ຄະນະກວດກາສູນກາງພັກໄດ້ເປີດກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານພັກ ຄະນະກວດກາສູນກາງພັກ ສະໄໝທີ IV ຂຶ້ນໃນວັນທີ 20 ກໍລະກົດ ຜ່ານມາ ທີ່ຄະນະກວດກາສູນກາງພັກ ພາຍໃຕ້ການເປັນປະທານກອງປະຊຸມຂອງ ສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ເລຂາຄະນະບໍລິຫານງານພັກ ຄະນະກວດກາສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໂດຍມີສະຫາຍຮອງເລຂາພັກ, ບັນດາສະຫາຍກຳມະການປະຈຳພັກ, ຄະນະພັກ, ບັນດາສະຫາຍເລຂາໜ່ວຍພັກ, ມີພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສຳຫຼວດກວດກາຕີລາຄາຄວາມຮັບຜິດຊອບລວມ ຂອງຄະນະບໍລິຫານງານພັກ ແລະ ຄວາມຮັບຜິດຊອບຂອງກຳມະການພັກແຕ່ລະສະຫາຍ ໂດຍມີການວິເຄາະໄຈ້ແຍກຢ່າງເລິກເຊິ່ງການເຄື່ອນໄຫວນຳພາຕົວຈິງເພື່ອໃຫ້ເຫັນອັນດີ-ຜົນງານ, ອັນອ່ອນ-ຄົງຄ້າງລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ແລະ ຂອງບຸກຄົນຄະນະພັກ ໃນໄລຍະ 2 ປີເຄິ່ງຜ່ານມາ, ການຈັດກອງປະຊຸມຄັ້ງນີ້ໄດ້ແບ່ງອອກເປັນ 3 ວາລະຄື: ວາລະທີ 1 ກອງປະຊຸມທາບທາມຄວາມໄວ້ວາງໃຈຕໍໍ່ການນໍາພາລວມ ແລະ ບຸກຄົນຄະນະພັກ ຄະນະກວດກາສູນກາງພັກ ກາງສະໄໝທີ IV ຊຶ່ງໃນນັ້ນໄດ້ຜ່ານ ຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ເລກທີ 268/ລຄລສພ, ລົງວັນທີ 20 ມັງກອນ 2023; ຜ່ານມາດຕະຖານລວມ ຂອງພະນັກງານນໍາພາ-ຄຸ້ມຄ້ອງ, ມາດຕະຖານສະເພາະຄະນະບໍລິຫານງານພັກກະຊວງ-ອົງການ, ໜ້າທີ່, ສິດຂອງຄະນະພັກດັ່ງກ່າວ ແລະ ຂໍ້ຫ້າມສໍາລັບສະມາຊິກພັກ; ວາລະທີ 2 ແມ່ນໄດ້ຜ່ານຮ່າງສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ຂອງຄະນະພັກ ຄະນະກວດກາສູນກາງພັກ; ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາວຽກງານກວດກາ ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ ແລະ ປະກອບຄຳເຫັນຕໍ່ 2 ບົດສະຫຼຸບດັ່ງກ່າວ ໂດຍເນັ້ນໜັກ 3 ວຽກຄື: ວຽກງານກວດກາພັກ, ກວດກາລັດ, ຕ້ານ ແລະ ສອບສວນການສໍ້ລາດບັງຫຼວງ; ວາລະທີ 3 ແມ່ນໄດ້ຜ່ານຮ່າງບົດສຳຫຼວດການນຳພາລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ກາງສະໄໝທີ IV, ປະກອບຄໍາເຫັນໃສ່ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ກາງສະໄໝທີ IV ແລະ ສໍາຫຼວດບຸກຄົນໃນຄະນະພັກ.
ສະຫາຍ ຄຳພັນ ພົມມະທັດ ຍັງໄດ້ຮຽກຮ້ອງມາຍັງບັນດາສະຫາຍ ຄະນະບໍລິຫານງານພັກ, ບັນດາສະຫາຍສະມາຊິກພັກ, ກໍຄືຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບການເມືອງ, ສຸມສະຕິປັນຍາເຂົ້າໃນການຄົ້ນຄວ້າ, ວິເຄາະ, ພິຈາລະນາຕໍ່ບັນຫາຕ່າງໆຢ່າງກົງໄປກົງມາ, ເລິກເຊິ່ງ ແລະ ເຮັດໃຫ້ກອງປະຊຸມໃນຄັ້ງນີ້ດຳເນີນໄປດ້ວຍຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ຢ່າງຈົບງາມ.
ຂ່າວ-ພາບ: ຄະນະກວດກາສູນກາງພັກ
