອທຶນຈາກຄອບຄົວ ທ່ານ ພັນຄຳ ວິພາວັນ ອະດີດນາຍົກລັດຖະມົນຕີ, ຄອບຄົວ ທ່ານ ຈັນທະໜອມ ພົມມະນີ, ຄອບຄົວທ່ານ ໂພໄຊ ໄຊຊະນະ ແລະ ທຶນປະກອບສ່ວນຈາກ ຊາວພຸດຜູ້ໃຈບຸນຈໍານວນໜຶ່ງ.
ຈາກນັ້ນ ທ່ານ ພັນຄຳ ວິພາວັນ ໄດ້ມີຄຳເຫັນວ່າ: ການສ້າງ ໂຮງຮຽນດັ່ງກ່າວ ເພື່ອເປັນການປະກອບສ່ວນສ້າງສູນລວມທາງດ້ານຈິດໃຈ ກໍຄື ການພັດທະນາເສດຖະກິດ-ສັງຄົມ ຂອງແຂວງໄຊສົມບູນ, ເຮັດໃຫ້ແຂວງມີບາດລ້ຽວໃໝ່ທີ່ຕັ້ງໜ້າ ແລະ ເປັນໃບໜ້າອັນໃໝ່ຂອງຂະແໜງການສຶກສາ, ສ້າງໂອກາດໃຫ້ແກ່ລູກຫລານຜູ້ທີ່ດ້ອຍໂອກາດໄດ້ຮໍ່າຮຽນ, ທັງບວດ ທັງຮຽນ ໄປຄຽງຄູ່ກັນ ຊຶ່ງໃນເມື່ອກ່ອນວັດເປັນໂຮງຮຽນສິດສອນໃຫ້ແກ່ນັກຮຽນ-ນັກສຶກສາ ແລະ ເປັນສູນລວມໃນການເຕົ້າໂຮມຄວາມສາມັກຄີ, ເປັນບ່ອນອະນຸລັກຮີດຄອງປະເພນີ ສິລະປະວັດທະນະທຳ ທີ່ເປັນເອກະລັກຂອງຊາດລາວ ຈົນສືບທອດມາຮອດປັດຈຸບັນ. ຈາກນັ້ນທ່ານ ກໍໄດ້ກ່າວມອບ ໂຮງຮຽນຫລັງນີ້ ໃຫ້ແກ່ການນຳແຂວງ ເປັນຜູ້ນຳໃຊ້ ແລະ ປົກປັກຮັກຕໍ່ໄປ.
ໃນໂອກາດດຽວກັນ, ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ກໍໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນຂອງອົງການພຸດທະສາສະໜາສຳພັນລາວ ຕໍ່ກັບວຽກງານການສຶກສາສົງ ຊຶ່ງແຂວງໄຊສົມບູນ ໄດ້ຮັບທຶນຊ່ວຍເຫລືອໂຄງການກໍ່ສ້າງໂຮງຮຽນສົງແຫ່ງນີ້ ແມ່ນເປັນການປະກອບສ່ວນອັນໃຫຍ່ຫລວງ ໃນການກໍ່ສ້າງພື້ນຖານໂຄງລ່າງດ້ານການສຶກສາ ເພື່ອເປັນສະຖານທີ່ ແລະ ສ້າງໂອກາດໃຫ້ແກ່ລູກຫລານຂອງປະຊາຊົນບັນດາເຜົ່າ ຜູ້ທີ່ດ້ອຍໂອກາດ ໄດ້ບວດ ມາອາໄສວັດຮຽນ ແລະ ມີໂອກາດໄດ້ສຶກສາຮໍ່າຮຽນເອົາຄວາມຮູ້ ນັບທັງສິລະທຳ ແລະ ວັດທະນະທຳ-ວິທະຍາສາດ. ຂ່າວ-ພາບ: ວຽງໃຈ ຄຳມະນີວົງ
