ໃນວັນທີ 12 ກັນຍາ 2023, ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ວຽກງານການຕ່າງປະເທດ ໃຫ້ພະນັກງານພະແນກການຕ່າງປະເທດ 9 ແຂວງພາກເໜືອ ຈຸດປະສົງ ເພື່ອເພີ່ມຂີດຄວາມສາມາດໃຫ້ພະນັກງານທີ່ຮັບຜິດຊອບວຽກງານພົວພັນຮ່ວມມືກັບຕ່າງປະເທດຢູ່ບັນດາແຂວງ ໃຫ້ມີຄວາມເຂັ້ມແຂງທາງດ້ານວິຊາການພົວພັນຕ່າງປະເທດ ເປັນແຕ່ລະໄລຍະ, ການເຄື່ອນໄຫວວຽກງານການຕ່າງປະເທດໃຫ້ມີຄວາມເປັນເອກະພາບກັນທົ່ວປະເທດ ແລະ ການກະກຽມເປັນປະທານອາຊຽນ ຄັ້ງທີ 3 ຂອງ ສປປ ລາວ ໃນປີ 2024.
ກອງປະຊຸມໄດ້ມີຫົວຂໍ້ສຳຄັນຈຳເປັນຄື: ການວິເຄາະຕີລາຄາສະພາບການສາກົນທີ່ພົ້ນເດັ່ນ ແລະ ທ່າຂະຫຍາຍໃນຕໍ່ໜ້າ, ວຽກງານອາຊຽນ, ການພົວພັນຮ່ວມມືກັບບັນດາປະເທດທີ່ມີຊາຍແດນຕິດກັບແຂວງພາກເໜືອ, ການຕອບໂຕ້ຂ່າວໂຈມຕີລາວຂອງສື່ອອນລາຍ ທີ່ພົວພັນກັບຕ່າງປະເທດ, ແນວທາງການຕ່າງປະເທດ ແລະ ນະໂຍບາຍເຊື່ອມໂຍງສາກົນ ຂອງພັກ-ລັດ, ວຽກງານພິທີການທູດຮອບດ້ານ, ການຄຸ້ມຄອງພະນັກງານລັດຖະກອນທີ່ໄປເຄື່ອນໄຫວຢູ່ຕ່າງປະເທດ ແລະ ການປັບປຸງຂອດການປະສານງານ ລະຫວ່າງ ກະຊວງການຕ່າງປະເທດກັບທ້ອງຖິ່ນ.
ເປັນກຽດເຂົ້າຮ່ວມເປັນປະທານກອງປະຊຸມໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານຫົວໜ້າຫ້ອງການກະຊວງ, ຄະນະກົມ, ວິຊາການຂອງກະຊວງການຕ່າງປະເທດ ທີ່ກ່ຽວຂ້ອງ ຂື້ນສະເໜີບົດທີ່ກ່ຽວຂ້ອງກັບວຽກງານຂອງຕົນໂດຍມີຄະນະຜູ້ແທນຈາກ 9 ແຂວງພາກເໜືອ ປະກອບດ້ວຍ ທ່ານຮອງຫົວໜ້າຫ້ອງວ່າການແຂວງ ຜູ້ຊີ້ນໍາວຽກງານການຕ່າງປະເທດ, ຫົວໜ້າພະແນກການຕ່າງປະເທດແຂວງ ແລະ ວິຊາການພະແນກການຕ່າງປະເທດແຂວງບໍແກ້ວ, ຫຼວງນ້ຳທາ, ຜົ້ງສາລີ, ອຸດົມໄຊ, ຫົວພັນ, ຊຽງຂວາງ, ຫຼວງພະບາງ, ໄຊຍະບູລີ ແລະ ແຂວງວຽງຈັນ. ເຊີ່ງມີຜູ້ເຂົ້າຮ່ວມທັງໝົດ 43 ທ່ານ. ກອງປະຊຸມຄັ້ງລ້າສຸດຈັດໃນປີ 2016.
