ພະແນກສະຫະພັນແມ່ຍິງ ຫ້ອງວ່າການກະຊວງປ້ອງກັນປະເທດ ໄດ້ຈັດກິດຈະກຳແຂ່ງຂັນກິລາສະໝັກຫຼິ້ນ ເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955-20 ກໍລະກົດ 2023) ໃນວັນທີ 18 ກໍລະກົດ 2023 ໂດຍການເປັນປະທານຂອງ ສະຫາຍ ພັນເອກ ບຸດສະດີ ອິນທະລັງສີ ຮອງຫົວໜ້າຫ້ອງວ່າການກະຊວງປ້ອງກັນປະເທດ, ມີສະຫາຍ ພົນຈັດຕະວາ ວິລະຕູ່ ວໍລະຈິດ ຫົວໜ້າຫ້ອງການເມືອງຫ້ອງວ່າການກະຊວງປ້ອງກັນປະເທດ ພ້ອມດ້ວຍຄະນະພັ-ຄະນະບັນຊາ, ເອື້ອຍນ້ອງສະຫະພັນແມ່ຍິງ ຕະຫຼອດຮອດນັກກິລາບັນດາກົມ, ກອງ, ຫົວໜ່ວຍທຸລະກິດທີ່ຂຶ້ນກັບຫ້ອງວ່າການກະຊວງປ້ອງກັນປະເທດເຂົ້າຮ່ວມຢ່າງຟົດຟື້ນ.
ການຈັດກິດຈະກຳແຂ່ງຂັນກິລາສະໝັກຫຼິ້ນໃນຄັ້ງນີ້ ແມ່ນເພື່ອສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ ທັງເປັນການເຕົ້າໂຮມຄວາມສາມັກຄີ ຮັກແພງ ລະຫວ່າງ ກົມກອງຕໍ່ກົມກອງ, ບຸກຄົນຕໍ່ບຸກຄົນທີ່ມີຢູ່ແລ້ວ ໃຫ້ເພີ່ມຍິ່ງໆຂຶ້ນກວ່າເກົ່າ ພ້ອມນີ້ກໍເພື່ອເສີມສ້າງຮ່າງກາຍຂອງພະນັກງານ-ນັກຮົບພວກເຮົາ ໃຫ້ມີສຸຂະພາບແຂງແຮງ, ກຽມ ພ້ອມປະຕິບັດໜ້າທີ່ວຽກງານ ໃຫ້ໄດ້ດີ ແລະ ມີຜົນສຳເລັດ. ກິດຈະກຳທີ່ນໍາແຂ່ງຂັນໃນຄັ້ງນີ້ ປະກອບມີ 3 ປະເພດ ຄື: ນຸ່ງເຄື່ອງໄວ, ດຶງເຊືອກ ແລະ ຕັ້ງດົນຕີ.
ຜ່ານການແຂ່ງຂັນເຫັນວ່າດໍາເນີນໄປດ້ວຍບັນຍາກາດຟົດຟື້ນມ່ວນຊື່ນ, ສຳເລັດຜົນໄປດ້ວຍດີ ແລະ ມີຜົນສຳເລັດກໍຍ້ອນຄວາມສາມັກຄີພ້ອມພຽງປຸ້ມລຸ່ມກັນຂອງເອື້ອຍນ້ອງແມ່ຍິງ ແລະ ຍ້ອນຄວາມເອົາໃຈໃສ່ໃກ້ຊິດຕິດແທດຂອງຄະນະພັກ-ຄະນະບັນຊາ, ບັນດາກົມກອງ, ບໍລິສັດ-ລັດວິສາຫະກິດອ້ອມຂ້າງຫ້ອງວ່າການກະຊວງປ້ອງກັນປະເທດ ທີ່ໄດ້ເອື້ອອຳນວຍຄວາມສະດວກຫຼາຍດ້ານ ແລະ ບວກໃສ່ຄວາມຮັບຜິດຊອບຂອງບັນດາສະຫາຍກຳມະການ ທີ່ໄດ້ປະກອບສ່ວນຢ່າງຕັ້ງໜ້າ ເຮັດໃຫ້ຂະບວນການກິດຈະກຳໃນຄັ້ງນີ້ ສໍາເລັດຕາມແຜນການທີ່ວາງໄວ້. ພາຍຫຼັງສໍາເລັດການແຂ່ງຂັນກິລາແຕ່ລະປະເພດ ກໍໄດ້ຈັດຕັ້ງມອບລາງວັນໃຫ້ອັນດັບທີ 1, 2 ແລະ 3 ຕາມລໍາດັບ.
ພາບ-ຂ່າວ: ກອງທັບ
