ສະຫະພັນບານເຕະເອີຣົບ (UEFA) ຖະແຫຼງການຢືນຢັນວ່າ: ບາເຊໂລນ່າ ໄດ້ຮັບອະນຸຍາດເປັນການຊົ່ວຄາວໃຫ້ເຂົ້າຮ່ວມການແຂ່ງຂັນ ຢູຟ່າ ແຊັມປຽນລີກ ໃນລະດູການ 2023-24 ໃນລະຫວ່າງການສືບສວນກ່ຽວກັບຂໍ້ກ່າວຫາວ່າພວກເຂົາຈ່າຍເງິນໃຫ້ຫົວໜ້າຜູ້ຕັດສິນ.
UEFA ໄດ້ອອກມາປະກາດເມື່ອເດືອນມີນາທີ່ຜ່ານມາວ່າ ຈະດໍາເນີນການສືບສວນບາເຊໂລນ່າ ຫຼັງຈາກໄດ້ຮັບລາຍງານວ່າ ຍອດທີມຈາກລາລີກາ ໄດ້ຈ່າຍ 7 ລ້ານເອີໂຣໃຫ້ບໍລິສັດຂອງ ໂຄເຊ່ ມາເຣຍ ເອັນຣິເກຊ ເນເກຣ່າ ອະດີດຮອງປະທານຄະນະກໍາມະການຜູ້ຕັດສິນ.
ຢ່າງໃດກໍຕາມ, ບໍ່ມີຫຼັກຖານໃດໆທີ່ມາສະໜັບສະໜູນຄໍາກ່າວຫາດັ່ງກ່າວ ແລະ ທາງບາເຊໂລນ່າ ກໍຢືນຢັນມາຕະຫຼອດວ່າ ການຈ່າຍເງິນດັ່ງກ່າວເພື່ອເປັນການແລກປ່ຽນຂໍ້ມູນຈາກລາຍງານຂອງນັກສືບກ່ຽວກັບຜູ້ຫຼິ້ນດາວຮຸ່ງໃນແອັດສະປາຍ ແລະ ຜູ້ຕັດສິນ.
ຕາມກົດລະບຽບຂອງ UEFA ລະບຸວ່າ ທີມໃດທີ່ມີສ່ວນກ່ຽວຂ້ອງກັບການລ໊ອກຜົນການແຂ່ງຂັນ ຈະຖືກລົງໂທດຫ້າມບໍ່ໃຫ້ເຂົ້າຮ່ວມໃນລາຍການເປັນເວລາ 1 ລະດູການ
ແຕ່ຫຼ້າສຸດ ໜ່ວຍງານອຸທອນຂອງ UEFA ອຸທອນ ໄດ້ອອກມາຢືນຢັນຢ່າງເປັນທາງການແລ້ວວ່າຈະອະນຸຍາດໃຫ້ ບາເຊໂລນ່າ ຮ່ວມແຂ່ງຂັນໃນ ແຊັມປຽນລີກ ລະດູການໃໝ່ໄດ້ເປັນການຊົ່ວຄາວ.
