ອົງຄະນະພັກກະຊວງການເງິນ ໄດ້ຈັດກອງປະຊຸມຄົບຄະນະບໍລິຫານງານພັກ ກາງສະໄໝທີ III ຂອງຕົນ ຂຶ້ນໃນລະຫວ່າງ ວັນທີ 13-15 ກໍລະກົດ ນີ້ ທີ່ກະຊວງດັ່ງກ່າວ, ໂດຍການເປັນກຽດເຂົ້າຮ່ວມ ຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ແລະ ໂດຍການເປັນປະທານຂອງ ສະຫາຍ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງການເງິນ, ມີບັນດາສະຫາຍ ຄະນະປະຈໍາພັກ, ກໍາມະການຄະນະບໍລິຫານງານພັກ, ມີບັນດາສະຫາຍເລຂາຄະນະພັກຮາກຖານ, ເລຂາໜ່ວຍພັກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ສັນຕິພາບ ພົມວິຫານ ກ່າວວ່າ: ກອງປະຊຸມໃນຄັ້ງນີ້, ສຸດທີ່ມີຄວາມໝາຍສຳຄັນເພື່ອສຳຫຼວດກວດກາ, ຕີລາຄາຄວາມຮັບຜິດຊອບລວມ ຂອງຮາກຖານພັກແຕ່ລະຂັ້ນ ກໍຄືຄວາມຮັບຜິດຊອບຂອງສະຫາຍຄະນະພັກ ໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ກະຊວງການເງິນ, ໂດຍມີການວິເຄາະໄຈ້ແຍກຢ່າງເລິກເຊິ່ງ, ການເຄື່ອນໄຫວນໍາພາຕົວຈິງ ເພື່ອໃຫ້ເຫັນອັນດີ-ຜົນງານ, ອັນອ່ອນ-ຄົງຄ້າງ ຂອງຄະນະພັກ ແລະ ບຸກຄົນ ໃນໄລຍະ 2 ປີ ທີ່ຜ່ານມາ ທັງເປັນບ່ອນອີງພື້ນຖານໃຫ້ແກ່ການປັບປຸງແກ້ໄຂ ໃນຊຸມປີທ້າຍສະໄໝ ເພື່ອສືບຕໍ່ກໍ່ສ້າງພັກໃຫ້ໜັກແໜ້ນທາງດ້ານການເມືອງ, ເອກະພາບທາງດ້ານແນວຄິດ, ເຂັ້ມແຂງທາງດ້ານການຈັດຕັ້ງ ແລະ ມີແບບແຜນນຳພາ-ວິທີເຮັດວຽກ ທີ່ຖືກຕ້ອງ ແລະ ເຂັ້ມງວດ. ພ້ອມກັນນັ້ນ, ຍັງແນໃສ່ກະຕຸ້ນໃຫ້ການຈັດຕັ້ງພັກ, ບຸກຄົນຄະນະພັກ ຍົກສູງຄວາມຮັບຜິດຊອບ ໃນການຈັດຕັ້ງປະຕິບັດໜ້າທີ່ການເມືອງ, ປຸກລະດົມຂະບວນການສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານຕາມຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ ຕິດພັນກັບການຍົກສູງຄວາມສາມາດໃນການນຳພາ, ຄວາມເປັນແບບຢ່າງນຳໜ້າ, ຄວາມສາມັກ ຄີເປັນເອກະພາບ, ຄວາມເປັນເຈົ້າການຕັ້ງໜ້າບຸກບືນເຮັດແທ້ທຳຈິງ ແລະ ຍົກສູງຄວາມຮັບຜິດຊອບຂອງຄະນະພັກ ໃນການຄົ້ນຄວ້າ ແລະ ແກ້ໄຂບັນຫາຕ່າງໆ ຕິດພັນກັບຂະແໜງການເງິນ.
ຫຼັງຈາກນັ້ນ, ຄະນະບໍລິຫານງານພັກ ຮອງຫົວໜ້າຄະນະຈັດຕັ້ງສູນກາງພັກ ຄະນະຮັບຜິດຊອບຈາກຄະນະຈັດຕັ້ງສູນກາງພັກ ໄດ້້້ຂຶ້ນຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ, ຜ່ານມາດຕະຖານຄະນະບໍລິຫານງານພັກກະຊວງ, ສິດ ແລະ ໜ້າທີ່ຂອງຄະນະບໍລິຫານງານພັກກະຊວງ ແລະ ຂໍ້ຫ້າມສຳລັບສະມາຊິກພັກ, ກອງປະຊຸມໃນຄັ້ງນີ້, ຍັງໄດ້ດຳເນີນການທາບທາມຄວາມໄວວາງໃຈຕໍ່ການນຳພາລວມ ແລະ ບຸກຄົນ ຄະນະບໍລິຫານງານພັກ, ຜ່ານບົດສະຫຼຸບຕີລາຄາການນໍາພາ-ຊີ້ນໍາວຽກງານຮອບດ້ານໃນການຈັດຕັ້ງປະຕິບັດກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການເງິນ ກາງສະໄໝ (2021-2023) ແລະ ທິດທາງແຜນການ ທ້າຍສະໄໝ (2023-2025), ບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາຂະແໜງການເງິນແຫ່ງລັດ 5 ປີ (2021-2025) ກາງສະໄໝ ແລະ ທິດທາງແຜນການ ຮອດປີ 2025 ແລະ ເອກະສານກ່ຽວຂ້ອງສຳຄັນອີກຈຳນວນໜຶ່ງ.
ໃນໂອກາດນີ້, ສະຫາຍ ບຸນທອງ ຈິດມະນີ ໄດ້ມີຄຳເຫັນວ່າ: ການຈັດໃຫ້ມີການທາບທາມ ແລະ ປະກອບຄຳເຫັນ ຕໍ່ຄະນະພັກຄັ້ງນີ້, ແມ່ນເປັນການເປີດກວ້າງປະຊາທິປະໄຕພາຍໃນພັກ ໂດຍສະເພາະແມ່ນພາຍໃນພະນັກງານຫຼັກແຫຼ່ງ ຂອງອົງຄະນະພັກກະຊວງການເງິນ ເພື່ອໃຫ້ປະກອບຄຳເຫັນ ຕໍ່ຄວາມຮັບຜິດຊອບລວມ ກໍຄືຄວາມຮັບຜິດຊອບຕໍ່ໜ້າທີ່ການເມືອງຂອງແຕ່ລະສະຫາຍໃນຄະນະພັກ, ແນໃສ່ປັບປຸງ ຄະນະພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ມີຄວາມເປັນເອກະພາບສູງ ເພື່ອສືບຕໍ່ເປັນຫຼັກແຫຼ່ງນຳພາປະຕິບັດມະຕິກອງປະຊຸມໃຫຍ່ຂອງພັກ ກໍຄືກອງປະຊຸມໃຫຍ່ ຂອງອົງຄະນະພັກໃຫ້ບັນລຸຕາມລະດັບຄາດໝາຍທີ່ວາງໄວ້.
(ຂ່າວ-ພາບ: ວັນເພັງ)
