ໃນວັນທີ 18 ກໍລະກົດ 2023, ທີ່ ກະຊວງການຕ່າງປະເທດ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ນາງ ທອງ ສຸຄຸນເທຍຣີ (THONG Sokuntheary) ເອກອັກຄະຣາຊະທູດ ວິສາມັນຜູ້ມີອໍານາດເຕັມ ແຫ່ງ ຣາຊະອານາຈັກ ກຳປູເຈຍ ປະຈໍາ ສປປ ລາວ, ໃນໂອກາດທີ່ໄດ້ສໍາເລັດການປະຕິບັດໜ້າທີ່ການທູດຢູ່ ສປປ ລາວ ຕະຫລອດໄລຍະ 3 ປີ. ພ້ອມນີ້, ກໍໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫລຽນກາມິດຕະພາບ ໃຫ້ແກ່ທ່ານທູດ ເພື່ອເປັນການຊົມເຊີຍ ແລະ ສັນລະເສີນ ຕໍ່ຜົນງານໃນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຣາຊະອານາຈັກ ກຳປູເຈຍ ຢ່າງມີປະສິດທິຜົນ.
ໂອກາດນີ້, ທ່ານ ຮອງນາຍົກລັດຖະມົນຕີ ສະເຫລີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນງານຂອງ ທ່ານເອກອັກຄະຣາຊະທູດກຳປູເຈຍ ຕະຫລອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ນັບແຕ່ວັນທີ 2 ຕຸລາ 2020 ເປັນຕົ້ນມາ, ທີ່ໄດ້ປະກອບສ່ວນຢ່າງຫ້າວຫັນໃນການເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກຳປູເຈຍ ກໍຄື ການເປັນຄູ່ຮ່ວມມືຍຸດທະສາດຮອບດ້ານ ແລະ ຫມັ້ນຄົງຍາວນານ ໃຫ້ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ. ທ່ານທູດ ໄດ້ປະກອບສ່ວນຊຸກຍູ້ການເຂົ້າຮ່ວມກອງປະຊຸມຕ່າງໆ ແລະ ການແລກປ່ຽນການຢ້ຽມຢາມຄະນະຜູ້ແທນຂັ້ນສູງພັກ ແລະ ລັດ ຖະບານ ຂອງສອງປະເທດ ຢ່າງເປັນປົກກະຕິ, ຊຸກຍູ້ການຮ່ວມມື ລະຫວ່າງ ກະຊວງທີ່ກ່ຽວຂ້ອງຂອງສອງປະເທດ ໃຫ້ຂະຫຍາຍຕົວເຂົ້າສູ່ລວງເລິກ ແລະ ສາມາດລົງນາມເອກະສານສຳຄັນຮ່ວມກັນໃນຫລາຍສະບັບ ເປັນຕົ້ນ ດ້ານພະລັງງານ, ດ້ານວັດທະນະທຳ ແລະ ທ່ອງທ່ຽວ, ດ້ານການສຶກສາ, ດ້ານການເງິນ ແລະ ທະນະຄານ. ປັດຈຸບັນ, ການຮ່ວມມືດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງ ສອງປະເທດ ແມ່ນມີທ່ວງທ່າທີ່ດີຂຶ້ນ, ການລົງທຶນຂອງກໍາປູເຈຍ ຢູ່ ສປປ ລາວ ມີມູນຄ່າທັງໝົດ 127 ລ້ານໂດລາສະຫະລັດ. ໃນນັ້ນ, ໂຄງການໃຫຍ່ທີ່ສຸດແມ່ນ ໂຄງການພັດທະນາແຫລ່ງທ່ອງທ່ຽວຄົບວົງຈອນ ແລະ ກາຊີໂນແດນສະຫວັນ ມີມູນຄ່າການລົງທຶນສູງເຖິງ 110 ລ້ານໂດລາສະຫະລັດ; ສະເພາະປີຜ່ານມາ ມູນຄ່າການຄ້າສອງຝ່າຍ ມີຫລາຍກວ່າ 106 ລ້ານໂດລາສະຫະລັດ, ໃນນັ້ນ ການຊື້-ຂາຍ ໄຟຟ້າກວມປະມານ 100 ລ້ານໂດລາສະຫະລັດ ຕໍ່ປີ. ພິເສດ, ທ່ານທູດ ໄດ້ປະກອບສ່ວນຢ່າງແຂງແຮງໃນການຊຸກຍູ້ການລົງນາມໃນແຜນປະຕິບັດງານຮ່ວມ ວ່າດ້ວຍການຮ່ວມມືສອງຝ່າຍ ລາວ-ກໍາປູເຈຍ ແຕ່ປີ 2023-2027 ແລະ ສົນທິສັນຍາວ່າດ້ວຍ ການກໍານົດຊາຍແດນປະເທດ ລະຫວ່າງ ສອງລັດຖະບານ ລາວ ແລະ ກຳປູເຈຍ; ປະກອບສ່ວນຂົນຂວາຍເອົາການຊ່ວຍເຫລືອດ້ານມະນຸດສະ ທຳແກ່ ສປປ ລາວ ໃນການຕ້ານພະຍາດໂຄວິດ-19 ເປັນຕົ້ນ ການສະໜອງວັກຊິນ Sinovac, ອຸ ປະກອນການແພດ ແລະ ອື່ນໆ ເຊິ່ງໄດ້ປະກອບສ່ວນສຳຄັນເຂົ້າໃນວຽກງານສາທາລະນະສຸກຂອງລາວ ກໍຄື ການຮັບມືກັບພະຍາດດັ່ງກ່າວ ໃນໄລຍະທີ່ມີການແພ່ລະບາດໜັກຢູ່ ສປປ ລາວ. ພ້ອມກັນນີ້, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນ ກຳປູເຈຍ ທີ່ໄດ້ໃຫ້ການຊ່ວຍເຫລືອ ແລະ ການສະໜັບສະໜູນ ສປປ ລາວ ໃນດ້ານຕ່າງໆຕະຫລອດໄລຍະຜ່ານມາ ເຊິ່ງໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ເປັນແຕ່ລະໄລຍະ.
ໃນຂະນະດຽວກັນ, ທ່ານທູດ ກໍໄດ້ສະແດງຄວາມຂອບໃຈເປັນຢ່າງສູງຕໍ່ ພັກ-ລັດຖະບານ ແລະ ປະຊາຊົນລາວ ກໍຄື ກະຊວງການຕ່າງປະເທດ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫລືອ ແລະ ອໍານວຍຄວາມສະດວກເປັນຢ່າງດີ ຕະຫລອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ຈົນໄດ້ຮັບຜົນສໍາເລັດອັນຈົບງາມ, ພ້ອມທັງ ໄດ້ສະແດງຄວາມປິຕິຍິນດີ ແລະ ຂອບໃຈຕໍ່ລັດຖະບານ ແຫ່ງ ສປປ ລາວ ທີ່ໄດ້ໃຫ້ການຍ້ອງຍໍຊົມເຊີຍຜົນງານ ແລະ ປະດັບຫລຽນກາມິດຕະພາບ ອັນມີຄວາມໝາຍສໍາຄັນນີ້ ໃຫ້ແກ່ຕົນ, ເຊິ່ງເປັນສັນຍາລັກອັນມີຄວາມໝາຍຄວາມສໍາຄັນໃນການຊຸກຍູ້ສົ່ງເສີມການພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ກຳປູເຈຍ ແລະ ສປປ ລາວ ໃຫ້ໄດ້ຮັບການພັດທະນາຍິ່ງໆຂຶ້ນໃນຕໍ່ໜ້າ. ພ້ອມນີ້, ກໍຢືນຢັນວ່າ ພາຍຫລັງທີ່ກັບຄືນປະເທດ ແລະ ໄປຮັບໜ້າທີ່ໃໝ່ແລ້ວ, ທ່ານທູດເອງ ກໍຈະສືບຕໍ່ເຄື່ອນໄຫວຊຸກຍູ້ສົ່ງເສີມການພົວພັນຮ່ວມມື ລະຫວ່າງ ສອງປະເທດ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ ເພື່ອນຳເອົາຜົນປະໂຫຍດສູງສຸດ ມາສູ່ປະຊາຊົນສອງຊາດ ລາວ-ກຳປູເຈຍ.
ຂ່າວ:ວຽງສະຫວັນ
ພາບ:ເກດສະໜາ
