ຂ່າວຕ່າງປະເທດລາຍງານ ໃນວັນທີ 17 ກໍລະກົດ ຜ່ານມາ, ກະຊວງການຄ້າ ອຸດສາຫະກຳ ແລະ ພະລັງງານ ຂອງ ສ ເກົາຫຼີ ໄດ້ເປີດເຜີຍບົດລາຍງານ ຈຳນວນການສົ່ງອອກຍານພາຫະນະເພີ່ມຂຶ້ນສູງທີ່ສຸດເປັນປະຫວັດສາດໃນໄລຍະ 6 ເດືອນທຳອິດຂອງປີ 2023 ໂດຍມີປັດໄຈມາຈາກຄວາມຕ້ອງການຍານພາຫະນະທີ່ເປັນມິດຕໍ່ສິ່ງແວດລ້ອມ.
ການສົ່ງອອກຍານພາຫະນະເພີ່ມຈາກປີ 2022 ຜ່ານມາ 46,6% ຢູ່ທີ່ 3,57 ໝື່ນລ້ານໂດລາ ໃນເດືອນມັງກອນ-ມິຖຸນາ ຊຶ່ງສູງກວ່າລະດັບສູງທີ່ສຸດກ່ອນໜ້ານີ້ໃນໄລຍະ 6 ເດືອນທຳອິດຂອງປີ 2014 ຢູ່ທີ່ 2,52 ໝື່ນລ້ານໂດລາ ເນື່ອງຈາກຄວາມຕ້ອງການຍານພາຫະນະໄຟຟ້າທົ່ວໂລກເພີ່ມຂຶ້ນຢ່າງຕໍ່ເນື່ອງ. ສ ເກົາຫຼີ ສົ່ງອອກຍານພາຫະນະຈຳນວນ 1.423.017 ຄັນ ເພີ່ມຈາກປີຜ່ານມາ 32,6% ໂດຍມູນຄ່າການສົ່ງອອກຍານພາຫະນະທີ່ເປັນມິດຕໍ່ສິ່ງແວດລ້ອມເພີ່ມຂຶ້ນ 70,4% ຢູ່ທີ່ 1,24 ໝື່ນລ້ານໂດລາ ຂະນະທີ່ຈຳນວນຍານພາຫະນະດັ່ງກ່າວທີ່ສົ່ງອອກເພີ່ມຂຶ້ນ 51,5% ຢູ່ໃນລະດັບ 384.681 ຄັນ.
ຈຳນວນຍານພາຫະນະທີ່ຜະລິດໃນໂຮງງານທ້ອງຖິ່ນເພີ່ມຈາກປີຜ່ານມາ 23,5% ຢູ່ທີ່ 2.197.687 ຄັນ ໂດຍສູງກວ່າ 2 ລ້ານຄັນໃນຮອບ 4 ປີ ນັບຕັ້ງແຕ່ປີ 2019 ສ່ວນຈຳນວນຍານພາ ຫະນະທີ່ຈຳໜ່າຍໃນ ສ ເກົາຫຼີ ຊຶ່ງລວມເຖິງຍານພາຫະນະທີ່ຜະລິດໃນປະເທດ ແລະ ຍານພາຫະນະນຳເຂົ້າຢູ່ທີ່ 893.737 ຄັນ ເພີ່ມຈາກປີຜ່ານມາ 107%.
