ການແຂ່ງຂັນເຕະບານ 8 ຄົນ (7 ຮັບ 1) ລາຍການພິເສດ 8 ພາກສ່ວນສາມັກຄີ ຮຸ່ນອາຍຸ 37 ປີຂຶ້ນໄປລາຍການ ແກຣນ ໂອເພັນນິງ ຄັບ ເບ ສະຫວັນ ເອັບຊີ ສະເຕດ້ຽມ (GRAND OPENING CUP BAY SAVANAH FC STADIUM) ເພື່ອສ້າງຂະບວນການສະເຫຼີມສະຫຼອງການເປີດນຳໃຊ້ສະໜາມກິລາຫຍ້າທຽມ ເບ ສະຫວັນ ເອັບຊີ ໃໝ່ ເຂດບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ຈະຈັດຂຶ້ນ ໃນວັນທີ 21 ກໍລະກົດ 2023.
ອີງຕາມການລາຍງານຂອງ ທ່ານ ສົມໃຈ ຫຼ່ຽມໄຊຍະຈັກ ຜູ້ຮັບຜິດຊອບຈັດການແຂ່ງຂັນເຕະບານ ລາຍການດັ່ງກ່າວ ໃນວັນທີ 20 ກໍລະກົດ 2023 ໃຫ້ຮູ້ວ່າ: ໃນວັນທີ 21 ກໍລະກົດ 2023 ຈະໄດ້ຈັດການແຂ່ງຂັນເຕະບານ ລາຍການພິເສດ 8 ພາກສ່ວນສາມັກຄີ ຮຸ່ນອາຍຸ 37 ປີຂຶ້ນໄປ ລາຍການ ແກຣນ ໂອເພັນນິງ ຄັບ ເບ ສະຫວັນ ເອັບຊີ ສະເຕດ້ຽມ (GRAND OPENING CUP BAY SAVANAH FC STADIUM) ເພື່ອສ້າງຂະບວນການສະເຫຼີມສະຫຼອງການເປີດສະໜາມກິລາຫຍ້າທຽມ ເບ ສະຫວັນ ເອັບຊີ ໃໝ່ ເຂດບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ທີ່ເປີດໃຫ້ບໍລິການສັງຄົມຢ່າງເປັນທາງການ ນັບແຕ່ວັນທີ 20 ກໍລະກົດ 2023 ເປັນຕົ້ນໄປ ຊຶ່ງການແຂ່ງຂັນລາຍການດັ່ງກ່າວ ຈະເລີ່ມດຳເນີນການແຂ່ງຂັນໃນເວລາ 13:00 ໂມງເປັນຕົ້ນໄປ ກຳນົດເວລາແຂ່ງຂັນຕັ້ງລະ 20 ນາທີ ລວມ 2 ຕັ້ງ 40 ນາທີ, ໃນນັ້ນ ໄດ້ມີຄ່າສະໝັກທີມລະ 1 ລ້ານກີບ ສຳລັບທີມທີ່ແຈ້ງເຈດຈຳນົງເຂົ້າຮ່ວມແຂ່ງຂັນປັດຈຸບັນ ມີ 7 ພາກສ່ວນ ແຕ່ກຳນົດ 8 ພາກສ່ວນ ຄາດວ່າຮອດມື້ແຂ່ງຂັນ ຈະມີອີກໜຶ່ງທີມສະໝັກເຂົ້າຮ່ວມແຂ່ງຂັນເພີ່ມຕື່ມອີກ ສ່ວນ 7 ພາກສ່ວນເຂົ້າຮ່ວມປະກອບມີ ທີມກຸ່ມນໍ້າໃຈລາວ ຫຼື ຮາດຣ໊ອກ ເອັບຊີ, ທີມຮ້ານອາຫານເຍົາວະຣາດ, ທີມ ສາຍລຸຍ, ເຟຣນ ແອນ ຟາຍ ເອັບຊີ, ທີມ ປາກເຊ, ທີມນັກຂ່າວສາຍກິລາລາວ ແລະ ທີມປະສານໃຈ.
ສຳລັບການແຂ່ງຂັນໃນຮອບຄັດເລືອກ ຈະແບ່ງອອກເປັນ 2 ສາຍ ຄື: ສາຍ ເອ ແລະ ສາຍ ບີ ໂດຍຈະມີການຈັບສະຫຼາກປະກົບຄູ່ແຂ່ງຂັນ ທີມຊະນະ ແມ່ນໄດ້ໄປແຂ່ງຂັນ ລາຍການ ດິວິຊັນ 1 ແລະ ທີມເສຍ ໄປແຂ່ງຂັນລາຍການ ດິວິຊັນ 2 ສຳລັບ 4 ທີມ ທີ່ຊະນະ ລາຍການ ດິວິຊັນ 1 ໃນຮອບ 4 ທີມນັ້ນ ຈະມີການຈັບສະຫຼາກປະກົບຄູ່ແຂ່ງຂັນອີກຄັ້ງໜຶ່ງ ເພື່ອຕຄັດເລືອກເອົາທີມຊະນະ ໄປຊີງຊະນະເລີດ ແລະ ທີມເສຍ ໄປຊີງອັນດັບທີ 3 ແລະ ທີ 4 ສ່ວນອີກ 4 ທີມທີ່ເສຍ ໄປແຂ່ງຂັນລາຍການ ດິວິຊັນ 2 ແລະ ການແຂ່ງຂັນແມ່ນກຳນົດຮູບແບບດຽວກັນກັບ ລາຍການ ດິວິຊັນ 1.
ສ່ວນລາງວັນຊະນະເລີດ ລາຍການ ດິວິຊັນ 1 ຈະໄດ້ຮັບຂັນແຊ໋ມ ມູນຄ່າ 1 ລ້ານກີບ ພ້ອມເງິນສົດ 1 ລ້ານກີບ, ຮອງຊະນະເລີດ ຈະໄດ້ຮັບເງິນສົດ 500.000 ກີບ ແລະ ອັນດັບທີ 3 ຈະໄດ້ຮັບຂັນລາງວັນ ມູນຄ່າ 500.000 ກີບ ພ້ອມເງິນສົດ 300.000 ກີບ ສ່ວນທີ 4 ໄດ້ຮັບພຽງລາງວັນຊົມເຊີຍ. ຂະນະທີ່ ລາງວັນຊະນະເລີດ ລາຍການ ດິວິຊັນ 2 ອັນດັບທີ 1 ຈະໄດ້ຮັບຂັນ 1 ໜ່ວຍ ມູນຄ່າ 700.000 ກີບ ພ້ອມເງິນສົດ 500.000 ກີບ, ຮອງຊະນະເລີດ ຈະໄດ້ຮັບເງິນສົດ 300.000 ກີບ, ອັນດັບທີ 3 ຈະໄດ້ຮັບຂັນ ມູນຄ່າ 400.000 ກີບ ພ້ອມເງິນສົດ 200,000 ກີບ ສ່ວນທີ 4 ໄດ້ຮັບພຽງລາງວັນຊົມເຊີຍ.
ຂ່າວໂດຍ: ສົງການ ພັນແພງດີ
