———–
ງານເທດສະການວັດທະນະທຳມິດຕະພາບ “ສີສັນອາຊຽນ” ໄດ້ຈັດຂຶ້ນຢູ່ນະຄອນຫຼວງ ຮ່າໂນ້ຍ ສສ ຫວຽດນາມ ນັບແຕ່ວັນທີ 29/8-1/9/2024 ໂດຍແມ່ນສະຖານທູດລາວ ປະຈຳ ສສ ຫວຽດນາມ ແລະ ສະຫະພັນບັນດາອົງການຈັດຕັ້ງມິດຕະພາບນະຄອນຫຼວງ ຮ່າໂນ້ຍ ຮ່ວມກັນຈັດຕັ້ງຂຶ້ນ. ການຈັດງານຄັ້ງນີ້ແມ່ນເພື່ອເປັນການສະເຫຼີມສະຫຼອງວັນສ້າງຕັ້ງ ປະຊາຄົມບັນດາປະຊາຊາດອາຊີຕາເວັນອອກສຽງໃຕ້ ຫຼື ອາຊຽນ ຄົບຮອບ 57 ປີ, ວັນຊາດ ແຫ່ງ ສສ ຫວຽດນາມ ຄົບຮອບ 79 ປີ, ວັນປົດປ່ອຍນະຄອນຫຼວງ ຮ່າໂນ້ຍ ຄົບຮອບ 70 ປີ ແລະ ວັນທີ່ອົງການ UNESCO ຮັບຮອງນະຄອນຫຼວງ ຮ່າໂນ້ຍ ເປັນເມືອງ ເພື່ອສັນຕິພາບ ຄົບຮອບ 25 ປີ. ເປັນໂອກາດໃຫ້ບັນດາເພື່ອນມິດສາກົນທີ່ກຳລັງປະຕິບັດໜ້າທີ່ຢູ່ຫວຽດນາມ ໄດ້ມີໂອກາດພົບປະ, ແລກປ່ຽນມິດຕະພາບກັບຊາວນະຄອນຫຼວງ ຮ່າໂນ້ຍ. ເປັນການເພີ່ມທະວີການຮ່ວມມືຮອບດ້ານຂອງບັນດາປະເທດໃນກຸ່ມອາຊຽນ, ມຸ່ງສູ່ສ້າງໂລກແຫ່ງສັນຕິພາບ ແລະ ມິດຕະພາບ.
ທ່ານ ນາງ ຄຳເພົາ ເອີນທະວັນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ກ່າວໃນພິທີເປີດງານຢ່າງເປັນທາງການໃນຄ່ຳຄືນຂອງວັນທີ 30 ສິງຫາ 2024 ວ່າ: ອາຊຽນແມ່ນອົງການຈັດຕັ້ງລະຫວ່າງລັດຖະບານໃນພາກພື້ນ, ມີຄວາມຫຼາກຫຼາຍ ແຕ່ເປັນເອກະພາບກັນໂດຍມີຈຸດໝາຍລວມໃນການຮັກສາ ແລະ ຊຸກຍູ້ສັນຕິພາບ, ສະຖຽນລະພາບ ແລະ ການຮ່ວມມື. ກວ່າເຄິ່ງສັດຕະວັດແຫ່ງການພັດທະນາເປັນຕົ້ນມາ, ປັດຈຸບັນ ອາຊຽນ ໄດ້ກາຍເປັນບ້ານລວມຂອງປະຊາກອນເກືອບ 700 ລ້ານຄົນ, ມີເສດຖະກິດໃຫຍ່ອັນດັບສາມຂອງອາຊີ ແລະ ອັນດັບ 5 ຂອງໂລກ. ດ້ວຍທ່າແຮງບົ່ມຊ້ອນໃນດ້ານການພັດທະນາອັນໃຫຍ່ຫຼວງ, ຄາດວ່າ ອາຊຽນ ຈະກາຍເປັນເສດຖະກິດໃຫຍ່ອັນດັບ 4 ໃນໂລກໃນປີ 2030. ທ່ານທູດໄດ້ຕີລາຄາສູງຕໍ່ການປະກອບສ່ວນອັນດີງາມຂອງ ຫວຽດນາມ ໃນການສ້າງອະນາຄົດຂອງພາກພື້ນ, ຊຸກຍູ້ບັນດາສະມາຊິກໃນກຸ່ມອາຊຽນ. ນະຄອນຫຼວງ ຮ່າໂນ້ຍ “ນະຄອນເພື່ອສັນຕິພາບ” ແມ່ນສັນຍາລັກຂອງບັນດາຄຸນຄ່າແຫ່ງຄວາມສາມັກຄີ, ຄວາມຫຼາກຫຼາຍ ແລະ ການລວມຕົວ ກໍຄືຄຸນຄ່າຫຼັກຂອງອາຊຽນ.
ໃນພິທີເປີດຢ່າງເປັນທາງການ ແມ່ນໄດ້ມີການສະແດງສິລະປະແບບພື້ນເມືອງຂອງບັນດາປະເທດອາຊຽນ ຊຶ່ງໃນນັ້ນສະຖານທູດລາວປະຈຳ ສສ ຫວຽດນາມ ກໍໄດ້ມີການສະແດງຫຼາຍລາຍການ ຄື: ການຟ້ອນນາງ ຈັນສຸດາ, ການເດີນແບບໃສ່ຊຸດອາພອນຊົນເຜົ່າລາວ, ການຟ້ອນລຳວົງສາມັກຄີ ໂດຍແມ່ນພະນັກງານສະຖານທູດ ແລະ ນ້ອງນັກສຶກສາລາວທີ່ກຳລັງຮ່ຳຮຽນຢູ່ ສສ ຫວຽດນາມ ໃຫ້ການສະແດງ ແລະ ໃຫ້ກຽດເຂົ້າຮ່ວມງານມີຜູ້ຕາງໜ້າຈາກ 10 ປະເທດອາຊຽນ, ຕີມໍ-ແລັສະເຕ ແລະ ອີກກວ່າ 20 ປະເທດນອກອາຊຽນ.
ນອກຈາກພິທີທາງການແລ້ວ, ໃນງານຍັງມີການວາງສະແດງຮູບພາບກ່ຽວກັບຄວາມຫຼາກຫຼາຍທາງດ້ານວັດທະນະທຳຂອງບັນດາປະເທດສະມາຊິກອາຊຽນ ທີ່ບັນດາສະຖານທູດຕ່າງປະເທດໃນນະຄອນຫຼວງ ຮ່າໂນ້ຍ ສົ່ງເຂົ້າຮ່ວມວາງສະແດງ; ຮ້ານວາງສະແດງກ່ຽວກັບຜະລິດຕະພັນວັດທະນະທຳ ແລະ ຮ້ານຂາຍສິນຄ້າຕ່າງໆກວ່າ 200 ຮ້ານ.
(ຂ່າວ-ພາບ: ສະຖານທູດລາວທີ່ຮ່າໂນ້ຍ)
