ສໍາເລັດແລ້ວ ການແຂ່ງຂັນກິລາໝາກເສິກ ໃນມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 7 ທີ່ແຂວງສາລະວັນ ເປັນເຈົ້າພາບ, ພາຍຫລັງໄດ້ເປີດການແຂ່ງຂັນມາແຕ່ວັນທີ 16-19 ທັນວາ ເຊິ່ງມີນັກກິລາເຂົ້າຮ່ວມແຂ່ງຂັນທັງໝົດ 80 ກວ່ານ້ອງ ຈາກ 8 ແຂວງ 1 ນະຄອນ ຫລວງ, ຄືແຂວງຫລວງພະບາງ, ອຸດົມໄຊ, ບໍລິຄໍາໄຊ, ຄໍາມ່ວນ, ໄຊສົມບູນ, ຈໍາປາສັກ, ອັດຕະປື, ນະຄອນຫລວງວຽງຈັນ ແລະ ແຂວງສາລະວັນ. ຜ່ານມາແມ່ນໄດ້ມີການແຂ່ງຂັນໃນແຕ່ລະລາຍການ ພ້ອມທັງໄດ້ມີການມອບຫລຽນໃຫ້ນັກກິລາໄປພ້ອມ. ຂະນະທີ່ ສໍາລັບໃນວັນທີ 19 ທັນວານີ້ ກໍ່ໄດ້ມີການມອບຫລຽນໃຫ້ກັບນັກກິລາຕື່ມອີກ, ໃນ 3 ລາຍການແຂ່ງຂັນຄື: ປະເພດດ່ຽວຍິງ ບຣິດ 3 ນາທີ.ໃນນັ້ນ, ຫລຽນຄໍາ ໄດ້ແກ່ນາງ ອາລູນາ ວົງເດືອນ ຈາກນະຄອນຫລວງວຽງຈັນ, ຫລຽນເງິນໄດ້ແກ່ນາງ ແກ້ວພິມພອນ ວົງສໍາພັນ ຈາກແຂວງບໍລິຄໍາໄຊ, ຫລຽນທອງ ໄດ້ແກ່ນາງ ດອກບານ ຊາເຍີ ຈາກແຂວງໄຊສົມບູນ, ປະເພດດ່ຽວຊາຍ ບຣິດ 3 ນາທີ ຫລຽນຄໍາ ໄດ້ແກ່ ທ້າວ ວິທູນ ສິງດວງຈັນ ຈາກແຂວງຈໍາປາສັກ, ຫລຽນເງິນໄດ້ແກ່ທ້າວ ວິລະກອນ ສໍໄຊຍະວົງ ຈາກແຂວງບໍລິຄໍາໄຊ, ຫລຽນທອງ ໄດ້ແກ່ທ້າວ ທຸງໄຊ ນິນທະລາດ ຈາກແຂວງຄໍາມ່ວນ, ປະເພດທີມຊາຍ ບຣິດ 10 ນາທີ, ໄດ້ຮັບຫລຽນຄໍາ ໄດ້ແກ່ທີມນະຄອນຫລວງວຽງຈັນ, ຫລຽນເງິນໄດ້ແກ່ທີມຈາກຫລວງພະບາງ, ຫລຽນທອງໄດ້ແກ່ທີມຈາກແຂວງຈໍາປາສັກ.
ໃຫ້ກຽດມອບຫລຽນໂດຍ ທ່ານ ນາງ ລີປາເອຍ ລີບົວປ່າວ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ, ພ້ອມດ້ວຍຄະນະສະຫະພັນ, ຄູຝຶກ, ຄະນະກໍາມະການ ແລະ ນັກກິລາເຂົ້າຮ່ວມ.
ພາບ+ບົດໂດຍ: ຢ່າຕົ່ງ
