ສະພາວິຊາຊີບນັກບັນຊີ ແລະ ນັກກວດສອບ(ສວ-ບກລ), ໄດ້ຈັດງານປະຖົມນິເທດ ແລະເປີດຊຸດຝຶກອົບຮົມ ຫລັກສູດວິຊາຊີບຊ່ຽວຊານບັນຊີ ຊຸດທີ 18(CPA XVIII) ຂຶ້ນໃນວັນທີ 5 ສິງຫາ 2023 ຜ່ານມານີ້, ໃຫ້ກຽດເປັນປະທານຂອງທ່ານນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີກະຊວງການເງິນ ແລະ ທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ; ມີຮອງຫົວໜ້າສະຖາບັນການເງິນ-ການບັນຊີ, ຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ, ຫົວໜ້າ-ຮອງຫົວໜ້າຂະແໜງ, ບັນດານັກຝຶກຮົບຮົມຊ່ຽວຊານນັກບັນຊີ ເຂົ້າຮ່ວມ.
ໃນພິທີ ໄດ້ຮັບຟັງການນໍາສະເໜີສະພາບລວມຂອງ ສະພາວິຊາຊີບນັກບັນຊີ ແລະ ນັກກວດສອບ, ຫລັກສູດວິີຊາຊີບຊ່ຽວຊານບັນຊີ CPA, ລະບຽບກ່ຽວກັບການຝຶກງານເປັນຊ່ຽວຊານນັກບັນຊີ, ຜົນໄດ້ຮັບຫລັງຈາກຈົບຫລັກສູດ ແລະ ທາງເລືອກ ໃນການປະກອບອາຊີບ, ຈັນຍາບັນດ້ານວິຊາຊີບການບັນຊີ, ລະ ບຽບການຮຽນ-ການສອນ, ການສອບເສັງ, ນິຕິກຳກ່ຽວຂ້ອງ ກັບການປະກອບອາຊີບການບັນຊີ ແລະ ກວດສອບ ລວມທັງລະບຽບການທີ່ກ່ຽວຂ້ອງກັບການຝຶກອົບຮົມ ເພື່ອເຮັດໃຫ້ບັນດານັກຝຶກອົບຮົມ ໄດ້ເຂົ້າ ໃຈລະບຽບການຕ່າງໆ ກ່ອນເລີ່ມຝຶກອົບຮົມຢ່າງເປັນທາງການ ໃນວັນທີ 12 ສິງຫາ 2023 ໂດຍຈະໃຊ້ໄລຍະເວລາທັງໝົດ 3 ປີ, ມີຜູ້ເຂົ້າຮ່ວມຝຶກອົບຮົມທັງໝົດ 382 ທ່ານ. ໃນນີ້, ມີພະນັກງານຈາກບັນດາບໍລິສັດ ເອກະຊົນ 328 ທ່ານ, ພະນັກງານ-ລັດຖະກອນຂອງລັດ 39 ທ່ານ, ສະຖາບັນການສຶກສາ 11 ທ່ານ ແລະ ພະນັກງນຂອງສະພາວິຊາຊີບນັກບັນຊີ ແລະ ນັກກວດສອບ 4 ທ່ານ.
ໂອກາດນີ້, ທ່ານ ນາງ ດາວອນ ທອງຈັນ ໄດ້ມີຄໍາເຫັນສະແດງຄວາມຊົມເຊີຍ ຕໍ່ຊຸດຝຶກອົບຮົມຫລັກສູດວິຊາຊີບຊ່ຽວຊານບັນຊີ ຊຸດທີ 18(CPA XVIII), ສໍາລັບສະພາວິຊາຊີບນັກບັນຊີ ແລະ ນັກກວດສອບ ແມ່ນການຈັດຕັ້ງໜຶ່ງຂຶ້ນກັບກະຊວງການເງິນ, ໂດຍມີບົດບາດໃນການສ້າງທີ່ປຶກສາການບັນຊີ ແລະ ເຕົ້າໂຮມສະມາຊິກຂອງຕົນ, ຕໍ່ມາໄດ້ປ່ຽນຊື່ເປັນສະພາວິຊາຊີບນັກບັນຊີ ແລະ ນັກກວດສອບ ເພື່ອໃຫ້ສອດຄ່ອງກັບກົດໝາຍ ວ່າດ້ວຍການບັນຊີ ປີ 2013 ແລະ ກົດໝາຍ ກວດສອບອິດສະຫລະ ປີ 2014 ເຊິ່ງເປັນການປະກອບສ່ວນອັນສໍາຄັນ ໃນການພັດທະນາເສດຖະກິດ-ສັງຄົມ, ເປັນການຊຸກຍູ້ນໍາພາ, ເຕົ້າ ໂຮມສະມາຊິກ ລວມທັງປົກປ້ອງສິດທິຜົນປະໂຫຍດອັນຊອບທຳ ຂອງນັກບັນຊີ ແລະ ນັກກວດສອບໃຫ້ເຄື່ອນໄຫວຖືກຕ້ອງ ຕາມລະບຽບກົດໝາຍ, ທັງເປັນການຊ່ວຍຊູກຍູ້ບັນດາຫົວໜ່ວຍທຸລະກິດ, ວິສາຫະກິດ ທັງພາກລັດ ແລະ ເອກະຊົນ ຖືບັນຊີຢ່າງຖືກຕ້ອງຕາມລະບຽບກົດໝາຍ ແລະ ອື່ນໆ.
ສະນັ້ນ, ການເປີດຊຸດຝຶກອົບຮົມ ຫລັກສູດວິຊາຊີບຊ່ຽວຊານນັກບັນຊີ ຊຸດທີ 18(CPA XVIII)ເປັນການຍົກລະດັບວິຊາຊີບການບັນຊີ ໃຫ້ມີຄຸນນະພາບ, ສ້າງຄວາມໜ້າເຊື່ອຖືດ້ານວິຊາຊີບ ດ້ວຍການຍົກສູງຄຸນຄ່າ ທາງຈັນຍາບັນ, ສ້າງນັກຊ່ຽວຊານບັນຊີລາວ ໃຫ້ເປັນທີ່ຮັບຮູ້ໃນອາຊຽນ ແລະ ສອດຄ່ອງກັບມາດຕະຖານສາກົນ.
