ແຂວງບໍລິຄໍາໄຊ ໄດ້ຈັດກອງປະຊຸມຜູ້ບໍລິຫານການສຶກສາ ແລະ ກິລາທົ່ວແຂວງ ໃນລະຫວ່າງວັນທີ 11-13 ກໍລະກົດ 2023 ທີ່ສະໂມສອນໃຫຍ່ຂອງເມືອງໄຊຈໍາພອນ ພາຍໃຕ້ການເປັນປະທານຂອງທ່ານ ລົມ ແພງສຸກ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ໂດຍໃຫ້ກຽດເຂົາຮ່ວມຂອງທ່ານ ຄໍາແຫວນ ປັນຍານຸວົງ ຄະນະປະຈໍາພັກແຂວງ ຮອງເຈົ້າແຂວງບໍລິຄໍາໄຊ, ທ່ານ ໂກ ໄຊສົມບັດ ເຈົ້າເມືອງໄຊຈໍາພອນ, ພ້ອມດ້ວຍຮອງເຈົ້າເມືອງ 6 ຕົວເມືອງ, ຄະນະພະແນກ, ຫົວໜ້າຫ້ອງການສຶກສາທິການ ແລະ ກິລາ 7 ຕົວເມືອງ, ຫົວໜ້າ 10 ຂະແໜງ, ຜູ້ອໍານວຍການໂຮງຮຽນ, ສູນ ທີ່ຂຶ້ນກັບພະແນກສຶກສາທິການ ແລະ ກິລາແຂວງ ຕະຫຼອດຮອດແຂກທີ່ຖືກເຊີນ ແລະ ຄະນະຮັບຜິດຊອບກອງປະຊຸມຢ່າງພ້ອມພຽງ.
ໃນກອງປະຊຸມໄດ້ຮັບຟັງຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປະຈໍາສົກຮຽນ 2022-2023 ໃນຈໍານວນ 15 ຄາດໝາຍຫຼັກທີ່ກໍານົດໄວ້ໃນແຜນປີຜ່ານມາ ໃນນີ້ ມີ 9 ຄາດໝາຍທີ່ສາມາດບັນລຸໄດ້ຕາມແຜນ, 5 ຄາດໝາຍທີ່ມີຄວາມກ້າວໜ້າແຕ່ບໍ່ສາມາດບັນລຸ ແລະ 1 ຄາດໝາຍທີ່ບໍ່ມີຄວາມກ້າວໜ້າ ແລະ ທົດຖອຍ. ນອກຈາກນັ້ນ, ຍັງມີບັນຫາ ແລະ ສິ່ງທ້າທາຍຫຼາຍຢ່າງຕໍ່ຂະແໜງການສຶກສາ ແລະ ກິລາ ເປັນຕົ້ນແມ່ນຄູສອນບໍ່ພຽງພໍກັບແຜນຂະຫຍາຍ, ໄດ້ຮັບຕົວເລກຕົວເລກລັດຖະກອນຄູໜ້ອຍ, ບາງບ້ານມີຫ້ອງຮຽນ, ມີນັກຮຽນແຕ່ບໍ່ມີຄູສອນ, ຫ້ອງຮຽນ (ຫ້ອງກຽມ) ທີ່ຈັດການຮຽນການສອນມາກ່ອນຖືກຫຍຸບ ໂດຍສະເພາະ ເມືອງປາກຊັນ 2 ຫ້ອງ ແລະ ຄໍາເກີດ 11 ຫ້ອງ, ຫ້ອງຮຽນລ້ຽງເດັກແອອັດ (ບ້ານບໍ່ ແລະ ບ້ານຜາໄດ ເມືອງບໍລິຄັນ), ຄວາມເປັນເຈົ້າການຂອງຄູສອນ, ການຈັດສະພາບແວດລ້ອມຫ້ອງຮຽນ, ໂຮງຮຽນຍັງບໍ່ທັນອຳນວຍຄວາມສະດວກໃຫ້ແກ່ການຮຽນການສອນ, ເຄື່ອງຫຼິ້ນຕ່າງໆໃນ ແລະ ນອກຫ້ອງຮຽນມີບໍ່ພຽງພໍຕາມຄວາມຕ້ອງການ, ຄວາມຮັບຜິດຊອບຂອງຜູ້ອຳນວຍການຈຳນວນໜຶ່ງຍັງບໍ່ທັນເຂັ້ມງວດເທົ່າທີ່ຄວນ ແລະ ຂາດຄວາມເປັນເຈົ້າການໃນການບໍລິຫານຄຸ້ມຄອງໂຮງຮຽນ ໂດຍສະເພາະ 7 ໜ້າວຽກ, ການປະສານສົມທົບຂອງຜູ້ບໍລິຫານໂຮງຮຽນກັບອໍານາດການປົກຄອງ, ຄະນະພັດທະນາການສຶກສາຂັ້ນບ້ານ ເພື່ອປຸກລະດົມ, ຊຸກຍູ້ ສົ່ງເສີມລູກຫຼານຂອງຕົນໃຫ້ໄດ້ເຂົ້າຮຽນຕາມເກນອາຍຸ ແລະ ສືບຕໍ່ຮຽນໃຫ້ຈົບທຸກຊັ້ນທຸກສາຍຍັງບໍ່ທັນຕໍ່ເນື່ອງ, ຜູ້ປົກຄອງນັກຮຽນຈໍານວນໜຶ່ງຍັງທຸກຍາກ, ຍັງບໍ່ທັນເຂົ້າໃຈຕໍ່ແນວທາງນະໂຍບາຍດ້ານການສຶກສາ, ການສົ່ງລູກຫຼານຂອງຕົນເຂົ້າຮຽນຍັງບໍ່ທັນໄດ້ດີ, ບາງຄອບຄົວໄດ້ເອົາລູກໄປອອກແຮງງານນໍາພໍ່ແມ່, ໄປທໍາການຜະລິດ ແລະ ຊອກຫາວຽກເຮັດງານທໍາເພື່ອຫາລ້ຽງຊີບ. ນອກຈາກນັ້ນ, ຍັງມີຈໍານວນໜຶ່ງໄດ້ອອກໂຮງຮຽນ ເພື່ອໄປສ້າງຄອບຄົວ, ການສັບຊ້ອນນັກຮຽນໄປຮຽນພາຍໃນ ແລະ ຕ່າງປະເທດ ມີນັກຮຽນຈຳນວນໜຶ່ງບໍ່ໄປຕາມການສັບຊ້ອນ ແລະ ມີນັກຮຽນຈໍານວນໜຶ່ງໄປຮຽນແລ້ວຂໍກັບມາຮຽນຢູ່ ສປປ ລາວ ຄືນ.
ພ້ອມກັນນີ້, ຜູ້ແທນກອງປະຊຸມ ແລະ ແຂກທີ່ເຂົ້າຮ່ວມ ຍັງໄດ້ພ້ອມກັນປະກອບຄວາມຄິດເຫັນຕໍ່ການຈັດຕັ້ງປະຕິບັດ 15 ຄາດໝາຍຂອງຂະແໜງການສຶກສາ ແລະ ກິລາ ພ້ອມກັນວາງທິດທາງແຜນການໃນສົກຮຽນ 2023-2024 ຄື: ອັດຕາເຂົ້າຮຽນຂອງເດັກ 5 ປີ ໃນຊັ້ນການສຶກສາກ່ອນໄວຮຽນສະເລ່ຍໃນທົ່ວແຂວງໃຫ້ບັນລຸສູງກວ່າ 88,6%, ອັດຕານັກຮຽນເຂົ້າໃໝ່ສຸດທິ ປ.1 ໃຫ້ກ້າວເຂົ້າຫາ 100%), ອັດຕາເຂົ້າຮຽນໃໝ່ລວມ ປ.5 ໃຫ້ກ້າວເຂົ້າຫາ 100%, ອັດຕາປະລະການຮຽນຂອງນັກຮຽນ ປ.1 ໃຫ້ຫຼຸດລົງຕໍ່າກວ່າ 2,4%, ອັດຕາເລື່ອນຂັ້ນ-ຈົບຊັ້ນປະຖົມໃຫ້ບັນລຸສູງກວ່າ 94,8%, ອັດຕາການເລື່ອນຊັ້ນປະຖົມ ຂຶ້ນຊັ້ນມັດທະຍົມຕອນຕົ້ນ ໃຫ້ບັນລຸສູງກວ່າ 92,7%, ດັດສະນີຄວາມສະເໝີພາບຍິງ-ຊາຍ ອັດຕາການເລື່ອນຊັ້ນປະຖົມ ຂຶ້ນຊັ້ນມັດທະຍົມຕອນຕົ້ນ ໃຫ້ບັນລຸໄດ້ລະຫວ່າງ 1,07-1,10, ອັດຕາປະລະຂອງນັກຮຽນຊັ້ນປະຖົມ ໃຫ້ຫຼຸດລົງຕໍ່າກວ່າ 1,9%, ອັດຕາເຂົ້າຮຽນໃໝ່ລວມ ມ.4 ບໍ່ໃຫ້ຫຼຸດ 65,2%.
ນອກຈາກນີ້, ກອງປະຊຸມຍັງໄດ້ຮັບກຽດຕ້ອນຮັບທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ຊຶ່ງໃນໂອກາດດັ່ງກ່າວ ທ່ານໄດ້ຮັບຟັງການລາຍງານຂໍ້ສະດວກ, ສິ່ງທ້າທາຍ ແລະ ຂໍ້ສະເໜີຂອງທ້ອງຖິ່ນ, ພ້ອມທັງໄດ້ໂອ້ລົມ ແລະ ມອບອຸປະກອນການສຶກສາ ແລະ ກິລາ ຈຳນວນໜຶ່ງ, ມອບເງິນຈຳນວນ 10.000.000 ກີບ ໃຫ້ແກ່ຫ້ອງການສຶກສາທິການ ແລະ ກິລາເມືອງໄຊຈຳພອນ ຊຶ່ງເປັນການສະໜັນສະໜູນຈາກທຶນສົມທົບຂອງອົງການຈັດຕັ້ງມະຫາຊົນ ກະຊວງສຶກສາທິການ ແລະ ກິລາ. ພ້ອມກັນນັ້ນ, ທ່ານຍັງໄດ້ລົງຢ້ຽມຢາມໂຮງຮຽນ ມສ ນ້ຳອ້ອນ, ໂຮງຮຽນປະຖົມ ວັງບານ ແລະ ໂຮງຮຽນປະຖົມ ໂພນຄຳ ເພື່ອຮັບຟັງສະພາບ ແລະ ບັນຫາການຈັດການຮຽນການສອນ ແລະ ຊຸກຍູ້ໃຫ້ກໍາລັງໃຈຜູ້ບໍລິຫານການສຶກສາ ແລະ ກິລາ ອີກດ້ວຍ.
ໂດຍ: ສີສຸພັນ ສີສົມພອນ (ສກຂ ບໍລິຄໍາໄຊ)
