ເຂດພັດທະນາເສດຖະກິດກວມລວມໄຊເສດຖາ ຊຶ່ງເປັນໜຶ່ງເຂດເປົ້າໝາຍສ້າງເປັນໃຈກາງຕົວເມືອງໃໝ່ ຂອງນະຄອນຫຼວງວຽງຈັນ ມີທີ່ຕັ້ງຫ່າງຈາກຕົວເມືອງນະຄອນຫຼວງວຽງຈັນ ໄປຕາມທິດຕາເວັນອອກສ່ຽງເໜືອ 14 ກິໂລແມັດ ຢູ່ໃກ້ກັບຖະໜົນ 450 ປີ, ຫ່າງຈາກສະຖານີຂົນສົ່ງສິນຄ້າລາວ-ຈີນ ປະມານ 1,5 ກິໂລແມັດ, ເຂດດັ່ງກ່າວ ໄດ້ສໍາເລັດການກໍ່ສ້າງໄລຍະທີໜຶ່ງ ຈໍານວນ 400 ເຮັກຕາ ໄດ້ກາຍເປັນເຂດພັດທະນາທີ່ມີພື້ນຖານໂຄງລ່າງສະດວກສະບາຍ, ປອດໄພ ແລະ ຄາດວ່າຈະສາມາດສ້າງວຽກເຮັດງານທໍາໄດ້ຫຼາຍກວ່າ 10.000 ຄົນ.
ທ່ານ ຫຼີຢີງຈົ່ງ ຮອງຜູ້ອຳນວຍການບໍລິສັດຮ່ວມທຶນລາວ-ຈີນ ຈຳກັດ ໄດ້ໃຫ້ສຳພາດເນື່ອງໃນໂອກາດທີ່ ສື່ມວນຊົນລາວ-ຈີນ ໄດ້ລົງໄປສຳພາດຕາມທາງລົດໄຟ ລາວ-ຈີນ ໃນຫົວຂໍ້: ໝູ່ເພື່ອນໜຶ່ງແລວໜຶ່ງເສັ້ນທາງ ໃນວັນທີ 17 ກໍລະກົດ ຜ່ານມາວ່າ: ເຂດພັດທະນາກວມລວມໄຊເສດຖາໄດ້ລົງທຶນ ແລະ ກໍ່ສ້າງໂດຍກຸ່ມບໍລິສັດລົງທຶນກໍ່ສ້າງແຂວງຢຸນນານ ແລະ ອົງການປົກຄອງນະຄອນຫຼວງວຽງຈັນ ໃນປີ 2010 ເປັນໂຄງການຮ່ວມມືທີ່ລັດຖະບານຈີນ ແລະ ລາວ ໄດ້ຮ່ວມກັນກໍານົດເຂົ້າໃນແຜນຍຸດທະສາດ “ໜຶ່ງແລວ ໜຶ່ງເສັ້ນທາງ” ຜ່ານຄວາມມຸ່ງໝັ້ນ ແລະ ພັດທະນາມາຫຼາຍປີ. ປັດຈຸບັນເຂດດັ່ງກ່າວໄດ້ສໍາເລັດການກໍ່ສ້າງໄລຍະທີໜຶ່ງຈໍານວນ 400 ເຮັກຕາ ໄດ້ກາຍເປັນເຂດພັດທະນາທີ່ມີພື້ນຖານໂຄງລ່າງສະດວກສະບາຍ ແລະ ປອດໄພ. ພ້ອມນັ້ນ, ມີຫົວໜ່ວຍວິສາຫະກິດທີ່ໄດ້ເຊັນສັນຍາລົງທຶນທັງ ໝົດ 128 ບໍລິສັດ. ໃນນີ້, ມີ 64 ບໍລິສັດ ໄດ້ເລີ່ມທໍາການຜະລິດແລ້ວ ໂດຍເປັນນັກລົງທຶນມາຈາກ ສປ ຈີນ, ໄທ, ຍີ່ປຸ່ນ ແລະ ປະເທດອື່ນໆລວມ 8 ປະເທດ ຊຶ່ງປະກອບມີ ສໍານັກງານໃຫຍ່ຂອງບໍລິສັດທາງລົດໄຟລາວ-ຈີນ, ກຸ່ມບໍລິສັດຄວາມຫວັງໃໝ່, ກຸ່ມບໍລິສັດໂຮຢາລາວ ຈໍາກັດ, ບໍລິສັດ ລາວພັນທະມິດຟາມກຣຸບ ຈໍາກັດ, ບໍລິສັດເປ້ເຕີເຄື່ອງນຸ່ງຫົ່ມລາວ ຈໍາກັດ ຊຶ່ງລວມມີແຮງງານເຖິງ 6.000 ຄົນ ພາຍຫຼັງບໍລິສັດດັ່ງກ່າວເຂົ້າມາທໍາການຜະລິດສາມາດສ້າງມູນຄ່າການຜະລິດໄດ້ເຖິງ 1,8 ຕື້ໂດລາ ແລະ ຄາດວ່າຈະສາມາດສ້າງວຽກເຮັດງານທໍາໄດ້ຫຼາຍກວ່າ 10.000 ຄົນ.
ສຳລັບການກໍ່ສ້າງໄລຍະທີ 2 ແມ່ນໄດ້ລິເລີ່ມກໍ່ສ້າງຕາມແຜນການສ້າງເມືອງສົ່ງເສີມອຸດສາ ຫະກຳ ແລະ ອຸດສາຫະກຳສົ່ງເສີມຕົວເມືອງ ກໍຄືການສ້າງຕົວເມືອງໃໝ່ຂອງນະຄອນຫຼວງວຽງຈັນຢູ່ພາຍໃນເຂດພັດທະນາດັ່ງກ່າວ ຊຶ່ງໃນເບື້ອງຕົ້ນແມ່ນໄດ້ນຳໃຊ້ເນື້ອທີ່ 10 ເຮັກຕາ ໄດ້ກໍ່ສ້າງເຊັ່ນ: ໂຮງແຮມ, ສູນການຄ້າ ແລະ ວຽກອື່ນໆອີກຈຳນວນໜຶ່ງ. ພ້ອມນັ້ນຍັງຈະພັດທະນາເນື້ອທີ່ເພີ່ມຕື່ມ ທັງຈະສູ້ຊົນສ້າງໃຫ້ສຳເລັດໃນປີ 2030-2035 ແຕ່ກໍຂຶ້ນກັບການດຶງດູດການລົງທຶນຖ້າມີນັກລົງທຶນໃຫ້ຄວາມສົນໃຈມາລົງທຶນຫຼາຍ ໂຄງການກໍ່ສ້າງເມືອງໃໝ່ກໍຈະສຳເລັດໄວກ່ອນກຳນົດ. ພ້ອມນັ້ນ, ພາຍ ຫຼັງທີ່ໄດ້ເປີດນຳໃຊ້ເສັ້ນທາງລົດໄຟລາວ-ຈີນໄດ້ສົ່ງຜົນໃຫ້ການດຶງດູດການລົງທຶນໃນເຂດພັດທະນາເສດຖະກິດ ໄຊເສດຖາແຫ່ງນີ້ ມີຄວາມຄຶກຄື້ນຂຶ້ນ ຊຶ່ງຕາມແຜນການທີ່ວາງໄວ້ໃນປີ 2023 ວາງແຜນດຶງດູດນັກລົງທຶນໃນຈຳນວນ 15 ບໍລິສັດ ແຕ່ຕົວຈິງພຽງເດືອນມັງກອນ ຫາ ເດືອນກໍລະກົດ 2023 ສາມາດດຶງດູດການລົງທຶນໄດ້ສຳເລັດແລ້ວ 21 ບໍລິສັດ ຊຶ່ງເກີນແຜນທີ່ກໍານົດໄວ້, ຍ້ອນນັກລົງທຶນໄດ້ໃຫ້ຄວາມສົນໃຈເຂົ້າມາລົງທຶນຢູ່ລາວ ແລະ ການຂົນສົ່ງສິນຄ້າແມ່ນມີຄວາມສະດວກຂຶ້ນ.
ທ່ານ ຫຼີຢີງຈົ່ງ ກ່າວຕື່ມວ່າ: ປັດຈຸບັນບັນດາບໍລິສັດໃນເຂດດັ່ງກ່າວນີ້ໄດ້ເປີດດຳເນີນການຜະລິດແມ່ນໄດ້ນຳໃຊ້ແຮງງານລາວກວມ 90% ແລະ ອີກ 10% ແມ່ນໄດ້ນຳໃຊ້ວິຊາການຕ່າງປະເທດເພື່ອມາຝຶກອົບຮົມໃຫ້ແຮງງານລາວ, ຖ້າແຮງງານລາວເກີດຄວາມຊຳນານແມ່ນຈະຫັນມານຳໃຊ້ແຮງງານລາວ 100%. ໃນນັ້ນ, ຍັງມີຫຼາຍບໍລິສັດທີ່ຍັງມີຄວາມຕ້ອງການແຮງງານຫຼາຍພັນຄົນເຂົ້າມາເຮັດວຽກໃນເຂດດັ່ງກ່າວ. ສະນັ້ນ, ຖ້າວ່າທ່ານໃດ ຫຼື ບຸກຄົນໃດຕ້ອງການເຮັດວຽກກໍສາມາດເຂົ້າມາພົວພັນໄດ້ຢູ່ໃນເຂດດັ່ງກ່າວ.
ໂດຍ: ວັນເພັງ
