ກອງປະຊຸມອົງການປົກຄອງນະຄອນຫຼວງວຽງຈັນ (ນວ) ຄັ້ງທີ່ 26 ຈັດຂຶ້ນວັນທີ 28 ກໍລະກົດ 2023 ທີ່ຫ້ອງວ່ການປົກຄອງ ນວ ເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີຮອງເຈົ້າຄອງ ແລະ ບັນດາທ່ານສະມາຊິກອົງການປົກຄອງ ນວ ເຂົ້າຮ່ວມ. ທ່ານ ອາດສະພັງທອງ ສີພັນດອນ ກ່າວວ່າ ກອງປະຊຸມຄັ້ງນີ້ຈະໄດ້ສຸມໃສ່ 12 ໜ້າວຽກຕົ້ນຕໍຄື ຮັບຟັງການເຜີຍແຜ່ມະຕິຕົກລົງ ຂອງກອງປະຊຸມເປີດກວ້າງຄັ້ງທີ 1 ປະຈໍາປີ 2023 ຮັບຟັງການລາຍງານກ່ຽວກັບການຈັດຕັ້ງປະຕິບັດບົດບັນທຶກຄວາມເຂົ້າໃຈ (MOU) ໂຄງການສຶກສາຄວາມເປັນໄປໄດ້ໃນການພັດທະນາເມືອງທັນສະໄໝ (SmartCity) ຢູ່ ນວ 450 ປີຂອງກຸ່ມບໍລິສັດດວງຈະເລີນ ຮັບຟັງການລາຍງານກ່ຽວກັບແຜນການຕ້ານແລ້ງຕ້ານຖ້ວມ ຂອງພະແນກກະສິກໍາ ແລະ ປ່າໄມ ນວ ຮັບຟັງການລາຍງານການຈັດຕັ້ງປະຕິບັດວາລະແຫ່ງຊາດກ່ຽວກັບແຜນການຊຸກຍູ້ສົ່ງເສີມການຜະລິດກະສິກໍາເພື່ອສະໜອງພາຍໃນ ແລະ ສົ່ງອອກຂອງ ນວ ຮັບຟັງການລາຍງານກ່ຽວກັບແຜນຜັງຄອງນໍ້າວຽງຈັນຕິດພັນກັບການພັດທະນາ ແລະ ການການກໍານົດຂອບເຂດການກວດກາໃບຕາດິນ 76 ກິໂລແມັດ ຮັບຟັງການລາຍງານກ່ຽວກັບຄວາມຄືບໜ້າການກໍ່ສ້າງຂົວຂ້າມນໍ້າງື່ມ ເຂດບ້ານດວງບຸດດີ ເມືອງໄຊທານີ ແລະ ໂຄງການທາງດ່ວນນະຄອນຫຼວງວຽງຈັນ-ແຂວງວຽງຈັນ ການລາຍງານກ່ຽວກັບການສໍາຫຼວດ ແລະ ການຂໍອະນຸມັດຮັບຮອງເອົາແລວທາງໂຄງການສຶກສາຄວາມເປັນໄປໄດ້ ສໍາຫຼວດອອກແບບການກໍ່ສ້າງເສັ້ນທາງແຕ່ທາງ 450 ປີ ຜ່ານບ້ານໂຊກໃຫຍ່ ບ້ານໂຊກນ້ອຍ ບ້ານໂພນທອງ ບ້ານນາບຽນ ຫາ ບ້ານດຸງ ແຕ່ເສັ້ນທາງ ຫຼັກ 21 (ທາງ 13 ໃຕ້) ຫາບ້ານນາຄວາຍ ການລາຍງານກ່ຽວກັບແຜນຜັງລວມເຂດນິຄົມອຸດສາຫະກໍາ ນວ ການລາຍງານກ່ຽວກັບທິດທາງການພັດທະນາ ປະດັບປະດາເສັ້ນທາງໃນ ນວ ການລາຍງານກ່ຽວກັບການສະເໜີແນວຄວາມຄິດເພື່ອສຶກສາຄວາມເປັນໄປໄດ້ຂອງໂຄງການສ້າງສວນນິລັນດອນ (ປ່າສັກສິດ) ຢູ່ ນວ ການລາຍງານກ່ຽວກັບແຜນການ ແລະ ມາດຕະການແກ້ໄຂບັນດາສາຍໂທລະຄົມ ມະນາຄົມ ແລະ ສາຍໄຟຟ້າ ການລາຍງານກ່ຽວກັບສະພາບພົ້ນເດັ່ນປະຈໍາເດືອນກໍລະກົດ ແລະ ແຜນວຽກຈຸດສຸມ ປະຈໍາເດືອນ ສິງຫາ 2023 ຂອງອົງການປົກຄອງ ນວ.
