ພະແນກສຶກສາທິການ ແລະ ກິລາ ແຂວງ ຫຼື ສກຂ ຜົ້ງສາລີ ໄດ້ຈັດພິທີສະເຫຼີມສະຫຼອງວັນສ້າງຕັ້ງກິລາ-ກາຍະກຳແຫ່ງຊາດ ຄົບຄອບ 57 ປີ (13 ກໍລະກົດ 1966-13 ກໍລະກົດ 2023) ໃນວັນທີ 13 ກໍລະກົດ 2023 ທີ່ພະແນກສຶກສາທິການ ແລະ ກິລາແຂວງ ໂດຍໃຫ້ກຽດເຂົ້າຮ່ວມ ທ່ານ ພອນໄຊ ອ່ອນສາ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະພະແນກ, ຄະນະຫ້ອງການສຶກສາທິການ ແລະ ກິລາເມືອງບຸນເໜືອ, ຫົວໜ້າ-ຮອງຫົວໜ້າຂະແໜງ, ຫົວໜ້າ-ຮອງຫົວໜ້າສູນ ຕະຫຼອດຮອດພະນັກງານວິຊາການ 10 ຂະແໜງ, 2 ສູນ, ໂຮງຮຽນອ້ອມຂ້າງທີ່ຂຶ້ນກັບພະແນກສຶກສາ ແລະ ກິລາແຂວງ ຢ່າງຟົດຟື້ນ.
ໃນພິທີ, ທ່ານ ຊາຍຄໍາ ຍືນສົມບັດ ຮອງຫົວໜ້າພະແນກສຶກສາທິການ ແລະ ກິລາແຂວງ ໄດ້ກ່າວວ່າ: ກິລາ-ກາຍະກຳ ແມ່ນວຽກງານໜຶ່ງທີ່ໄດ້ກຳນົດຢູ່ໃນແຜນຍຸດທະສາດການພັດທະນາຊັບພະຍາກອນມະນຸດ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ທີ່ລັດຖະບານໄດ້ກຳນົດໃນແຕ່ລະປີ ເພື່ອເປັນການສົ່ງເສີມໃຫ້ມວນຊົນທຸກເພດ-ທຸກໄວເຂົ້າຮ່ວມຫັດກາຍຍະບໍລິຫານ, ການອອກກຳລັງກາຍ, ຫຼິ້ນກິລາ ແລະ ເຂົ້າຮ່ວມສ້າງຂະບວນການເຄື່ອນໄຫວຈັດກິດຈະກໍາຈັດການແຂ່ງຂັນກິລາ, ສະເຫຼີມສະຫຼອງວັນສຳຄັນຕ່າງໆແມ່ນໜ້າທີ່ຂອງທົ່ວປວງຊົນ ເພື່ອເຮັດໃຫ້ພົນລະເມືອງລາວມີສຸຂະພາບເຂັ້ມແຂງທາງດ້ານຮ່າງກາຍ ແລະ ຈິດໃຈ, ປຸກຈິດສຳນຶກມີນ້ຳໃຈນັກກິລາທີ່ຜ່ອງໃສ, ສ້າງສະຕິຊາດ, ຮັກສາມຸນເຊື້ອ, ສິລະປະ-ວັດທະນະທໍາອັນດີງາມຂອງທ້ອງຖິ່ນ-ຂອງຊາດ ໄປພ້ອມໆກັນກັບການສ້າງຂະບວນການດ້ານຕ່າງໆ ໃຫ້ເຕັມໄປດ້ວຍບັນຍາກາດຟົດຟື້ນ ແລະ ຂະບວນກວ້າງຂວາງໃຫ້ສົມກັບຄໍາຂວັນທີ່ວ່າ: “ ກິລາພັດທະນາຄົນ, ຄົນພັດທະນາຊາດ, ປະເທດຊາດ ຮຸ່ງເຮືອງສີວິໄລ, ກິລາເພື່ອສຸຂະພາບ ມິດຕະພາບ ແລະ ການຮ່ວມມື”.
ຈາກນັ້ນ, ຄະນະຮັບຜິດຊອບໄດ້ນໍາພາພະນັກງານລັດຖະກອນ ແຕ່ລະພາກສ່ວນທີ່ເຂົ້າຮ່ວມລົງຫັດກາຍະບໍລິຫານເຕັມໄປດ້ວຍບັນຍາກາດເບີກບານມ່ວນຊື່ນ ພ້ອມທັງຈັດການແຂ່ງຂັນກິລາຢ່າງເປັນຂະບວນຟົດຟື້ນ.
ຂ່າວໂດຍ: ຄໍາວອນ (ສກຂ ຜົ້ງສາລີ )
