ເມື່ອບໍ່ດົນມານີ້, ອົງການປົກຄອງຂອງແຂວງສະຫວັນນະເຂດ, ກະຊວງການຕ່າງປະ ເທດ ແລະ ການຄ້າ ປະເທດອົດສະຕຣາລີ ແລະ ທະນາຄານພັດທະນາອາຊີ (ADB) ໄດ້ຮ່ວມເປີດ ແອັບພລິເຄເຊິນໃໝ່ເທິງມືຖື ‘Kaysone Self-Learning’ ຢູ່ເດີ່ນລາວຈະເລີນ, ແຂວງສະຫວັນນະເຂດ ເຊິ່ງແອັບດັ່ງກ່າວ, ນັກສຶກສາໃນ 3 ສະຖາບັນການສຶກສາຢູ່ນະຄອນ ໄກສອນ ພົມວິຫານ ແລະ ທົ່ວປະເທດລາວ ສາມາດສ້າງທັກສະດ້ານຄວາມຮູ້ທີ່ຈຳເປັນ ທາງໂທລະສັບສະມາດໂຟນ ເພື່ອໃຊ້ໃນການເລີ່ມວຽກຢູ່ບ່ອນເຮັດວຽກທໍາອິດຂອງເຂົາເຈົ້າ.
ທ່ານ ປະສົງສິນ ຈະເລີນສຸກ ເຈົ້າຄອງນະຄອນ ໄກສອນ ພົມວິຫານ ໄດ້ໃຫ້ຮູ້ວ່: ທັກສະດ້ານຄວາມຮູ້ເຊັ່ນ: ການເຈລະຈາ, ການພົວພັນລະຫວ່າງບຸກຄົນ ແລະ ການແກ້ໄຂບັນຫາ ແມ່ນບໍ່ມີສອນຢູ່ໃນໂຮງຮຽນມັດທະຍົມສຶກສາພາຍໃນແຂວງສະຫວັນນະເຂດ, ນັກສຶກສາຕ້ອງການທັກສະຄວາມຮູ້ເຫລົ່ານີ້ ເພື່ອຍົກລະດັບຄວາມສາມາດ ແລະ ຈັນຍາບັນ ເພື່ອໃຫ້ພວກເຂົາເຈົ້າກຽມພ້ອມກ່ອນທີ່ພວກເຂົາຈະກ້າວເຂົ້າໃນກໍາລັງແຮງງານ. ໂອກາດນີ້, ທ່ານໄດ້ສະແດງຄວາມຂໍຂອບໃຈມາຍັງ ລັດຖະບານອົດສະຕຣາລີ ແລະ ADB ທີ່ໄດ້ໃຫ້ການສະໜັບສະໜູນໃນການພັດທະນາແອັບດັ່ງກ່າວ.
ແອັບພິເຄເຊິນ ‘Kaysone Self-Leaning’ ແມ່ນໄດ້ຮັບການພັດທະນາພາຍໃຕ້ໂຄງການຊ່ວຍເຫລືອທາງດ້ານວິຊາການ: ການປັບປຸງທັກຄວາມຮູ້ສໍາລັບການຈ້າງງານຂອງໄວໜຸ່ມ ໃນນະຄອນໄກສອນ ພົມວິຫານ ໂດຍໄດ້ຮັບທຶນຈາກກອງທຶນ ASEAN Australia Smart City Trust Fund. ໂຄງການຊ່ວຍເຫລືອທາງດ້ານວິຊາການດັ່ງກ່າວ ແນໃສ່ປັບປຸງທັກສະດ້ານຄວາມຮູ້ກ່ຽວກັບ ການກະກຽມຄວາມພ້ອມຂອງນັກສຶກສາ ມະຫາວິທະຍາໄລສະຫວັນນະເຂດ, ວິທະຍາໄລເຕັກນິກ-ວິຊາຊີບສະຫວັນນະເຂດ ແລະ ສະຖາບັນເຕັກນິກວິຊາຊີບໄຊສົມບູນ ໃນແຂວງສະຫວັນນະເຂດກ່ຽວກັບການຈ້າງງານ. ໄວໜຸ່ມ, ຜູ້ທີ່ກຳລັງຊອກຫາວຽກເຮັດງານທຳ, ນັກສຶກສາທີ່ຮຽນຈົບຈາກໂຮງຮຽນ ອື່ນໆ ກໍຈະໄດ້ຮັບຜົນປະໂຫຍດຈາກການນຳໃຊ້ແອັບພລິເຄເຊິນດັ່ງກ່າວ. ບັນດາບໍລິສັດ ແລະ ໂຮງຈັກໂຮງງານ ລວມທັງບໍລິສັດ ແລະ ໂຮງຈັກໂຮງງານໃນເຂດເສດຖະກິດພິເສດ ສະຫວັນ-ເຊໂນ ໄດ້ໃຫ້ຄຳແນະນຳໃນການອອກແບບທັງເນື້ອໃນ ແລະ ແບບການຮຽນ-ການສອນເທິງແອັບພິເຄເຊິນດັ່ງກ່າວ.
ແອັບພິເຄເຊິນນີ້, ໄດ້ສະໜອງເນື້ອໃນ ແລະ ສິ່ງອໍານວຍຄວາມສະດວກຕໍ່ການຮຽນເຊັ່ນ: ການຮຽນນໍາວິດີໂອຜ່ານທາງອອນລາຍ, ວິດີໂອການສະແດງຈໍາລອງຄວາມຮູ້ທາງດ້ານວິທີການຕ່າງໆ ຊຶ່ງໄດ້ສາທິດ ລວມທັງວິທີການຂຽນຊີວະປະຫວັດຫຍໍ້ ແລະ ການກະກຽມຄວາມພ້ອມແນວໃດສຳລັບການສຳພາດວຽກ. ຜູ້ໃຊ້ແອັບຈະເຂົ້າເຖິງ ແລະ ຮຽນເອົາທັກສະຄວາມຮູ້ເຫລົ່ານັ້ນໄດ້ຢ່າງງ່າຍດາຍເທິງໂທລະສັບສະມາດໂຟນ ຂອງເຂົາເຈົ້າ.
ທ່ານ ນາງ ໂຊໂນມິ ທະນາກະ ຫົວໜ້າສຳນັກງານ ADB ປະຈຳ ສປປ ລາວ ໄດ້ໃຫ້ຮູ້ວ່າ: ເອກະລັກສະເພາະຂອງແອັບ Kasyone Self-Learning ແມ່ນຫລັກສູດການຮຽນ-ການສອນໄດ້ຮັບການພັດທະນາ ຈາກການເຂົ້າປະກອບສ່ວນຢ່າງກວ້າງຂວາງຂອງນັກຮຽນ, ຄູອາຈານ, ແລະ ຜູ້ຈ້າງງານຈາກຫລາຍພາກສ່ວນ. ແຕ່ບົດຮຽນຂອງນະຄອນ ໄກສອນ ພົມວິຫານ ແມ່ນໃຊ້ໄດ້ກັບນັກຮຽນໃນທົ່ວປະເທດ ໂດຍສະເພາະຜູ້ທີ່ຮູ້ສຶກກັງວົນໃຈ ໃນການທີ່ຈະກ້າວກະໂດດໄປເລີ່ມວຽກທຳອິດຂອງພວກເຂົາເຈົ້າ.
