ໃນໄລຍະ 5 ເດືອນຕົ້ນປີ 2023 ນີ້, ກະຊວງການເງິນ ສາມາດຈັດເກັບລາຍຮັບໄດ້ ທັງໝົດ 15.155 ຕື້ກີບ, ເທົ່າກັບ 39% ຂອງແຜນປີ; ໃນຂະນະທີ່ໝົດປີ 2023 ແຜນລາຍຮັບທັງໝົດ 38.448 ຕື້ກີບ, ເທົ່າກັບ 16,42% ຂອງ GDP. ໃນນັ້ນ, ລາຍຮັບພາຍໃນ 34.898 ຕື້ກີບ, ລາຍຮັບຈາກການຊ່ວຍເຫລືອຫລ້າ 3.550 ຕື້ກີບ. ສ່ວນ ແຜນລາຍຈ່າຍທັງໝົດ 43.498 ຕື້ກີບ ເທົ່າກັບ 18,58% ຂອງ GDP; ແຜນຂາດດຸນ 5.050 ຕື້ກີບ, ເທົ່າກັບ 2,16% ຂອງ GDP.
ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ລາຍງານໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 26 ມິຖຸນາ 2023 ນີ້ວ່າ: ໃນໄລຍະ 5 ເດືອນຕົ້ນປີນີ້, ກະຊວງການເງິນ ສາມາດຈັດເກັບລາຍຮັບ ໄດ້ທັງໝົດ 15.155 ຕື້ກີບ, ໃນນັ້ນ, ລາຍຮັບພາຍໃນ 14.848 ຕື້ກີບ, ລາຍຮັບທ້ອງຖິ່ນ ປະຕິບັດໄດ້ 4.545 ຕື້ກີບ ແລະ ລາຍຮັບຈາກການຊ່ວຍເຫລືອລ້າ ປະຕິບັດໄດ້ 307 ຕື້ກີບ, ຄາດວ່າການຈັດ້ກັບລາຍຮັບ 6 ເດືອນຕົ້ນປີ ຈະສາມາດປະຕິບັດໄດ້ປະມານ 18.424 ຕື້ກີບ ຫລື ເທົ່າກັບ 48% ຂອງແຜນການປີ ສະເພາະລາຍຮັບພາຍໃນ ຄາດວ່າຈະໄດ້ 17.963 ຕື້ກີບ ເທົ່າກັບ 50% ຂອງແຜນການປີ.
ການຈັດຕັ້ງປະຕິບັດລາຍຮັບ ທຽບໃສ່ໄລຍະດຽວກັນຂອງປີຜ່ານມາ ເຫັນວ່າ ເພີ່ມຂຶ້ນ 42% ເນື່ອງຈາກ ການຫັນຄຸ້ມຄອງເກັບລາຍຮັບຜ່ານລະບົບທັນສະໄໝ ຕິດພັນກັບການອັດຊ່ອງວາງການຮົ່ວໄຫລ ຂອງລາຍຮັບງົບປະມານ, ໃນນັ້ນ, ຂັ້ນທ້ອງຖິ່ນ ກໍເຫັນວ່າມີທ່າອ່ຽງເພີ່ມຂຶ້ນເຊັ່ນດຽວກັນ ທຽບໃສ່ໄລຍະດຽວກັນຂອງປີຜ່ານມາ, ມີ 7 ແຂວງ ສາມາດເກັບລາຍຮັບໄດ້ ເກີນ 50% ແຕ່ຍັງມີບາງແຂວງ ເກັບລາຍຮັບໄດ້ຕ່ຳບໍ່ເກີນ 30% ຂອງແຜນການປີ. ສໍາລັບ ຜົນກະທົບຂອງອັດຕາແລກປ່ຽນຕໍ່ກັບການເກັບລາຍຮັບ, ເຖິງແມ່ນວ່າການເກັບລາຍຮັບເປັນສະກຸນເງິນຕາຕ່າງປະເທດ ເພີ່ມຂຶ້ນກໍຕາມ ປະມານ 130% ເມື່ອທຽບໃສ່ປີຜ່ານມາ ເປັນເງິນປະມານ 100 ລ້ານໂດລາ, ແຕ່ກວມເອົາສັດສ່ວນພຽງເລັກໜ້ອຍ ຂອງລາຍຮັບທີ່ສາມາດເກັບໄດ້ຕົວຈິງ ປະມານ 214 ຕື້ກີບ ຫລື ກວມເອົາ 0,6% ຂອງລາຍຮັບພາຍໃນ.
ທ່ານ ລັດຖະມົນຕີກະຊວງການເງິນ ກ່າວຕື່ມວ່າ: ສຳ ລັບ ດ້ານລາຍຈ່າຍ ສາມາດປະຕິບັດໄດ້ 10.905 ຕື້ກີບ, ເທົ່າກັບ 25% ຂອງແຜນການປີ, ໃນນັ້ນ, ຂັ້ນສູນກາງປະຕິ ບັດໄດ້ 7.721 ຕື້ກີບ, ເທົ່າກັບ 23% ຂອງແຜນການປີ ແລະ ຂັ້ນທ້ອງຖິ່ນປະຕິບັດໄດ້ 3.184 ຕື້ກີບ, ເທົ່າກັບ 39% ຂອງແຜນການປີ. ລາຍຈ່າຍທັງຫມົດ ໄດ້ສຸມໃສ່ການເບີກຈ່າຍເງິນເດືອນ ແລະ ເງິນນະໂຍບາຍ ເປັນບຸລິມະສິດ ຊຶ່ງສຳເລັດການເບີກຈ່າຍ ເດືອນມິຖຸນາ ຢູ່ຂັ້ນສູນກາງ, ສ່ວນຂັ້ນທ້ອງຖິ່ນ ແມ່ນສຳເລັດເປັນສ່ວນໃຫ່ຍ ແລະ ພວມສືບຕໍ່ເບີກຈ່າຍໃຫ້ສຳເລັດ. ພ້ອມນັ້ນ, ກໍໄດ້ສຸມໃສ່ຊຳລະໜີ້ສິນພາຍໃນ ແລະ ຕ່າງປະເທດ ຕາມຂໍ້ຜູກພັນສັນຍາ ແລະ ຮັບປະກັນລາຍຈ່າຍບໍລິຫານຂອງ ພັກ-ລັດ ທີ່ຈຳເປັນ.
ສ່ວນລາຍຈ່າຍເງິນໂຄງການລົງທຶນຂອງລັດ ກະຊວງການເງິນ ໄດ້ມີກົນໄກ ໃຫ້ບັນດາກະຊວງ, ອົງການ ແລະ ທ້ອງ ຖິ່ນ ທີ່ໄດ້ຮັບແຜນລົງທຶນແລ້ວ ສາມາດເບີກຈ່າຍໄດ້ 45% ຂອງແຜນການປີ, ພ້ອມນັ້ນ ກໍໄດ້ມີກົນໄກການຈັດຕັ້ງປະຕິ ບັດເງິນເກີນແຜນ ປີ 2022 ໃຫ້ແຂວງສາມາດນຳໃຊ້ 80% ເພື່ອກະຕຸ້ນເສດຖະກິດ ແຕ່ຫົວທີ ຊຶ່ງໄດ້ເລີ່ມຈັດຕັ້ງປະຕິບັດແຕ່ເດືອນ ພຶດສະພາ 2023 ເປັນຕົ້ນມາ. ພ້ອມດຽວກັນນັ້ນ, ກະຊວງການເງິນ ຍັງສາມມາດລະດົມແຫລ່ງທຶນ ເພື່ອມາດຸ່ນດ່ຽງງົບປະມານ ພາຍໃນ ແລະ ຕ່າງປະ ເທດ ໄດ້ 6.170 ຕື້ກີບ, ເທົ່າກັບ 15% ຂອງແຜນການປີ; ໃນນີ້, ອອກພັນທະບັດພາຍໃນ 840 ຕື້ກີບ, ເທົ່າກັບ 8% ຂອງແຜນການປີ ແລະ ກູ້ຢືມເປັນໂຄງການຈາກຕ່າງປະ ເທດ 5.330 ຕື້ກີບ, ເທົ່າກັບ 18% ຂອງແຜນການປີ.
ຂ່າວ: ທະນູທອງ ພາບ: ອ່າຍຄຳ
