ກອງປະຊຸມເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ 17 ແລະ ກອງປະຊຸມທີ່ກ່ຽວຂ້ອງ (ASEAN Senior Officials’ Meeting on Health Development (SOMHD) and Related Meetings) ໄດ້ຈັດຂຶ້ນຢ່າງເປັນທາງການໃນວັນທີ 19 ມິຖຸນາ ນີ້, ໃນຮູບແບບປົກກະຕິ ແລະ ທາງໄກ ທີ່ໂຮງແຮມຄຣາວພາຊາ ນະຄອນຫຼວງວຽງຈັນ ສປປ ລາວ ໃຫ້ກຽດກ່າວເປີດຂອງ ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ມີເຈົ້າໜ້າທີ່ອາວຸໂສດ້ານສາທາລະນະສຸກຈາກ 10 ປະເທດສະມາຊິກອາຊຽນ, ປະເທດຕີມໍເລດສະເຕ, ກອງເລຂາອາຊຽນເຂົ້າຮ່ວມ. ກອງປະຊຸມໄດ້ດໍາເນີນໄປເປັນເວລາ 5 ວັນ ນັບແຕ່ 19-23 ມິຖຸນາ 2023.
ກອງປະຊຸມຄັ້ງນີ້, ບັນດາຜູ້ແທນທີ່ເຂົ້າຮ່ວມຈະໄດ້ປຶກສາຫາລືໃນຫຼາຍບັນຫາດ້ານສາທາລະນະສຸກ ແລະ ບັນດາເອກະສານທີ່ສຳຄັນທາງດ້ານການພັດທະນາສາທາລະນະສຸກອາຊຽນ ໂດຍສະເພາະຄວາມຄືບໜ້າໃນການ ຈັດຕັ້ງປະຕິບັດແຜນພັດທະນາສາທາລະນະສຸກອາຊຽນສົກປີ 2021-2025 ລວມທັງບັນດາແຜນຈັດຕັ້ງປະຕິບັດທີ່ຮ່ວມມືກັບບັນດາປະເທດຄູ່ເຈລະນາ ແລະ ຄູ່ຮ່ວມພັດທະນາ. ທົບທວນບັນດາກິດຈະກໍາ, ໂຄງການທີ່ໄດ້ຈັດຕັ້ງປະຕິບັດໃນໄລຍະຜ່ານມາຈົນຮອດປັດຈຸບັນ ແລະ ວາງທິດທາງແຜນການຕໍ່ໜ້າຮ່ວມກັນ.
ໂດຍສະເພາະການຕິດຕາມ ແລະ ລາຍງານຄວາມຄືບໜ້າບັນດາວຽກງານທີ່ໄດ້ຕົກລົງໃນກອງປະຊຸມຄັ້ງທີ່ຜ່ານມາຂອງເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ 16 (16th ASEAN SOMHD) ແລະ ກອງປະຊຸມລັດຖະມົນຕີສາທາລະນະສຸກອາຊຽນຄັ້ງທີ 15 (15th ASEAN Health Ministers Meeting and Related Meeting). ກອງປະຊຸມຄັ້ງນີ້ໄດ້ເນັ້ນໜັກປຶກສາຫາລືໃນຫຼາຍບັນຫາ ເປັນຕົ້ນຄວາມຄືບໜ້າໃນການຈັດຕັ້ງປະຕິບັດວຽກງານແຜນພັດທະນາສາທາລະນະສຸກອາຊຽນຂອງບັນກຸ່ມສຸຂະພາບອາຊຽນໃນໄລຍະ 2021-2025 (ASEAN Health Clusters), ການຈັດຕັ້ງປະຕິບັດບັນດາຖະແຫຼງການຜູ້ນໍາອາຊຽນທີ່ຕິດພັນກັບວຽກງານສາທາລະນະສຸກ (Health-related declarations and commitments), ປຶກສາຫາລືກ່ຽວກັບຄວາມຄືບໜ້າການພິຈາລະນາສັນຍາການສ້າງຕັ້ງສູນອາຊຽນວ່າດ້ວຍພາວະສຸກເສີນດ້ານສາທາລະນະສຸກ ແລະ ພະຍາດທີ່ເກີດຂຶ້ນໃໝ່ (ASEAN Centre for Public Health Emergency and Emerging Diseases) ແລະ ຂອບຂອງລະບົບກົນໄກການປະສານງານອາຊຽນກ່ຽວກັບພາວະສຸກເສີນດ້ານສາທາລະນະສຸກ (ASEAN Public Health Emergency Coordination System Framework) ແລະ ບັນຫາອື່ນໆທີ່ສຳຄັນ ທີ່ຈະໄດ້ປຶກສາຫາລືຮ່ວມກັນຂອງເຈົ້າໜ້າທີ່ອາວຸໂສດ້ານການພັດທະນາສາທາລະນະສຸກ ລະຫວ່າງບັນດາປະເທດສະມາຊິກອາຊຽນ, ປະເທດຄູ່ເຈລະຈາ ແລະ ບັນດາປະເທດຄູ່ຮ່ວມພັດທະນາຕ່າງໆ ທັງເປັນການກະກຽມເນື້ອໃນດ້ານຕ່າງໆໃຫ້ແກ່ກອງປະຊຸມລັດຖະມົນຕີສາທາລະນະສຸກອາຊຽນທີ່ ສປປ ລາວ ຈະໄດ້ຮັບກຽດເປັນເຈົ້າພາບ ແລະ ເປັນປະທານອາຊຽນໃນປີ 2024.
ຂ່າວ-ພາບ: ຍຸພິນທອງ+ວັນເພັງ
