ຫ້ອງການສຶກສາທິການ ແລະ ກິລາເມືອງ (ສກມ) ສີສັດຕະນາກ ນະຄອນຫຼວງວຽງຈັນ ຈັດພິທີສະຫຼຸບການຈັດຕັ້ງປະຕິບັດການສອບເສັງຈົບຊັ້ນປະຖົມສຶກສາ ປີທີ 5 (ປ.5) ແລະ ມັດທະຍົມສຶກສາຕອນຕົ້ນ (ມ.4) ປະຈຳສົກຮຽນ 2022-2023. ຂະນະທີ່ ນາງ ພອນພິມົນ ວົງອ່ອນຈັນ ແລະ ນາງ ສີຣິມະນີ ໄຊຍະເວດ ນັກຮຽນຈາກໂຮງຮຽນມັດທະຍົມສຶກສາສົມບູນ ວິຣະຖາວອນ ໄດ້ຮັບໃບປະກາດແດງ ໃນສົກຮຽນດັ່ງກ່າວ.
ພິທີສະຫຼຸບການຈັດຕັ້ງປະຕິບັດການສອບເສັງດັ່ງກ່າວ, ໄດ້ມີຂຶ້ນເມື່ອບໍ່ດົນມານີ້ ທີ່ສະໂມສອນຂອງເມືອງສີສັດຕະນາກ ໂດຍໃຫ້ກຽດເຂົ້າຮ່ວມຂອງທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ປອ ທິນນະກອນ ທອງຄຳ ຮອງເຈົ້າເມືອງສີສັດຕະນາກ ແລະ ທ່ານ ຄຳສິງ ດວງດາລາ ຫົວໜ້າຫ້ອງການສຶກສາທິການ ແລະ ກິລາ ເມືອງສີສັດຕະນາກ ພ້ອມດ້ວຍບັນດາຄະນະອຳນວຍການ, ພະນັກງານ, ຄູອາຈານ ແລະ ພໍ່ແມ່ຜູ້ປົກຄອງ ຕະຫຼອດຮອດນ້ອງນັກຮຽນຢ່າງພ້ອມພຽງ.
ທ່ານ ນາງ ເສົາວະລີ ຈິນດາວົງ ຮອງຫົວໜ້າ ສກມ ສີສັດຕະນາກ ໄດ້ຜ່ານບົດສະຫຼຸບການຈັດຕັ້ງປະຕິບັດການສອບເສັງຈົບຊັ້ນປະຖົມສຶກສາ (ປ.5) ແລະ ມັດທະຍົມສຶກສາຕອນຕົ້ນ (ມ.4) ປະຈຳສົກຮຽນ 2022-2023 ໃຫ້ຮູ້ວ່າ: ທົ່ວເມືອງສີສັດຕະນາກ ມີໂຮງຮຽນປະຖົມ ແລະ ມັດທະຍົມທັງພາກລັດ ແລະ ເອກະຊົນ ທັງໝົດ 54 ແຫ່ງ (ພາກລັດມີ 22 ແຫ່ງ ແລະ ເອກະຊົນ 32 ແຫ່ງ) ສະເພາະຊັ້ນປະຖົມສຶກສາມີນັກຮຽນທັງໝົດ 1.116 ຄົນ, ຍິງ 540 ຄົນ (ພາກລັດມີ 423 ຄົນ, ຍິງ 204 ຄົນ ແລະ ເອກະຊົນມີ 693 ຄົນ, ຍິງ 336 ຄົນ). ສ່ວນຊັ້ນມັດທະຍົມສຶກສາມີ 740 ຄົນ, ຍິງ 361 ຄົນ (ພາກລັດມີ 335 ຄົນ, ຍິງ 166 ຄົນ ແລະ ເອກະຊົນມີ 405 ຄົນ, ຍິງ 195 ຄົນ).
ການດຳເນີນການສອບເສັງ ແມ່ນໄດ້ຈັດຕັ້ງການສອບເສັງຈົບຊັ້ນປະຖົມສຶກສາ ໃນລະຫວ່າງວັນທີ 39-30 ພຶດສະພາ 2023 ມີທັງໝົດ 6 ສູນສອບເສັງ ຊຶ່ງສອບເສັງ 4 ວິຊາ ປະກອບມີ ພາສາລາວ-ວັນະຄະດີ, ຄະນິດສາດ, ວິທະສາດ ແລະ ສິ່ງແວວລ້ອມ. ສ່ວນຊັ້ນມັດທະຍົມສຶກສາ ດຳເນີນລະຫວ່າງວັນທີ 14-16 ມິຖຸນາ 2023 ມີທັງມົດ 2 ສູນ ສອບເສັງໃນ 6 ວິຊາ ຄື: ພາສາລາວ-ວັນະຄະດີ, ຄະນິດສາດ, ວິທະສາດທຳມະຊາດ, ວິທະຍາສາດສັງຄົມ, ສຶກສາພົນລະເມືອງ ແລະ ພາສາອັງກິດ.
ຜົນການສອງເສັງຈົບຊັ້ນປະຖົມສຶກສາ ສະເພາະນັກຮຽນທີ່ສອບເສັງໄດ້ຄະແນນສົມບູນ (ໝາຍເຖິງນັກຮຽນທີ່ໄດ້ຄະແນນ 5 ຂຶ້ນໄປ) ມີ 1.115 ຄົນ, ຍິງ 440 ຄົນ ເທົ່າກັບ 77,51% ແລະ ນັກຮຽນທີ່ສອບເສັງໄດ້ທັງໝົດ (ໝາຍເຖິງນັກຮຽນທີ່ສາມາດສອບເສັງຈົບຊັ້ນປະຖົມສຶກສາ ປີທີ 5) ມີ 865 ຄົນ, ຍິງ 540 ຄົນ ເທົ່າກັບ 99,91%. ສ່ວນຜົນການສອບເສັງຈົບຊັ້ນມັດທະຍົມຕອນຕົ້ນ ຈຳນວນນັກສອບເສັງ 740 ຄົນ, ຍິງ 361 ຄົນ ນັກຮຽນທີ່ເສັງໄດ້ຄະແນນສົມບູນ 60-69,9% ໃນນັ້ນ ນາງ ພອນພິມົນ ວົງອ່ອນຈັນ ແລະ ນາງ ສີຣິມະນີ ໄຊຍະເວດ ນັກຮຽນຈາກໂຮງຮຽນມັດທະຍົມສຶກສາສົມບູນ ວິຣະຖາວອນ ໄດ້ຮັບໃບປະກາດແດງ ໃນສົກຮຽນດັ່ງກ່າວ. ສ່ວນໂຮງຮຽນທີ່ມີນັກຮຽນສອບເສັງໄດ້ຄະແນນສົມບູນ 30-59,9% ມີໂຮງຮຽນ 6 ແຫ່ງ ໃນນີ້ ພາກລັດ 1 ແຫ່ງ, ໂຮງຮຽນທີ່ມີນັກສອບເສັງໄດ້ຄະແນນສົມບູນ 10-29,9% ມີ 6 ແຫ່ງ ໃນນີ້ ພາກລັດ 2 ແຫ່ງ, ໂຮງຮຽນທີ່ມີນັກສອບເສັງໄດ້ຄະແນນສົມບູນ 3-9,9% ມີ 4 ແຫ່ງ ໃນນີ້ ພາກລັດ 3 ແຫ່ງ ແລະ ໂຮງຮຽນທີ່ມີນັກສອບເສັງໄດ້ຄະແນນ 7 ຂຶ້ນໄປ ມີ 13 ແຫ່ງ ໃນນີ້ ພາກລັດ 3 ແຫ່ງ.
ນອກຈາກນີ້, ໃນພິທີຍັງໄດ້ມອບໃບຍ້ອງຍໍຜົນງານການເຄື່ອນໄຫວຈັດຕັ້ງປະຕິບັດການຮຽນການສອນດີເດັ່ນແຕ່ລະປະເພດໃຫ້ແກ່ບັນດາໂຮງຮຽນ ທັງໂຮງຮຽນປະຖົມສຶກສາ ແລະ ມັດທະຍົມສຶກສາ, ມອບໃບຍ້ອງຍໍຜົນງານການຮຽນການສອນໃຫ້ແກ່ບຸກຄົນດີເດັ່ນ ກໍຄື ຄູອາຈານ ແລະ ນ້ອງນັກຮຽນຈາກບັນດາໂຮງຮຽນພາຍໃນເມືອງດັ່ງກ່າວອີກດ້ວຍ.
ໂດຍ ສົງການ ພັນແພງດີ
