ສູນກາງສະຫະພັນແມ່ຍິງລາວ (ສສຍລ) ຮ່ວມກັບ ອົງການກາແດງແຫ່ງຊາດລາວ ໄດ້ຈັດກິດຈະກໍາການບໍລິຈາກເລືອດ ຂຶ້ນໃນວັນທີ 21 ກໍລະກົດ ນີ້ ທີ່ສູນການຄ້າໄອເຕັກມໍ ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 – 20 ກໍລະກົດ 2023) ພາຍໃຕ້ຄໍາຂັວນ 68 ປີ ມີໄຊ ໃຫ້ເລືອດ ໃຫ້ຊີວິດ ໂດຍການກ່າວເປີດພິທີຂອງທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີທ່ານ ສິງ ເມໂນລາດ ຮອງປະທານອົງການກາແດງແຫ່ງຊາດລາວ, ຄະນະບໍລິຫານງານ ສສຍລ, ສຍ ກະຊວງ-ອົງການ ອ້ອມຂ້າງສູນກາງ, ຄະນະຫ້ອງການ, ກົມ, ສູນ ຈາກ ສສຍລ, ຄະນະນໍາຈາກສູນເລືອດລາວ, ແພດ, ໝໍ, ພະນັກງານຈາກ ສສຍລ ພ້ອມດ້ວຍມວນຊົນເຂົ້າຮ່ວມ.
ທ່ານ ນາງ ສິລີກິດ ບຸບຜາ ໄດ້ກ່າວວ່າ: ວັນທີ 20 ກໍລະກົດ ແມ່ນວັນທີ່ມີຄວາມໝາຍ ຂອງແມ່ຍິງລາວໃນທົ່ວປະເທດໃນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ. ເພື່ອລະນຶກເຖິງ ໃນວັນສ້າງຕັ້ງສະຫະພັນແມ່ຍິງລາວ ວັນທີ 20 ກໍລະກົດ ປີ 1955 ຊຶ່ງປີນີ້ແມ່ນ ຄົບຮອບ 68 ປີ ເປັນວັນທີ່ມີຄວາມສໍາຄັນທາງດ້ານປະຫວັດສາດ ແລະ ມູນເຊື້ອຂອງແມ່ຍິງລາວ ໃນທົ່ວປະເທດ. ໃນໄລຍະຜ່ານມາ ບໍ່ວ່າຈະແມ່ນໄລຍະຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ ກໍຄືໃນໄລຍະສ້າງສາພັດທະນາປະເທດຊາດ, ແມ່ຍິງລາວບັນດາເຜົ່າໃນທົ່ວປະເທດ ຍາມໃດກໍຄຽງບ່າຄຽງໄຫຼ່ ຮ່ວມກັບ ອ້າຍນ້ອງຊາຍ ໃນການປະຕິບັດວຽກງານທີ່ຕົນເອງຮັບຜິດຊອບດ້ວຍນໍ້າໃຈຮັກຊາດອັນສູງສົ່ງ ຊຶ່ງເຫັນໄດ້ ມີຜົນງານອັນອັນໂດດເດັ່ນ ແລະ ໃຫຍ່ຫຼວງ, ຫຼາຍທ່ານກາຍເປັນວິລະຊົນແຫ່ງຊາດ ຊຶ່ງປີນີ້ສູນກາງສະຫະພັນແມ່ຍິງລາວໄດ້ຮ່ວມກັບອົງການກາແດງແຫ່ງຊາດລາວ ໂດຍພາຍໃຕ້ການຮ່ວມມືສະໜັບສະໜູນ ຈາກອົງການສາກົນ ຈັດຂະບວນການຮັບບໍລິຈາກເລືອດຂຶ້ນ ເພື່ອຊ່ວຍເຫຼືອຊີວີດຂອງຄົນເຈັບທີ່ຕ້ອງການເລືອດຢູ່ໂຮງໝໍແຫ່ງຕ່າງໆ ພາຍໃຕ້ ຄໍາຂວັນ 68 ປີ ມີໄຊ ໃຫ້ເລືອດ ໃຫ້ຊີວິດ ການຈັດຂະບວນການຮັບບໍລິຈາກເລືອດ ຖືວ່າເປັນກິດຈະກໍາໜຶ່ງທີ່ເຫັນວ່າມີຄວາມສໍາຄັນ ແລະ ເປັນກິດຈະກໍາໜຶ່ງເພື່ອເປັນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ເປັນການປະກອບສ່ວນຂອງສູນກາງສະຫະພັນແມ່ຍິງລາວ ແລະ ພ້ອມທັງເປັນການຊຸກຍູ້ຕໍ່ວຽກງານມະນຸດສະທຳຂອງປະເທດເຮົາ ໂດຍສະເພາະກໍແມ່ນ ການບໍລິຈາກເລືອດເພື່ອຊ່ວຍຊີວິດຂອງເພື່ອນມະນຸດດ້ວຍກັນ ທັ້ງນີ້ ກໍເພື່ອເປັນການປະກອບສ່ວນໃນການຫຼຸດຜ່ອນອັດຕາການຕາຍຂອງແມ່ ແລະ ອັດຕາການຕາຍຂອງເດັກ ຊຶ່ງເຫັນວ່າ ຢູ່ ສປປ ລາວ ອັດຕາການເສຍຊີວິດຂອງແມ່ຍິງຖືພາ ເກີດລູກ ທີ່ມີອາການສົນແມ່ນຍັງມີໂຕເລກທີ່ສູງສົມຄວນ. ການມີເລືອດສໍາຮອງຢູ່ໃນລະດັບສູນເລືອດແຫ່ງຊາດ, ສູນເລືອດແຂວງ ແລະ ບັນດາໜ່ວຍເກັບຮັກສາເລືອດຂັ້ນເມືອງ ແມ່ນມີຄວາມຈໍາເປັນ ເພື່ອຕອບສະໜອງເລືອດທີ່ປອດໄພໃຫ້ແກ່ ຄົນເຈັບເຫຼົ່ານັ້ນໃຫ້ທັນເວລາ.
ທ່ານກ່າວອີກວ່າ: ໃນໂອກາດທີ່ມີຄວາມໝາຍສຳຄັນນີ້ ສະແດງຄວາມຮູ້ບຸນຄຸນ ແລະ ຍ້ອງຍໍຊົມເຊີຍມາຍັງການນຳຂອງຄະນະສະຫະພັນແມ່ຍິງລາວທຸກຂັ້ນ ພ້ອມດ້ວຍອົງການຈັດຕັ້ງມະຫາຊົນທີ່ໄດ້ມີແນວຄວາມຄິດສ້າງກິດຈະກຳນີ້ຂຶ້ນຕໍ່ເນື່ອງ, ເພື່ອເປັນການປູກຈິດສຳນຶກໃຫ້ແກ່ແມ່ຍິງລາວຮຸ່ນ ປັດຈຸບັນ ສືບຕໍ່ມູນເຊື້ອອັນດີງາມໃນຄວາມຮັກຊາດ, ຮັກບ້ານເກີດເມືອງນອນ ແລະ ຍອມເສຍສະຫຼະສິດຜົນປະ ໂຫຍດສ່ວນຕົວຂອງຕົນ ເພື່ອປະເທດຊາດ ແລະ ກໍຖືໂອກາດນີ້ ຂໍສະແດງຄວາມຂອບໃຈ ແລະ ຊົມເຊີຍ ມາຍັງການຈັດຕັ້ງພາກລັດ-ເອກະຊົນ ແລະ ອົງການສາກົນ ທີ່ໄດ້ຮ່ວມສະໜັບສະໜູນໃນກິດຈະກໍາອັນສໍາຄັນນີ້.
ຊົມເຊີຍ ວັນສ້າງຕັ້ງສະຫະພັນແມ່ຍິງລາວ ຢ່າງສຸດອົກສຸດໃຈ !.
ຂ່າວ-ພາບ: ຍຸພິນທອງ
