ວັນທີ 12 ກັນຍາ 2023 ສະຫະພາບເອີຣົບໄດ້ມອບອຸປະກອນໄອທີ ໃຫ້ກະຊວງແຜນການ ແລະ ການລົງທຶນ ເພື່ອສືບຕໍ່ສະໜັບສະໜູນເຂົ້າໃນການສ້າງຄວາມເຂັ້ມແຂງດ້ານການເກັບກໍາຂໍ້ມູນຂອງວຽກງານດ້ານໂພຊະນາການ ຢູ່ 6 ແຂວງໃນ ສປປ ລາວ ແລະ ເພື່ອພັດທະນານະໂຍບາຍແຫ່ງຊາດດ້ານໂພຊະນາການ.
ອຸປະກອນໄອທີເຫຼົ່ານີ້ ລວມມີ ຄອມພິວເຕີ, ລໍາໂພງ, ເຄື່ອງພິມເອກະສານ, ອຸປະກອບເກັບໄຟຟ້າສໍາຮອງ ແລະ ອຸປະກອນອື່ນໆອີກຈໍານວນໜຶ່ງ, ທີ່ລວມຢູ່ໃນການໃຫ້ທຶນຂອງສະຫະພາບເອີຣົບ ເພື່ອສະໜັບສະໜູນແຜນງານ ການກໍ່ສ້າງຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ເຊິ່ງຈັດຕັ້ງປະຕິບັດ ໂດຍອົງການຢູນິເຊັບ. ແຜນງານດັ່ງກ່າວ ແມ່ນມີຈຸດປະສົງເພື່ອເສີມສ້າງຄວາມອາດສາມາດຂອງ ສປປ ລາວ ໃນການວິເຄາະຂໍ້ມູນດ້ານໂພຊະນາການ ຈາກບັນດາປັດໄຈຕ່າງໆ ແລະ ຕິດຕາມກ່ຽວກັບການລົງທຶນໃນວຽກງານດ້ານໂພຊະນາການ ເພື່ອປະກອບເຂົ້າໃນການສ້າງນະໂຍບາຍແຫ່ງຊາດດ້ານໂພຊະນາການ ໃຫ້ໄດ້ດີຂຶ້ນ.
“ພວກຂ້າພະເຈົ້າ ຂໍສະແດງຄວາມຂອບໃຈມາຍັງ ສະຫະພາບເອີຣົບ ແລະ ອົງການຢູນິເຊັບ ໃນການສະໜັບສະໜູນດ້ານອຸປະກອນໃຫ້ກັບອໍານາດການປົກຄອງຂັ້ນແຂວງ ເພື່ອຊ່ວຍໃນການຮວບຮວມຂໍ້ມູນກ່ຽວກັບການຂາດໂພຊະນາການຂອງເດັກ ໄດ້ຢ່າງມີປະສິດທິພາບຫຼາຍຂຶ້ນ; ທັງນີ້ ກໍ່ເພື່ອຮັບປະກັນວ່າການສ້າງນະໂຍບາຍແຫ່ງຊາດດ້ານໂພຊະນາການ ແມ່ນຢູ່ບົນພື້ນຖານຂໍ້ມູນຫຼັກຖານຕົວຈິງ ແລະ ສາມາດຕອບສະໜອງຄວາມຕ້ອງການທີ່ຈໍາເປັນໃຫ້ກັບເດັກເຫຼົ່ານັ້ນໄດ້” ກ່າວໂດຍ ທ່ານ ນາງ ສີສົມບູນ ອຸນາວົງ, ຫົວໜ້າກົມການຮ່ວມມືສາກົນ, ກະຊວງແຜນການ ແລະ ການລົງທຶນ.
ການມອບ-ຮັບອຸປະກອນໄອທີໃຫ້ກັບພະແນກແຜນການ ແລະ ການລົງທຶນ (DPI) ໃນ 6 ແຂວງຄື: ແຂວງຜົ້ງສາລີ, ແຂວງອຸດົມໄຊ, ແຂວງຄໍາມ່ວນ, ແຂວງສະຫວັນນະເຂດ, ແຂວງສາລະວັນ ແລະ ແຂວງເຊກອງ ແມ່ນເພື່ອສ້າງຄວາມອາດສາມາດເຂົ້າໃນການຕິດຕາມການເຄື່ອນໄຫວວຽກງານ ແລະ ການຮວບຮວມຂໍ້ມູນຂອງວຽກງານດ້ານໂພຊະນາການ ຢູ່ໃນແຕ່ລະແຂວງຕາມລໍາດັບ. ພິທີມອບ-ຮັບ ຄັ້ງນີ້ ໄດ້ຈັດຂຶ້ນພ້ອມກັບພິທີປະຖົມນິເທດຂອງແຜນງານການກໍ່ສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ຢູ່ໃນຂັ້ນແຂວງ ເພື່ອໃຫ້ແນະນໍາກ່ຽວກັບແຜນງານນີ້ ແລະ ຈຸດປະສົງໂດຍລວມ ໃຫ້ກັບບັນດາພະນັກງານທີ່ຢູ່ຮາກຖານ.
“ຈຸດປະສົງຂອງ ການປະຖົມນິເທດກ່ຽວກັບແຜນງານການກໍ່ສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ຢູ່ຂັ້ນແຂວງ ແມ່ນເພື່ອແບ່ງປັນ ດ້ານວິໄສທັດ ແລະ ການບັນລຸເປົ້າໝາຍແຜນງານ ໃນ ສປປ ລາວ. ຍ້ອນເຫດຜົນດັ່ງກ່າວ, ພວກຂ້າພະເຈົ້າ ມີຄວາມໝັ້ນໃຈວ່າການມອບອຸປະກອນໃນຄັ້ງນີ້ ຈະສາມາດຊ່ວຍໃຫ້ພະແນກແຜນການ ແລະ ການລົງທຶນແຂວງ (DPI) ດັ່ງກ່າວສາມາດເກັບກໍາຂໍ້ມູນມາປະກອບເຂົ້າໃນການຕັດສິນໃຈໃນວຽກງານດ້ານໂພຊະການໄດ້ຢ່າງມີປະສິດທິພາບ ແລະ ສາມາດສືບຕໍ່ຂະຫຍາຍແຜນງານໃນຂອບເຂດທົ່ວປະເທດ” ກ່າວໂດຍ ທ່ານນາງ. Assunta Testa, ເອກອັກຄະລະຖະທູດ ດ້ານຄວາມປອດໄພ ຂອງອາຫານ ແລະ ໂພຊະນາການ ຢູ່ສະຖານທູດແຫ່ງສະຫະພາບເອີຣົບ ປະຈໍາ ສປປ ລາວ.
“ໂພຊະນາການທີ່ດີໃນໄລຍະເລີ່ມຕົ້້ນຊີວິດຂອງເດັກນ້ອຍ ຈະສາມາດສ້າງຄວາມແຕກຕ່າງ ຕໍ່ການຈະເລີນເຕີບໂຕ ແລະ ພັດທະນາການຂອງພວກເຂົາ. ສະນັ້ນ, ເພື່ອຮັບປະກັນວ່າເດັກທຸກໆ ຄົນ ຈະສາມາດເລີ່ມຕົ້ນຊີວິດໄດ້ດີທີ່ສຸດ, ພວກເຮົາຕ້ອງຮັບປະກັນວ່າການສ້າງນະໂຍບາຍຈະຕ້ອງຕອບສະໜອງຕໍ່ຄວາມຕ້ອງການທີ່ຈໍາເປັນຂອງເດັກ ແລະ ຂໍ້ມູນເຫຼົ່ານີ້ ຄືປັດໄຈສໍາຄັນ ໃນການປະຕິບັດແຜນງານຄັ້ງນີ້” ກ່າວໂດຍ ທ່ານ Arturo Romboli, ຮອງຜູ້ຕາງໜ້າອົງການຢູນິເຊັບ ປະຈໍາ ສປປ ລາວ. “ອົງການ ຢູນິເຊັບ ແລະ ສະຫະພາບເອີຣົບ ມີຄວາມໝາຍໝັ້ນໃນການພັດທະນາໝາກຜົນຂອງວຽກງານດ້ານໂພຊະນາການ ໃນ ສປປ ລາວ ຜ່ານການຈັດຕັ້ງປະຕິບັດແຜນງານການກໍ່ສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN).”
ແຜນງານ NIPN ແມ່ນ ຂໍ້ລິເລີ່ມສາກົນຂອງຄະນະກໍາມະທິການແຫ່ງສະຫະພາບເອີຣົບ, ທີ່ມີການຈັດຕັ້ງປະຕິບັດຢູ່ໃນ 9 ປະເທດ ໂດຍມີ ສປປ ລາວ ເປັນປະເທດດຽວໃນເຂດອາຊີຈາເວັນອອກສ່ຽງໃຕ້.
