ວັນທີ 27 ກໍລະກົດ 2023 ຢູ່ເຮືອນພັກທູດຍີ່ປຸ່ນ ໄດ້ຈັດງານລ້ຽງສົ່ງນັກສຶກສາໂຄງການທຶນການ ສຶກສາ ເພື່ອພັດທະນາຊັບພະຍາກອນມະນຸດ (JDS) ແລະ ໂຄງການຜູ້ນຳໄວໜຸ່ມ (YLP) ທີ່ຈະເດີນ ທາງໄປປະເທດຍີ່ປຸ່ນໃນກາງເດືອນສິງຫາ 2023 ເຂົ້າຮ່ວມໃນງານມີທ່ານ ໂຄບະຢະຊິ ເຄນອິຈິ ເອກ ອັກຄະຣະຊະທູດຍີ່ປຸ່ນ ປະຈຳສປປ ລາວ ທ່ານ ຮສ ປອ ພຸດ ສິມມາລາວົງ ລັດຖະມົນຕີກະຊວງ ສຶກສາ ທິການ ແລະ ກີລາ ທ່ານ ປອ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມທ່ານ ຮອງລັດຖະມົນຕີ ຫົວໜ້າ ຮອງຫົວໜ້າກົມທີ່ກ່ຽວຂ້ອງ ແລະ ນັກສຶກສາ.
ທ່ານ ໂຄບະຢະຊິ ເຄນອິຈິ ກ່າວວ່າ: ນັກສຶກສາທີ່ໄດ້ຮັບການສະໜັບສະໜູນຈາກລັດຖະບານຍີ່ປຸ່ນ ພາຍໃຕ້ໂຄງການທຶນການສຶກສາ ເພື່ອພັດທະນາຊັບພະຍາກອນມະນຸດ (JDS) ແລະ ໂຄງການຜູ້ນຳໄວໜຸ່ມ (YLP) ຄັ້ງນີ້ ລວມມີທັງໝົດ 25 ຄົນ ໃນນັ້ນ ທຶນ JDS ມີ 22 ຄົນ ແລະ ທຶນ YLP ມີ 3 ຄົນ.
ທຶນ JDS ຈະສະໜອງທຶນການສຶກສາເປັນເວລາ 2 ປີ ສຳລັບລະດັບປະລິນຍາໂທ ແລະ 3 ປີ ສຳ ລັບປະລິນຍາເອກ ໃຫ້ແກ່ລັດຖະກອນລາວ ທີ່ມີສ່ວນຮ່ວມໃນການພັດທະນາເສດຖະກິດ-ສັງຄົມ ເພື່ອສຶກສາຕໍ່ໃນລະດັບຫຼັງປະລິນຍາຕີ ນັບແຕ່ເລີ່ມຕົ້ນໂຄງການໃນສົກປີ 1999 ຂອງປະເທດຍີ່ປຸ່ນ ມີລັດຖະກອນລາວທີ່ໄດ້ຮັບທຶນການສຶກສານີ້ຫຼາຍກວ່າ 500 ຄົນ ສ່ວນທຶນ YLP ມີເປົ້າໝາຍໃນການສົ່ງເສີມລັດຖະ ກອນໜຸ່ມ ໃຫ້ກາຍເປັນຜູ້ນໍາຂອງປະເທດໃນອະນາຄົດ ນັບແຕ່ສົກປີ 2001 ທີ່ເລີ່ມຕົ້ນໂຄງການມີລັດຖະ ກອນລາວປະມານ 70 ຄົນ ທີ່ໄດ້ຮັບການສະໜັບສະໜູນຈາກໂຄງການດັ່ງກ່າວ ເຊິ່ງເປັນໂຄງການທີ່ສະໜອງທຶນການສຶກສາເປັນເວລາ 1 ປີ ເພື່ອສຶກສາລະດັບປະລິນຍາໂທໃນ 1 ຈາກ 5 ສາຂາວິຊາຄື: ນະໂຍ ບາຍພາກລັດ ນະໂຍບາຍພາກລັດປະຈຳທ້ອງຖິ່ນ ບໍລິຫານທຸລະກິດ ກົດໝາຍ ແລະ ການບໍລິຫານ
