ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ກະຊວງເສດຖະກິດ ແລະ ການເງິນຂອງກຳປູເຈຍ ໄດ້ເປີດເຜີຍບົດລາຍງານໂດຍລະບຸວ່າ: ສະຖິຕິໜີ້ສາທາລະນະຂອງປະເທດ ຢູ່ທີ່ 10.200 ລ້ານໂດລາ ເມື່ອທ້າຍໄຕມາດທຳອິດທີ່ຜ່ານມາ ເພີ່ມຂຶ້ນ 2,8% ຈາກ 9.990 ລ້ານໂດລາ ເມື່ອທຽບແບບລາຍໄຕມາດ.
ກະຊວງເສດຖະກິດ ແລະ ການເງິນຂອງກຳປູເຈຍລະບຸວ່າ: ໜີ້ສາທາລະນະ 67% ມາຈາກຫຸ້ນສ່ວນເພື່ອການພັດທະນາທະວິພາຄີ ແລະ 33% ມາຈາກຫຸ້ນສ່ວນເພື່ອການພັດທະນາພະຫຸພາຄີ. ທັງນີ້, ໜີ້ສາທາລະນະຢູ່ໃນຫຼາຍສະກຸນເງິນຕາຕ່າງປະເທດ ໂດຍແບ່ງເປັນສະກຸນເງິນໂດລາ 43%, ສະກຸນເງິນສິດທິເງິນຖອນພິເສດ (SDR) 21%, ສະກຸນເງິນຢວນ 12%, ສະກຸນເງິນເຢນ 11%, ສະກຸນເງິນເອີໂຣ 7%, ສະກຸນເງິນທ້ອງຖິ່ນ ແລະ ອື່ນໆລວມກັນ 6%. ໃນໄລຍະໄຕມາດທຳອິດຂອງປີນີ້ ລັດຖະບານກຳປູເຈຍໄດ້ລົງນາມໃນສັນຍາເງິນກູ້ໃນເງື່ອນໄຂແບບຜ່ອນຈ່າຍສະບັບໃໝ່ກັບຫຸ້ນສ່ວນເພື່ອການພັດທະນາມູນຄ່າ 488,3 ລ້ານໂດລາ ຊຶ່ງຄິດເປັນ 21,24% ຂອງເພດານທີ່ກົດໝາຍອະນຸຍາດ ແລະ ເງິນກູ້ທັງໝົດໂດຍລວມເປັນແບບຜ່ອນຈ່າຍ ໂດຍເປັນເງິນອຸດໜູນສະເລ່ຍ 38%.
ອີກຢ່າງໜຶ່ງ, ເງິນກູ້ທັງໝົດຖືກນຳໄປໃຊ້ເປັນເງິນທຶນສຳລັບໂຄງການການລົງທຶນສາທາລະນະໃນພາກສ່ວນສຳຄັນ ສະໜັບສະໜູນການເຕີບໂຕທາງດ້ານເສດຖະກິດຢ່າງຍືນຍົງໃນໄລຍະຍາວ ແລະ ເພີ່ມຄຸນນະພາບທາງດ້ານເສດຖະກິດ. ເຖິງຢ່າງໃດກໍຕາມ, ເນື້ອໃນຂອງບົດລາຍງານສະບັບນີ້ຢືນຢັນວ່າ ສະຖານະການໜີ້ສາທາລະນະຂອງກຳປູເຈຍຈະຍັງຄົງມີຄວາມຍືນຍົງ ແລະ ກໍ່ໃຫ້ເກີດຄວາມສ່ຽງຕໍ່ການພົບກັບບັນຫາໜີ້ສິນ
