ໝາກຖົ່ວລຽນຂອງໄທ, ມັນຕົ້ນຂອງລາວ, ຜະລິດຕະພັນແກ້ວກຣິສຕັນຂອງສາທາລະນະລັດເຊັກ… ໃນງານວາງສະແດງສິນຄ້າສາກົນພາກຕາເວັນຕົກຈີນ ຄັ້ງທີ 19 ທີ່ຈັດຂຶ້ນຢູ່ນະຄອນເສີງຕູ່ ແຂວງເສສວນ ຈີນ ເມື່ອບໍ່ດົນມານີ້, ສິນຄ້າທີ່ມີຫຼາກຫຼາຍສີສັນໄດ້ ດຶງດູດສາຍຕາຂອງບັນດາຜູ້ເຂົ້າຊົມເປັນພິເສດ.
ຢູ່ຕໍ່ໜ້າຮ້ານວາງສະແດງກະເປົາໜັງທີ່ເຮັດດ້ວຍມື ຂອງປະເທດອາກຊັງຕີນ, ມີລູກຄ້າສອບຖາມຂໍ້ມູນສິນຄ້ານໍາເຈົ້າຂອງຮ້ານເລື່ອຍໆ. ທ່ານຫຼຽວເສີງຫຼິນ ຜູ້ອໍານວຍການດ້ານຍີ່ຫໍ້ຂອງວິສາຫະກິດ ດັ່ງກ່າວກ່າວວ່າ: ໄປຄຽງຄູ່ກັບປະເທດອາກຊັງຕີນ ໄດ້ເຂົ້າຮ່ວມການຮ່ວມກັນສ້າງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ວິສາຫະກິດມີຄວາມຄອງຄອຍເປັນຢ່າງຍິ່ງຕໍ່ການກໍາໂອກາດດັ່ງກ່າວແລະ ເຂົ້າສູ່ຕະຫຼາດຈີນທີ່ໃຫຍ່ກວ່າເກົ່າ. ມາວາງສະແດງເປັນເວລາ 2 ວັນ, ພວກເຮົາເລີ່ມໄດ້ຮັບໃບສັ່ງຊື້ແລ້ວ.
ທ່ານ ເສີງທຽນ ເປັນຄົນລາວ, ທ່ານມາເຂົ້າຮ່ວມງານວາງສະແດງສິນຄ້າສາກົນພາກຕາເວັນຕົກຈີນ ເປັນເທື່ອທີ 4 ແລ້ວ. ທ່ານກ່າວວ່າ, ຄາດວ່າປີນີ້ປະລິມານການຄ້າມັນຕົ້ນຂອງບໍລິສັດຂອງຕົນ ກັບຈີນ ຈະມີເຖິງ 100 ໂຕນ ຊຶ່ງໄດ້ເພີ່ມຂຶ້ນຢ່າງຫຼວງຫຼາຍເມື່ອທຽບໃສ່ໄລຍະດຽວກັນຂອງປີຜ່ານມາ, ເພີ່ມຂຶ້ນ1,5 ເທົ່າຂອງປີ 2019. ທາງລົດໄຟ ລາວ-ຈີນ ເປີດການນໍາໃຊ້ຢ່າງຮອບດ້ານ, ໄດ້ສ້າງໂອກາດໃໝ່ໃຫ້ແກ່ວິສາຫະກິດລາວ.
ງານວາງສະແດງຄັ້ງນີ້ໄດ້ດຶງດູດ ວິສາຫະກິດ 3.500 ກວ່າແຫ່ງ ທີ່ມາຈາກ 56 ປະເທດ ແລະ ເຂດແຄວ້ນມາເຂົ້າຮ່ວມ. ຄຳສັບທີ່ວ່າ: “ຄວາມສາມາດບົ່ມຊ້ອນ” “ໂອກາດ” “ການຮວ່ມມື” ໄດ້ກາຍເປັນຄໍາສັບທີ່ຜູ້ຮັບຜິດຊອບຂອງວິສາຫະກິດລົງທຶນຕ່າງປະເທດທີ່ເຂົ້າຮ່ວມງານວາງສະແດງມັກເວົ້າເຖິງເລື້ອຍໆ, ພວກເຂົາເຈົ້າຫວັງຢ່າງຍິ່ງວ່າໃນງານວາງສະແດງຄັ້ງນີ້, ຈະຄົ້ນພົບໂອກາດການພັດທະນາຢູ່ຕະຫຼາດຈີນ ໂດຍສະເພາະແມ່ນໂອກາດການພັດທະນາຢູ່ພາກຕາເວັນຕົກຂອງຈີນ.
ທ່ານ ອະນຸລັກ ທີ່ມາຈາກສີລັງກາ ມາເຂົ້າຮ່ວມງານວາງສະແດງດັ່ງກ່າວເປັນຄັ້ງທໍາອິດ; ທ່ານກ່າວວ່າ: ຂ້າພະເຈົ້າຮູ້ສຶກວ່າ ນັບແຕ່ຕົ້ນປີ 2023 ເປັນຕົ້ນມາ, ຕະຫຼາດໄດ້ຟື້ນຕົວຄືນນັບມື້ນັບແຂງແຮງ, ຫວັງວ່າ, ພວກເຮົາຈະສາມາດຮັບຮູ້ພາກຕາເວັນຕົກສ່ຽງໃຕ້ຂອງຈີນຫຼາຍກວ່າເກົ່າ, ພ້ອມທັງເປີດຕະຫຼາດບໍລິໂພກຂອງພາກຕາເວັນຕົກຂອງຈີນ ດ້ວຍໂອກາດເຂົ້າຮ່ວມງານວາງສະແດງຄັ້ງນີ້.
ພາຍຫຼັງທີ່ເປີດນຳໃຊ້ທາງລົດໄຟ ລາວ-ຈີນ, ການໄປມາຫາສູ່ກັນ, ການຂົນສົ່ງສິນຄ້າ, ການແລກປ່ຽນດ້ານວັດທະນະທໍາ ລະຫວ່າງພາກຕາເວັນຕົກຂອງຈີນ ກັບ ປະເທດລາວ ແລະ ປະເທດອາຊີຕາເວັນອອກສ່ຽງໃຕ້ນັບມື້ນັບແໜ້ນແຟ້ນຂຶ້ນ. ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ກ່າວວ່າ: ທາງລົດໄຟລາວ-ຈີນ ເປັນໂຄງການສໍາຄັນພາຍໃຕ້ຂອບ “ໜຶ່ງແລວ ໜຶ່ງເສັ້ນທາງ” ຫວັງວ່າປະເທດລາວ ແລະ ແຂວງເສສວນຈະສືບຕໍ່ເປີດກວ້າງການຮ່ວມມືໃນຂົງເຂດທີ່ມີຄວາມສາມາດບົ່ມຊ້ອນ ລວມທັງຂະແໜງການຄົມມະນາຄົມ, ກະສິກໍາ, ອຸດສາຫະກໍາປຸງແຕ່ງ ແລະ ຂະແໜງການທ່ອງທ່ຽວເປັນຕົ້ນ.
ແຫຼ່ງຂ່າວ: ສໍານັກຂ່າວຊິນຮວາ
