ສຳນັກຂ່າວເອເອຟພີ, ທາງລົດໄຟຈີນ-ລາວ ສະເຫລີມ ສະຫລອງ ຄົບຮອບ 2ປີ ຂອງການໃຫ້ບໍລິການ ຂ້າມຊາຍແດນ ໂດຍຂົນສົ່ງ ຜູ້ໂດຍສານ ເກືອບ 500.000 ເທື່ອຄົນ ຈາກ 112 ປະເທດ ນັບແຕ່ ເລີ່ມໃຫ້ບໍລິການ ຢ່າງເປັນທາງການ ໃນວັນທີ13 ເມສາປີ2023 ເປັນຕົ້ນມາ ຊຶ່ງເປັນການປັບປຸງ ການເດີນທາງ ລະຫວ່າງ ສປປ ລາວ ແລະ ສປ ຈີນ ໃນຮູບແບບ ການຂົນສົ່ງ ຢ່າງວ່ອງໄວ ແລະ ສະດວກ ສະບາຍຍິ່ງຂຶ້ນ ໂດຍສະເພາະ ສຳລັບນັກທ່ອງທ່ຽວ.
ໃນນັ້ນ, ບໍລິສັດທາງລົດໄຟລາວ-ຈີນ ຈຳກັດ (LCRC) ໃຫ້ຮູ້ວ່າ:ທາງລົດໄຟຈີນ-ລາວ ໄດ້ຮັບການນຳໃຊ້ ຢ່າງກວ້າງຂວາງ, ໃນນັ້ນ ມີກຸ່ມຜູ້ໂດຍສານ 37.500 ກຸ່ມ ທີ່ເດີນທາງ ລະຫວ່າງ ສອງປະເທດ ຊຶ່ງນັບແຕ່ ຕົ້ນປີນີ້ ໄດ້ຂົນສົ່ງ ສິນຄ້າເຖິງ 4 ລ້ານໂຕນ ແລະ ຮອງຮັບ ການເດີນທາງ 4,1ລ້ານຖ້ຽວ. ລົດໄຟສາຍນີ້ ຍັງເຊື່ອມຕໍ່ ສະຖານທີ່ ທ່ອງທຽວ ທີ່ສຳຄັນ ຫລາຍແຫລ່ງເຊັ່ນ: ນະຄອນຫລວງວຽງຈັນ, ແຂວງຫລວງພະບາງ, ເຂດປົກຄອງຕົນເອງ ສິບສອງປັນນາ ແລະ ເມືອງຄຸນໜິງ ຊຶ່ງຊ່ວຍເພີ່ມ ການເຂົ້າເຖິງ ແລະ ສະໜັບ ສະໜູນ ການເຕີບໂຕ ຂອງການທ່ອງທ່ຽວ,ການຕ້ອນຮັບ ແລະ ພາກສ່ວນທີ່ກ່ຽວຂ້ອງ ຕະຫລອດເສັ້ນທາງ. ຍິ່ງໄປກວ່ານັ້ນ,ທາງລົດໄຟສາຍດັ່ງກ່າວ ຍັງມີບົດບາດ ສຳຄັນ ໃນການເພີ່ມທະວີ ການພົວພັນ ດ້ານວັດທະນະທຳ,ຊຸກຍູ້ການຮ່ວມມື ດ້ານເສດຖະກິດ ການຄ້າ ລະຫວ່າງ ສປປ ລາວ-ສປ ຈີນ ອີກດ້ວຍ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
