ສຳນັກຂ່າວ ເອເອຟພີ, ໂດຍຄະນະຜູ້ຊຽວຊານ ດ້ານຄວາມຫລາກຫລາຍ ທາງຊີວະພາບ ຂອງສະຫະປະຊາຊາດ (ສປຊ) ກ່າວເຕືອນວ່າ: ສັງຄົມມະນຸດ ຈຳເປັນຕ້ອງ ປະຕິຮູບຄັ້ງໃຫຍ່ ເພື່ອຢຸດຕິ ການທຳລາຍລ້າງໂລກ. ການບໍລິໂພກ ຫລາຍເກີນໄປ ໃນປະເທດທີ່ລໍ້າລວຍ ການລວມກັນ ຂອງຄວາມຮັ່ງມີ ແລະອຳນາດ ແລະ ສັງຄົມທີ່ຕັດຂາດຈາກ ທຳມະຊາດ ຫລາຍຂຶ້ນເລື້ອຍໆ ເປັນແຮງຊຸກຍູ້ ໃນການທຳລາຍລ້າງລະບົບນິເວດ.
ການປະເມີນ ໄດ້ນຳສະເໜີ ແນວຄິດການຕອບສະໜອງ ຕໍ່ການສູນເສຍ ຄວາມຫລາກຫລາຍ ທາງຊີວະພາບ, ການເສື່ອມຖອຍ ຂອງທຳມະຊາດ ແລະ ການລົ້ມລະລາຍ ຂອງໜ້າທີ່ສຳຄັນ ຂອງລະບົບນິເວດ ຊຶ່ງຄາດວ່າຈະເກີດຂຶ້ນ.
ອົງການຈັດຕັ້ງ ລະຫວ່າງລັດຖະບານ ວ່າດ້ວຍນະໂຍບາຍ ວິທະຍາສາດ ດ້ານຄວາມຫລາກຫລາຍ ທາງຊີວະພາບ ແລະ ບໍລິການຈາກ ລະບົບນິເວດ (ໄອພີບີເອສ) ຍົກຕົວຢ່າງ ເຫດການໃນປີ 2002 ກໍາປັ່ນບັນທຸກ ນໍ້າມັນ ເພຣສທິ ຫັກເປັນສອງສ່ວນ ໃນແອັດສະປາຍ ເຮັດໃຫ້ນໍ້າມັນຮົ່ວໄຫລ ຈົນແຄມຝັ່ງ ມະຫາສະໝຸດ ອັດລັງຕິກເປັນສີດຳ.
ຂະນະນັ້ນ ຊຸມຊົນຊາວປະມົງ ໃນກາລິເຊຍ ເລີ່ມວິທີ ຄຸ້ມຄອງ ເຂດອະນຸລັກ ທາງທະເລແບບໃໝ່ ໂດຍມີຊາວປະມົງວິທະຍາສາດ ແລະ ໜ່ວຍງານທ້ອງຖິ່ນ ເຮັດວຽກຮ່ວມກັນ ຫລັງຈາກນັ້ນກວ່າ 17 ປີ ພື້ນທີ່ດັ່ງກ່າວ ມີການເຮັດປະມົງທີ່ດີຂຶ້ນ ແລະ ມີລາຍໄດ້ສູງຂຶ້ນ ລວມເຖິງມີການ ໄວ້ວາງໃຈ ແລະ ຄວາມຮ່ວມມືທີ່ດີຂຶ້ນ.
ເຊັ່ນດຽວກັບໂຄງການປ່າມົດ(Ant Forest)ເປັນໂຄງການປູກຕົ້ນໄມ້ເອກະຊົນ ຂະໜາດໃຫຍ່ ທີ່ສຸດໃນສປ ຈີນ ຊຶ່ງອ້າງວ່າມີຜູ້ໃຊ້ຫລາຍກວ່າ 500 ລ້ານຄົນ, ມອບຄະແນນສີຂຽວແກ່ຜູ້ໃຊ້ທີ່ເຮັດກິດຈະກໍາຕ່າງໆ ເຊັ່ນ: ການຍ່າງຫລື ຂີ່ລົດຖີບໄປເຮັດວຽກແລະຫລຸດຜ່ອນການໃຊ້ຢາງນັບຕັ້ງແຕ່ການເປີດຕົວໃນປີ 2016, ໂຄງການນີ້ ໄດ້ປູກຕົ້ນໄມ້ ໄປແລ້ວ 548 ລ້ານຕົ້ນໃນ 13 ແຂວງ.
