ຕາມຂ່າວຈາກວິທະຍຸສາກົນຫວຽດນາມ ເມື່ອບໍ່ດົນມານີ້ ທ່ານ Kemi Badenoch ລັດຖະມົນຕີກະຊວງທຸລະກິດ ແລະ ການຄ້າອັງກິດ ໄດ້ລົງນາມຂໍ້ຕົກລົງເຂົ້າຮ່ວມສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP) ຢ່າງເປັນທາງການຢູ່ນູແວນເຊລັງ ຊຶ່ງເຂົ້າຮ່ວມການລົງນາມໃນສັນຍາດັ່ງກ່າວລວມມີ: ທ່ານ ຫງວຽນ ຮົ່ງຢຽນ, ລັດຖະມົນຕີກະຊວງ ອຸດສາຫະກຳການຄ້າຫວຽດນາມ, ທ່ານ Damien O’Connor, ລັດຖະມົນຕີການຄ້ານູແວນເຊລັງ, ທ່ານ Mary Ng, ລັດຖະມົນຕີການຄ້າການາດາ, ທ່ານ Goto Shigeyuki, ລັດຖະມົນຕີການຟື້ນຟູເສດຖະກິດຍີ່ປຸ່ນ ແລະ ທ່ານ Tim Ayres, ຮອງລັດຖະມົນຕີການຄ້າອົດສະຕຣາລີ. ສຳລັບ CPTPP ໝາຍຄວາມວ່າ ກວ່າ 99% ປະລິມານສິນຄ້າສົ່ງອອກຂອງອັງກິດ ສົ່ງໄປຍັງບັນດາປະເທດ CPTPP ໃນປະຈຸບັນຈະຖືກເສຍພາສີດ້ວຍລະດັບ 0%, ສັນຍາດັ່ງກ່າວສ້າງກາລະໂອກາດໃໝ່ໃຫ້ບັນດາວິສາຫະກິດອັງກິດປະກອບສ່ວນຊຸກຍູ້ການເຕີບໂຕດ້ານການຄ້າ ລະຫວ່າງອັງກິດ ກັບບັນດາປະເທດສະມາຊິກ; ລວມທັງ ສສ ຫວຽດນາມ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
