ກົມສື່ມວນຊົນ, ຄະນະເລຂາທິການສະພາແຫ່ງຊາດ ຈັດສໍາມະນາກ່ຽວກັບການຈັດລາຍການສົນທະນາ ແລະ ວຽກງານສື່ອອນລາຍຂອງສະພາແຫ່ງຊາດ ໃນລະຫວ່າງວັນທີ 17-18 ມິຖຸນາ 2023 ເພື່ອສ້າງຄວາມເຂັ້ມແຂງໃຫ້ແກ່ບຸກຄະລາກອນຂອງກົມສື່ມວນຊົນ ທາງດ້ານເຕັກນິກ ແລະ ເນື້ອໃນວຽກງານສື່ມວນຊົນ ເປັນຕົ້ນວຽກງານການຂຽນຂ່າວ, ບົດ ແລະ ການຕັດຕໍ່ວິດີໂອເຂົ້າໃນລາຍການໂທລະພາບ ແລະ ສື່ອອນລາຍ; ບຳລຸງຍົກລະດັບຄວາມຮູ້, ຄວາມສາມາດ, ປະສົບການ, ຄວາມເຂົ້າໃຈດ້ານວຽກງານສື່ມວນຊົນ ແລະ ເພື່ອຮັບປະກັນຄຸນນະພາບທາງດ້ານຂໍ້ມູນ-ຂ່າວສານຂອງສະພາແຫ່ງຊາດ ໃຫ້ມີປະສິດທິພາບ ແລະ ປະສິດທິຜົນ ສາມາດຕອບສະໜອງໄດ້ໜ້າທີ່ວຽກງານຂອງສະພາແຫ່ງຊາດ ແລະ ເພື່ອເປັນການສຳມະນາບົດຮຽນດ້ານເຕັກນິກ, ແລກປ່ຽນທາງດ້ານວຽກງານການຂຽນຂ່າວ-ບົດ ແລະ ວິທີການແກ້ໄຂບັນຫາຕ່າງໆ ໃນການປະຕິບັດວຽກງານສື່ມວນຊົນໃນຕົວຈິງ.
ຊຸດອົບຮົມຄັ້ງນີ້, ຈັດຂຶ້ນໂດຍການເປັນປະທານຂອງ ທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ, ມີທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ, ຜູ້ຊີ້ນໍາວຽກງານຂອງກົມສື່ມວນຊົນ, ມີຄະ ນະທີ່ປຶກສາວຽກງານສື່ມວນຊົນ ຂອງສະພາແຫ່ງຊາດ, ວິທະຍາກອນ, ຄະນະກົມ ພ້ອມດ້ວຍນັກສໍາມະນາກອນພາຍໃນກົມສື່ມວນຊົນ ແລະ ສະພາປະຊາຊົນແຂວງວຽງຈັນ ເຂົ້າຮ່ວມ.
ໂອກາດນີ້, ຜູ້ເຂົ້າຮ່ວມໄດ້ຮັບຟັງການສະເໜີຫົວຂໍ້ການຂຽນຂ່າວ, ບົດ, ການຈັດເນື້ອໃນລາຍການຂ່າວ ເພື່ອຜະລິດເປັນລາຍການໂທລະພາບ ແລະ ສື່ອອນລາຍ; ວິທີສໍາພາດ, ເປັນພິທີກອນຂ່າວ ແລະ ພິທີກອນລາຍການໂທລະພາບຕ່າງໆ; ການຖ່າຍທໍາ ແລະ ຕັດຕໍ່ລາຍການໂທລະພາບ ແລະ ສື່ອອນລາຍ. ຈາກນັ້ນ, ຜູ້ເຂົ້າຮ່ວມທັງໝົດ ໄດ້ຈັດແບ່ງກຸ່ມເຮັດບົດຝຶກຫັດຕົວຈິງ ແລະ ກວດແກ້, ສົນທະນາແລກປ່ຽນບົດຮຽນ ເຊິ່ງກັນ ແລະ ກັນ.
ຂ່າວ-ພາບ: ສພຊ
