ຂ່າວສານຊີອາໄອລາຍງານ ເມື່ອທ້າຍອາທິດຜ່ານມາ, ອົງການພາສີແຫ່ງຊາດຈີນແຈ້ງໃຫ້ຮູ້ວ່າ: ໃນປີ 2022 ຜ່ານມາ, ຍອດມູນຄ່າຂາເຂົ້າ-ຂາອອກດ້ານການຄ້າເອເລັກໂຕຣນິກຂ້າມຊາດຂອງຈີນບັນລຸຫຼາຍກວ່າ 2.000 ຕື້ຢວນ ເປັນຄັ້ງທຳອິດຄື: ບັນລຸເຖິງ 2.100 ຕື້ຢວນ ເພີ່ມຂຶ້ນ 7,1% ເມື່ອທຽບໃສ່ປີ 2021, ການຄ້າເອເລັກໂຕຣນິກຂ້າມຊາດໄດ້ເພີ່ມແຮງຂັບເຄື່ອນໃໝ່ເຂົ້າໃນການພັດທະນາການຄ້າຕ່າງປະເທດຂອງຈີນ.
ໃນຊຸມປີຜ່ານມານີ້, ການຄ້າເອເລັກໂຕຣນິກຂ້າມຊາດຂອງຈີນໄດ້ພັດທະນາຢ່າງວ່ອງໄວ ຊຶ່ງໄດ້ເສີມຂະຫຍາຍທ່າແຮງ ແລະ ກຳລັງບົ່ມຊ້ອນຢ່າງຕໍ່ເນື່ອງ, ຜູ້ບໍລິໂພກໃນທົ່ວໂລກນັບມື້ນັບຫຼາຍໄດ້ເຂົ້າເຖິງທາງເລືອກ ແລະ ຄວາມສະດວກຫຼາຍຂຶ້ນຈາກການຄ້າເອເລັກໂຕຣນິກຂ້າມຊາດ. ປີ 2022 ຜ່ານມາ, ມູນຄ່າຂາເຂົ້າ-ຂາອອກດ້ານການຄ້າເອເລັກໂຕຣນິກຂ້າມຊາດໄດ້ກວມ 4,9% ຂອງຍອດມູນຄ່າຂາເຂົ້າ-ຂາອອກດ້ານການຄ້າສິນຄ້າທົ່ວປະເທດຈີນ.
