ໃນວັນທີ 18 ກໍລະກົດ ນີ້ ທີ່ຫ້ອງປະຊຸມພະແນກແຮງງານ ແລະ ສະຫວັດດີການ-ສັງຄົມ (ຮສສ)ແຂວງ ໄດ້ຈັດກອງປະຊຸມການຕິດຕາມ, ຊຸກຍູ້ວຽກງານຄຸ້ມຄອງ ແລະ ການນໍາໃຊ້ແຮງງານ ເປັນກຽດເຂົ້າຮ່ວມມີ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ, ມີທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຄະນະພະແນກ ຮສສ ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ທ່ານ ໜູເກນ ພັນລັກ ຫົວໜ້າພະແນກ ຮສສ ແຂວງ ກ່າວວ່າ: ໃນໄລຍະຜ່ານມາໄດ້ຝຶກອົບຮົມການນໍາໃຊ້ເຄື່ອງມືຂຶ້ນທະບຽນແຮງງານລາວ ແລະ ແຮງງານຕ່າງປະເທດຢູ່ພາຍໃນແຂວງ ຕາມວາລະແຫ່ງຊາດໃຫ້ແກ່ຂະແໜງການທີ່ກ່ຽວຂ້ອງຂັ້ນເມືອງ, ພາຍຫຼັງໄດ້ຮັບການຝຶກອົບຮົມຫ້ອງການ ຮສສ ເມືອງ ກໍໄດ້ຂຶ້ນແຜນໃນການຂຶ້ນທະບຽນແຮງງານຢູ່ບັນດາຫົວໜ່ວຍແຮງງານພາຍໃນເມືອງຂອງຕົນ ຊຶ່ງໃນໄລຍະທີ 1 ມີ 38 ຫົວໜ່ວຍ, ຂຶ້ນທະບຽນຕົວຈິງໄດ້ 18 ຫົວໜ່ວຍ, ມີແຮງງານທີ່ໄດ້ຂຶ້ນທະບຽນທັງໝົດ 323 ຄົນ ຍິງ 96 ຄົນ; ໃນນີ້ແຮງງານລາວ 287 ຄົນ ຍິງ 86 ຄົນ, ແຮງງານຕ່າງປະເທດ 36 ຄົນ ຍິງ 10 ຄົນ. ສຳລັບແຜນສືບຕໍ່ຂຶ້ນທະບຽນແຮງງານໄລຍະທີ 2 ມີ 20 ຫົວໜ່ວຍ. ປັດຈຸບັນໃນທົ່ວແຂວງມີຫົວໜ່ວຍແຮງງານທັງໝົດ 712 ແຫ່ງ, ມີແຮງງານທັງໝົດ 11.982 ຄົນ.
ໃນນັ້ນມີແຮງງານລາວ 10.009 ຄົນ ແລະ ແຮງງານຕ່າງປະເທດ 1.973 ຄົນ. ການຄຸ້ມຄອງແຮງງານແມ່ນໄດ້ປະສານສົມທົບກັບພາກສ່ວນກ່ຽວຂ້ອງລົງກວດກາແຮງງານລາວ ແລະ ແຮງງານຕ່າງປະເທດໃນຫົວໜ່ວຍແຮງງານໄດ້ຈໍານວນ 166 ແຫ່ງ, ມີແຮງງານທີ່ໄດ້ຮັບການກວດກາທັງໝົດ 4.190 ຄົນ; ໃນນີ້ມີແຮງງານຕ່າງປະເທດ 731 ຄົນ, ໄກ່ເກ່ຍຂໍ້ຂັດແຍ່ງແຮງງານຈໍານວນ 2 ກໍລະນີ, ສ້າງຕັ້ງໜ່ວຍງານຄວາມປອດໄພ ແລະ ສຸຂະພາບແຮງງານໃນຫົວ ໜ່ວຍແຮງງານໄດ້ 11 ແຫ່ງ, ຊຸກຍູ້ຫົວໜ່ວຍແຮງງານສ້າງກົດລະບຽບພາຍໃນ ແລະ ເຮັດສັນຍາແຮງງານໄດ້ 36 ແຫ່ງ. ສິ່ງທີ່ພົ້ນເດັ່ນແມ່ນໄດ້ປະຕິບັດຕາມຄໍາສັ່ງແນະນໍາຂອງລັດຖະມົນຕີກະຊວງ ຮສສ ວ່າດ້ວຍການຂຶ້ນທະບຽນແຮງງານລາວ ແລະ ແຮງງານຕ່າງປະເທດ ຕາມວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ ຊຶ່ງສໍາເລັດການຝຶກອົບຮົມການຂຶ້ນທະບຽນແຮງງານຜ່ານລະບົບແອບພີເຄຊັ່ນ LMI ທີ່ເຊື່ອມຕໍ່ກັບລະບົບ TAXRIS ຂອງສ່ວຍສາອາກອນໃຫ້ຫ້ອງການ ຮສສ ເມືອງ 11 ເມືອງ ແລະ ບັນດາຫົວໜ່ວຍແຮງງານເປົ້າໝາຍໃນທົ່ວແຂວງ ຊຶ່ງເປົ້າໝາຍໃນໄລຍະທີ 1 ຈະຂຶ້ນທະບຽນໃຫ້ໄດ້ 72 ຫົວໜ່ວຍ. ຈາກນັ້ນບັນດາຜູ້ເຂົ້າຮ່ວມກອງປະຊຸມຍັງໄດ້ພ້ອມກັນປະກອບຄໍາຄິດຄໍາເຫັນ ເພື່ອເຮັດໃຫ້ ການຕິດຕາມ, ຊຸກຍູ້ວຽກງານຄຸ້ມຄອງ ແລະ ການນໍາໃຊ້ແຮງງານຂອງແຂວງໄຊຍະບູລີໄດ້ຮັບການແກ້ໄຂໃນຕໍ່ ໜ້າ.
ຂ່າວ-ພາບ: ມະໄລວັນ
