ຂ່າວສານຊີອາໄອລາຍງານ ເມື່ອບໍ່ດົນມານີ້, ອົງການອຸຕຸນິຍົມເອີຣົບ ແລະ ອາເມຣິກາ ໄດ້ລາຍງານວ່າ: ທະເລຫຼາຍແຫ່ງຢູ່ໃນໂລກໄດ້ເກີດປະກົດການຄື້ນຄວາມຮ້ອນ. ນັກວິທະຍາສາດເຕືອນວ່າ ອຸນຫະພູມທາງທະເລສູງຂຶ້ນຢ່າງຕໍ່ເນື່ອງ ຊຶ່ງບໍ່ພຽງແຕ່ຈະສົ່ງຜົນກະທົບເຖິງດິນຟ້າອາກາດໃນທົ່ວໂລກເທົ່ານັ້ນ ແຕ່ຍັງອາດຈະພາໃຫ້ລະບົບນິເວດທາງທະເລຖືກທຳລາຍອີກດ້ວຍ.
ອົງການບໍລິການດ້ານການປ່ຽນແປງຂອງດິນຟ້າອາກາດໂກເປີນິກ (Kopernik) ຊຶ່ງເປັນອົງການຕິດຕາມວັດແທກດິນຟ້າອາກາດຂອງສະຫະພາບເອີຣົບໄດ້ກ່າວຢືນຢັນໃນທ້າຍອາທິດຜ່ານມາວ່າ: ອຸນຫະພູມຢູ່ມະຫາສະໝຸດອັດລັງຕິກເໜືອ ແລະ ທະເລເມດີເຕຣາເນ ໃນຫຼາຍເດືອນຜ່ານມາໄດ້ສ້າງສະຖິຕິສູງສຸດ ໂດຍສະເພາະແມ່ນອຸນຫະພູມຢູ່ໜ້ານ້ຳທະເລພາກໃຕ້ແອັສປາຍ ແລະ ທະເລຢູ່ແຄມຝັ່ງອາຟຣິກາເໜືອ ສູງຂຶ້ນປະມານ 5 ອົງສາ ເມື່ອທຽບໃສ່ຂໍ້ມູນອ້າງອີງໃນໄລຍະດຽວກັນ ຊຶ່ງສະແດງໃຫ້ເຫັນວ່າ: ຄື້ນຄວາມຮ້ອນຂອງທະເລກຳລັງຮຸນແຮງຂຶ້ນຢ່າງບໍ່ຢຸດຢັ້ງ. ນອກຈາກນີ້, ອີງຕາມບົດລາຍງານຂອງອົງການຄຸ້ມຄອງທະເລ ແລະ ອາກາດແຫ່ງຊາດອາເມຣິກາ ທີ່ເຜີຍແຜ່ໃນກາງເດືອນມິຖຸນາຜ່ານມາໃຫ້ຮູ້ວ່າ: ອຸນຫະພູມນ້ຳທະເລໃນທົ່ວໂລກກຳລັງເພີ່ມຂຶ້ນ, ອຸນຫະພູມນ້ຳທະເລຫຼາຍແຫ່ງໄດ້ລື່ນກາຍລະດັບສະເລ່ຍ ໂດຍຄາດວ່າເມື່ອຮອດເດືອນຕຸລາປີນີ້, ທະເລເຄິ່ງໜຶ່ງຢູ່ໃນໂລກອາດຈະເກີດປະກົດການຄື້ນຄວາມຮ້ອນ.
