ວັນທີ 20 ທັນວາ 2024 ຜ່ານມາ, ທີ່ນະຄອນຫລວງເນປີດໍ, ທ່ານ ບຸນພຽງ ຈັນທະວົງ ໄດ້ຍື່ນສານຕາຕັ້ງຕໍ່ ທ່ານ ພົນເອກ ອາວຸໂສ ມິນ ອອງ ລາຍ ປະທານສະພາບໍລິຫານແຫ່ງລັດ, ນາຍົກລັດຖະມົນຕີ ແຫ່ງ ສາທາລະນະລັດ ສະຫະພາບ ມຽນມາ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ຄົນໃໝ່ ປະຈໍາ ສສ ມຽນມາ.
ໂອກາດນີ້, ທ່ານ ບຸນພຽງ ຈັນທະວົງ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍພອນໄຊອັນປະເສີດຂອງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເຖິງ ທ່ານ ພົນເອກ ອາວຸໂສ ມິນ ອອງ ລາຍ ປະທານສະພາບໍລິຫານແຫ່ງລັດ, ນາຍົກລັດຖະມົນຕີ ແຫ່ງ ສາທາລະນະລັດ ສະຫະພາບ ມຽນມາ ພ້ອມດ້ວຍປະຊາຊົນມຽນມາທຸກຖ້ວນໜ້າ. ໃນຂະນະດຽວກັນ, ທ່ານ ປະທານສະພາບໍລິຫານແຫ່ງລັດ, ນາຍົກລັດຖະມົນຕີ ແຫ່ງ ສສ ມຽນມາ ກໍໄດ້ສະແດງຄວາມຊົມເຊີຍຕໍ່ ທ່ານ ບຸນພຽງ ຈັນທະວົງ ທີ່ໄດ້ຖືກແຕ່ງຕັ້ງໃຫ້ເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ຄົນໃໝ່ ປະຈໍາ ສສ ມຽນມາ ເພື່ອປະຕິບັດໜ້າທີ່ວຽກງານໃນນາມຕາງໜ້າປະເທດຊາດອັນມີກຽດ ແລະ ສູງສົ່ງ, ພ້ອມທັງໄດ້ອວຍພອນໄຊໃຫ້ ທ່ານເອກອັກຄະລັດຖະທູດລາວຄົນໃໝ່ ຈົ່ງປະສົມຜົນສໍາເລັດໃນການເຄື່ອນໄຫວວຽກງານການທູດຂອງຕົນ. ພ້ອມກັນນີ້, ທ່ານຍັງໄດ້ສະແດງຄວາມຢື້ຢາມຖາມຂ່າວໄປຍັງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ປະຊາຊົນລາວ ແລະ ປະຊາຊົນລາວບັນດາເຜົ່າທຸກຖ້ວນໜ້າ.
ໃນເວລາໂອ້ລົມກັນ, ສອງຝ່າຍໄດ້ຕີລາຄາສູງ ພາຍຫລັງໄດ້ສ້າງຕັ້ງການພົວພັນທາງການທູດນໍາກັນໃນປີ 1955 ເປັນຕົ້ນມາ, ການພົວພັນ ແລະ ຮ່ວມມື ລະຫວ່າງສອງປະເທດ ລາວ ແລະ ມຽນມາ ໄດ້ຮັບການເພີ່ມທະວີຮັດແໜ້ນຍິ່ງຂຶ້ນ ແລະ ກ້າວສູ່ລະດັບສູງໂດຍມີການແລກປ່ຽນການຢ້ຽມຢາມກັນເປັນປົກກະຕິຂອງຄະນະຜູ້ແທນຂັ້ນສູງສອງປະເທດ ຊຶ່ງການຢ້ຽມດັ່ງກ່າວ ໄດ້ຊຸກຍູ້ການພົວພັນ ແລະ ການຮ່ວມມືລະຫວ່າງສອງປະເທດໃຫ້ມີປະສິດທິຜົນຍິ່ງໆຂຶ້ນ, ເພີ່ມທະວີຄວາມໄວ້ເນື້ອເຊື່ອໃຈ ແລະ ຄວາມເຂົ້າອົກເຂົ້າໃຈ ລະຫວ່າງ ການນຳ ແລະ ປະຊາຊົນສອງປະເທດ ແລະ ນຳມາເຊິ່ງຜົນປະໂຫຍດຂອງສອງຊາດ ແລະ ປະຊາຊົນສອງຊາດຕະຫລອດມາ. ນອກຈາກນີ້, ສອງຝ່າຍຍັງໄດ້ແລກປ່ຽນທັດສະນະຮ່ວມກັນ ກ່ຽວກັບ ທິດທາງການຮ່ວມມືສອງຝ່າຍໃນຂົງເຂດຕ່າງໆໃນຕໍ່ໜ້າ.
