ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ແຂວງເຊກອງ ຈັດພິທີສະຫລຸບ ແລະ ຍ້ອງຍໍ ຄະນະນໍາ, ຄູຝຶກ ແລະ ນັກກິລາ ທີ່ສໍາເລັດການເຂົ້າຮ່ວມແຂ່ງຂັນກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນເປັນເຈົ້າພາບ ໃນວັນທີ 26 ທັນວາ 2024 ໂດຍການເຂົ້າຮ່ວມຂອງທ່ານ ເຫລັກໄຫລ ສີວິໄລ ເຈົ້າແຂວງເຊກອງ, ພະແນກການກ່ຽວຂ້ອງ, ຄູຝຶກ ແລະ ນັກກິລາເຂົ້າຮ່ວມ.
ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະກິລາ ແຂວງ ໄດ້ລາຍງານວ່າ: ແຂວງເຊກອງ ໄດ້ສົ່ງຄະນະນໍາ, ຄູຝຶກ ແລະ ນັກກິລາ ເຂົ້າຮ່ວມແຂ່ງຂັນກິລາ ໃນມະຫາກໍາກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນເປັນເຈົ້າພາບ ໃນລະຫວ່າງ ວັນທີ 13-22 ທັນວາ ຜ່ານມາ ທັງໝົດ 145 ຄົນ, ຍິງ 25 ຄົນ, ແຂ່ງຂັນໃນ 9 ປະເພດກິລາ ໃນນີ້, ສາມາດຍາດໄດ້ 1 ຫລຽນຄໍາ, 6 ຫລຽນເງິນ ແລະ 1 ຫລຽນທອງ ລວມ 8 ຫລຽນ ຈັດຢູ່ໃນອັນດັບທີ 16 ຂອງປະເທດ.
ທ່ານ ນາງ ຂັນທະລີ ວັນລະເບືອມ ຮອງຫົວໜ້າພະແນກພາຍໃນແຂວງ ໄດ້ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການຍ້ອງຍໍ-ຊົມເຊີຍ ຄະນະຮັບຜິດຊອບ, ຄະນະສະຫະພັນ, ຄູຝຶກ ແລະ ນັກກິລາປະເພດຕ່າງໆ. ພ້ອມນີ້, ຄະນະນໍາຂັ້ນແຂວງຍັງໄດ້ມອບລາງວັນເງິນສົດໃຫ້ກັບຄູຝຶກ ແລະ ນັກກິລາ ທີ່ຍາດໄດ້ຫລຽນປະເພດຕ່າງໆ ຕາງໜ້າມອບໂດຍທ່ານ ເຫລັກໄຫລ ສີວິໄລ ແລະ ທ່ານ ຄໍາໄພ ສິມມາວັດ.
ໂອກາດນີ້, ທ່ານ ເຫລັກໄຫລ ສີວິໄລ ໄດ້ຍ້ອງຍໍຊົມເຊີຍຜົນງານທີ່ທຸກພາກສ່ວນຍາດມາໄດ້ ພ້ອມທັງຮຽກຮ້ອງໃຫ້ຄະນະນໍາພະແນກສຶກສາທິການ ແລະກິລາ, ຄະນະຮັບຜິດຊອບທຸກຂັ້ນ, ຄູຝຶກ ພ້ອມກັນຄົ້ນຄວ້າວາງແຜນ, ກະກຽມຄວາມພ້ອມຮອບດ້ານ ໂດຍຄັດເລືອກນັກກິລາແຕ່ຫົວທີ, ພັດທະນາພື້ນຖານໂຄງລ່າງດ້ານກິລາ ເພື່ອກະກຽມເປັນເຈົ້າພາບມະຫາກໍາກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VIII ໃນປີ 2027, ຕິດພັນກັບການສ້າງຂະບວນການຂໍ່ານັບຮັບຕ້ອນວັນສໍາຄັນຕ່າງໆຂອງພັກຂອງຊາດ, ເອົາໃຈໃສ່ເສີມຂະຫຍາຍດ້ານດີ ແລະ ແກ້ໄຂຂໍ້ບົກຜ່ອງ ທີ່ບໍ່ທັນໂລ່ງລ່ຽນ ໃຫ້ດີຂຶ້ນກວ່າເກົ່າ.
ຂ່າວ:ພຸດທະສອນ
