ໂຮງໝໍມິດຕະພາບ ແລະ ບໍລິສັດ ເທບຈະເລີນ ປະກັນໄພ ຈຳກັດ ໄດ້ຈັດພິທີເຊັ່ນສັນຍາຮ່ວມມືວ່າດ້ວຍການບໍລິການທາງດ້ານການແພດ ແລະ ປິ່ນປົວສຸຂະພາບ ຂຶ້ນໃນວັນທີ 18 ກໍລະກົດ ນີ້ ທີ່ໂຮງໝໍດັ່ງກ່າວ, ຮ່ວມລົງນາມຄັ້ງນີ້ລະຫວ່າງ ທ່ານ ສອນໄຊ ລາດຊະວົງ ຜູ້ອຳນວຍການໂຮງໝໍມິດຕະພາບ ແລະ ທ່່ານ ນາງ ສຸກສອນ ສີລິປັນຍາ ຫົວໜ້າພະແນກບໍລິຫານ ບໍລິສັດ ເທບຈະເລີນ ປະກັນໄພ ຈຳກັດ ຊຶ່ງມີພະນັກງານທັງສອງຝ່າຍເຂົ້າຮ່ວມ.
ການຮ່ວມມືກັນຂອງສອງຝ່າຍ ຈຸດປະສົງແມ່ນເພື່ອເປັນການອຳນວຍຄວາມສະດວກໃຫ້ແກ່ການບໍລິການລູກຄ້າຂອງພະນັກງານ ບໍລິສັດປະກັນໄພ ດັ່ງກ່າວ ມາຮັບບໍລິການປິ່ນປົວ ໃນເວລາເຈັບເປັນຕ່າງໆ ຕາມເງື່ອນໄຂຂອງບໍລິສັດ ແລະ ວົງເງິນຂອງຄົນເຈັບແຕ່ລະຄົນ ແລະ ກໍຍັງເປັນການແລກປ່ຽນຮ່ວມມືກັບ ບໍລິສັດ ທີ່ມີຄວາມສົນໃຈເປັນເຄືອຂ່າຍກັບໂຮງໝໍມິດຕະພາບ ຊຶ່ງໂຮງໝໍມິດຕະພາບເປັນໂຮງໝໍສູນກາງປິ່ນປົວທົ່ວໄປ ມີຫຼາຍຂະແໜງການເຊັ່ນ: ລະບົບປະສາດ, ພາຍໃນທົ່ວໄປ, ຊຶມເຊື່ອມ, ປະສູດ-ພະຍາດຍິງ-ແມ່ ແລະ ເດັກ, ຜ່າຕັດທົ່ວໄປ, ຫູ-ດັງ-ຄໍ-ຕາ ແລະ ຄາງໜ້າ, ທັນຕະກຳ, ຟື້ນຟູຊີບ, ກວດເຂດນອກ, ສຸກເສີນ, ກາຍຍະບຳບັດ, ວິເຄາະ, ລັງສີ-ສູນເສຍແສງ ແລະ ກໍຍັງມີວຽກທີ່ເປັນບຸລິມະສິດໃນການລົງເລິກຊ່ຽວຊານໃນລະດັບສູງ ຂອງ ສປປ ລາວ ເປັນຕົ້ນແມ່ນຂະແໜງກະທົບ-ຜ່າຕັດກະດູກ ຜ່າຕັດສະໝອງ-ສັນຫຼັງ, ໄຂ່ຫຼັງທຽມ (ຟອກເລືອດ) ການແພດພື້ນເມືອງ ແລະ ສູນມະເຮັງອີກດ້ວຍ.
ຜ່ານມາໂຮງໝໍມິດຕະພາບໄດ້ມີການເຊັ່ນສັນຍາບໍລິການການແພດ ແລະ ປິ່ນປົວ ສຸຂະພາບ ກັບຫຼາຍບໍລິສັດ ເຊັ່ນ: ບໍລິສັດ ໂຊກໄຊ ປະກັນໄພ ບໍລິສັດ ພົງສະຫວັນ (ເອພີເອ) ບໍລິສັດ ວຽງຈັນປະກັນໄພ ມະຫາວິທະຍາໄລແຫ່ງຊາດ (ໂດຍສະເພາະນັກສຶກສາຕ່າງປະເທດ) ແລະ ກູ້ໄພມູນນິທິຈີນ 1628.
ຂ່າວ-ພາບ: ໂຮງໝໍມິດຕະພາບ
