ເມືອງຫົງສາ ແຂວງໄຊຍະບູລີ ໄດ້ຈັດພິທີປະກາດພະນັກງານການນໍາຂອງເມືອງອອກພັກການ-ຮັບອຸດໜູນບໍານານຂຶ້ນ ທີ່ສະໂມສອນເມືອງ ໃນວັນທີ 17 ກໍລະກົດ ນີ້, ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ດວງຕາ ໄຊວຸດ ຮອງເລຂາພັກແຂວງໄຊຍະບູລີ, ມີສະຫາຍ ຄຳຫຼ້າ ຜີວວັນນາ ກຳມະການພັກແຂວງ ເລຂາພັກເມືອງ ເຈົ້າເມືອງຫົງສາ, ມີຮອງເລຂາພັກເມືອງ ພ້ອມດ້ວຍຄະນະປະຈຳພັກເມືອງ, ກຳມະການພັກເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີ, ສະຫາຍ ໄພທອງ ຈັນດາ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການເຫັນດີ ແລະ ຕົກລົງໃຫ້ ສະຫາຍ ນາງ ດາວວິນ ລາດຊະກິດ ຮອງເລຂາພັກເມືອງຫົງສາ ອອກພັກການ-ຮັບອຸດໜູນບໍານານ ທີ່ອາຍຸຄົບຕາມເງື່ອນໄຂກະສຽນຮັບອຸດໜູນບຳນານທີ່ໄດ້ກຳນົດໄວ້ໃນກົດໝາຍ ວ່າດ້ວຍພະນັກງານ-ລັດຖະກອນ; ໃນໂອກາດນີ້, ສະຫາຍ ຄຳຫຼ້າ ຜີວວັນນາ ໄດ້ຕາງໜ້າໃຫ້ຄະນະພັກເມືອງ ໄດ້ຂຶ້ນມີຄຳເຫັນໂດຍໄດ້ຍົກໃຫ້ເຫັນຜົນງານອັນພົ້ນເດັ່ນຂອງສະຫາຍ ນາງ ດາວວິນ ລາດຊະກິດ ຕະຫຼອດໄລຍະການປະກອບສ່ວນວຽກງານຂອງພັກ ແລະ ລັດ ໃນໄລຍະຫຼາຍສິບປີຜ່ານມາ ທີ່ໄດ້ທຸ້ມເທເຫື່ອແຮງ, ສະຕິປັນຍາໃນການປະຕິບັດໜ້າທີ່ການເມືອງຈົນມີຜົນສຳ ເລັດ, ຂະນະດຽວກັນ ຍັງໄດ້ຮຽກຮ້ອງໃຫ້ພະນັກງານ-ສະມາຊິກພັກທີ່ໄດ້ເຂົ້າຮ່ວມພິທີ ຈົ່ງພ້ອມກັນເອົາໃຈ ໃສ່ຮໍ່າຮຽນເອົາບົດຮຽນ, ປະສົບການ ແລະ ແບບແຜນການນໍາພາ-ຊີ້ນໍາ ຕໍ່ໜ້າທີ່ວຽກງານຂອງສະຫາຍ ເພື່ອນໍາໃຊ້ເຂົ້າໃນການສືບຕໍ່ປະຕິບັດໜ້າທີ່ວຽກງານໃຫ້ມີຜົນສໍາເລັດສູງຂຶ້ນ. ພ້ອມກັນນັ້ນ, ສະຫາຍ ຄຳຫຼ້າ ຜີວວັນນາ ພ້ອມດ້ວຍຄະນະພັກເມືອງ ຍັງໄດ້ມອບຂອງທີ່ລະນຶກໃຫ້ສະຫາຍ ເພື່ອເປັນການສະແດງເຖິງຄວາມຮູ້ບຸນຄຸນ.
ໃນພິທີ ຍັງໄດ້ເປັນກຽດຮັບຟັງການໂອ້ລົມໃຫ້ທິດຊີ້ນຳຈາກ ສະຫາຍ ດວງຕາ ໄຊວຸດ ຮອງເລຂາພັກແຂວງໄຊຍະບູລີ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນສຳເລັດ ໃນການຈັດຕັ້ງປະຕິບັດວຽກງານຂອງຄະນະພັກ-ອົງການປົກຄອງເມືອງ ແລະ ຜົນສຳເລັດໃນການປະຕິບັດໜ້າທີ່ວຽກງານຂອງສະຫາຍ ນາງ ດາວວິນ ລາດຊະກິດ ໃນໄລຍະຜ່ານມາ. ພ້ອມນັ້ນ ຍັງໄດ້ໃຫ້ທິດຊີ້ນຳຫຼາຍດ້ານຕໍ່ກັບຄະນະພັກ – ອົງການປົກຄອງເມືອງຕື່ມອີກ ເພື່ອເປັນທິດທາງໃນການຈັດຕັ້ງປະຕິບັດວຽກງານໃນຕໍ່ໜ້າ.
(ຂ່າວ-ພາບ: ກິດຕິສັກ ບົວໄລ)
