ວິທະຍຸສາກົນແຫ່ງປະເທດຈີນ (CRI) ໄດ້ລາຍງານວ່າ: ທ່ານ ສີຈົ້ງຊຸ່ນ ພໍ່ຂອງທ່ານປະທານ ສີຈິ້ນຜິງ ເຄີຍສັ່ງສອນທ່ານ ສີຈິ້ນຜິງ ວ່າ: “ບໍ່ວ່າລູກມີຕຳແໜ່ງສູງປານໃດກໍຕາມ, ຢ່າລືມ ຕ້ອງຮັບໃຊ້ປະຊາຊົນຢ່າງດຸໝັ່ນ, ຄິດເຖິງຜົນປະໂຫຍດຂອງປະຊາຊົນຢ່າງແທ້ຈິງ, ຕ້ອງພົວພັນກັບປະຊາຊົນ ແລະ ຢູ່ໃກ້ຊິດກັບປະຊາຊົນ.”
ທ່ານ ສີຈົ້ງຊຸ່ນ ພໍ່ຂອງທ່ານປະທານ ສີຈິ້ນຜິງ ມີບົດບາດຢ່າງຫລວງຫລາຍຕໍ່ການເຕີບໃຫຍ່, ຈິດໃຈ ແລະການປະພຶດຂອງທ່ານ ສີຈິ້ນຜິງ ເຊິ່ງໄດ້ສ່ອງແສງໃຫ້ເຫັນໃນຈົດໝາຍສະບັບໜຶ່ງທີ່ລູກຝາກໃຫ້ພໍ່. ຄືໃນປີ 2001, ເມື່ອຮອດວັນເກີດຄົບຮອບ 88 ປີຂອງທ່ານ ສີຈົ້ງຊຸ່ນ, ທຸກຄົນໃນຄອບຄົວໄດ້ເຕົ້າໂຮມກັນ ເຫລືອແຕ່ທ່ານ ສີຈິ້ນຜິງ ທີ່ເປັນເຈົ້າແຂວງ ແຂວງຟູຈ້ຽນ ບໍ່ໄດ້ເມືອບ້ານຍ້ອນຄາວຽກ, ຈຶ່ງໄດ້ຂຽນຈົດໝາຍອວຍພອນວັນເກີດໄປຍັງພໍ່. ໃນຈົດໝາຍສະບັບນີ້ຂຽນວ່າ: ຕົນເອງເຄົາລົບນັບຖືນິດໄສທີ່ຊື່ສັດຈິງໃຈ ແລະ ຈົງຮັກພັກດີຂອງພໍ່, ຕັດສິນໃຈຮຽນນຳຄຸນສົມບັດຂອງພໍ່; ເຄົາລົບພໍ່ທີ່ໄດ້ສ້າງຄຸນງາມຄວາມດີເພື່ອພັກ ແລະ ປະຊາຊົນ, ແຕ່ບໍ່ເຄີຍຖືຕົວ ຫລື ອວດອົ່ງຈັກເທື່ອ, ຖືຜົນງານທີ່ຍິ່ງໃຫຍ່ສະຫງ່າງາມຂອງຕົນເປັນປຸຍເມກທີ່ຜ່ານພົ້ນໄປ, ເຄົາລົບພໍ່ທີ່ມີແສງໄຟຮຸ່ງເຮືອງຢູ່ໃນໃຈສະເໝີ ແລະຍຶດໝັ້ນທິດທາງກ້າວໜ້າທີ່ຖືກຕ້ອງຢ່າງສະເໝີຕົ້ນສະເໝີປາຍ. ພໍ່ເໝືອນກັບວິລະບຸລຸດທີ່ດຸໝັ່ນ, ຊື່ສັດ, ປະກອບສ່ວນເຂົ້າໃນພາລະກິອຂອງປະຊາຊົນຈີນຢ່າງມິດງຽບ.
ທ່ານ ສີຈິ້ນຜິງ ຮູ້ສຶກພາກພູມໃຈຕໍ່ການກະທຳຂອງພໍ່ ຈຶ່ງໄດ້ສືບທອດຄຸນທາດທີ່ສູງສົ່ງ ແລະລໍ້າຄ່າຫລາຍຢ່າງຈາກພໍ່. ຮ່ວມຈິດຮ່ວມໃຈກັບປະຊາຊົນ ຈາກພູພຽງດິນເຫລືອງຈົນຮອດສຳນັກງານສູນກາງພັກ, ໃນຫລາຍສິບປີຜ່ານມາ, ທ່ານ ສີຈິ້ນຜິງ ໄດ້ລົງຮາກຖານຍ່າງເຂົ້າໄປເຮືອນເພື່ອຢ້ຽມຢາມປະຊາຊົນ, ຖາມກ່ຽວກັບຊີວິດປະຈຳວັນຂອງປະຊາຊົນ ເຊິ່ງເຮັດໃຫ້ຄົນເຫັນແລ້ວປະທັບໃຈຫລາຍ. ທ່ານ ສີຈິ້ນຜິງ ເຮັດຄືທີ່ພໍ່ໄດ້ກ່າວໄວ້ວ່າ: “ພະນັກງານການນຳ ແລະ ປະຊາຊົນສະເໝີພາບກັນ, ບໍ່ມີອັນທີ່ວ່າສູງສົ່ງ ຫລື ຕໍ່າຕ້ອຍ, ຕ້ອງຢູ່ທ່າມກາງປະຊາຊົນສະເໝີ.”
ທ່ານ ສີຈິ້ນຜິງ ໄດ້ສືບທອດແບບແຜນຂອງພໍ່. ໂດຍທ່ານກ່າວວ່າ: “ສະມາຊິກພັກ ແລະພະນັກງານທຸກຄົນ, ມີແຕ່ຄວາມຮັບຜິດຊອບ ແລະ ພັນທະທີ່ຮັບໃຊ້ປະຊາຊົນເທົ່ານັ້ນ, ບໍ່ມີສິດເປັນເຈົ້ານາຍອາດຍາ.”
ໃຫ້ຄວາມສຳຄັນກັບການສຳຫລວດຄົ້ນຄວ້າ ທ່ານ ສີຈົ້ງຊຸ່ນ ພໍ່ຂອງທ່ານ ສີຈິ້ນຜິງ ໃຫ້ຄວາມສຳຄັນຢ່າງສູງຕໍ່ການສຳຫລວດຄົ້ນຄວ້າຢ່າງສະເໝີຕົ້ນສະເໝີປາຍ, ເຂົ້າຫາປະຊາຊົນ, ລົງເລິກເພື່ອເກັບກຳສະພາບຄວາມເປັນຈິງ, ຕິດແທດກັບປະຊາຊົນເພື່ອຊອກຫາວິທີແກ້ໄຂທີ່ເໝາະສົມທີ່ສຸດ ຕົວຈິງທີ່ສຸດ ແລະ ຖືກຕ້ອງທີ່ສຸດ. ວິທີການເຮັດວຽກແບບນີ້,ໄດ້ສົ່ງອິດທິພົນໃຫ້ແກ່ ທ່ານ ສີຈິ້ນຜິງ ຢ່າງເລິກເຊິ່ງເຊັ່ນກັນ.
ນັບແຕ່ກອງປະຊຸມໃຫຍ່ຂອງພັກກອມມູນິດຈີນ ຄັ້ງທີ 18 ເປັນຕົ້ນມາ, ທ່ານ ສີຈິ້ນຜິງ ໄດ້ໄປສຳຫລວດກວດກາວຽກງານຢູ່ຂັ້ນຮາກຖານ, ໄປຢ້ຽມຢາມປະຊາຊົນຜູ້ທຸກຍາກຢູ່ເຂດພູດອຍ, ເດີນທາງໄປເຂດດິນດຳເພື່ອກວດເບິ່ງສະພາບການຜະລິດສະບຽງອາຫານ, ກວດເບິ່ງສະພາບການຜະລິດຢູ່ໂຮງຈັກໂຮງງານ ແລະອື່ນໆອີກ. ທ່ານ ສີຈິ້ນຜິງ ໄດ້ໃຊ້ການກະທຳຕົວຈິງ ຊຸກຍູ້ການສ້າງບັນຍາກາດໃຫ້ທົ່ວພັກດຳເນີນການສຳຫລວດຄົ້ນຄວ້າຕົວຈິງ.
ການປະຢັດມັດທະຍັດ ກໍແມ່ນຄຸນສົມບັດອັນສຳຄັນຢ່າງໜຶ່ງທີ່ທ່ານ ສີຈິ້ນຜິງ ຮຽນເອົາແບບຢ່າງຂອງພໍ່.
ທ່ານ ສີຈົ້ງຊຸ່ນ ດຳລົງຊີວິດປະຢັດມັດທະຍັດຢ່າງເຄັ່ງຄັດ ແລະມີຄວາມເຂັ້ມງວດຫລາຍໃນການສອນລູກ. ໃນເວລາກິນເຂົ້າ, ຖ້າມີເມັດເຂົ້າຕົກຢູ່ໜ້າໂຕະ, ທ່ານ ສີຈົ້ງຊຸ່ນ ກໍຈະຈັບຂຶ້ນມາກິນໂດຍບໍ່ໃຫ້ຕົກເຮ່ຍແມ່ນແຕ່ໜ້ອຍດຽວ.
ພາຍໃຕ້ການສັ່ງສອນຂອງພໍ່, ທ່ານ ສີຈິ້ນຜິງ ໄດ້ສ້າງຄວາມຊິນເຄີຍໃນການປະຢັດມັດທະຍັດມາຕັ້ງແຕ່ຍາມນ້ອຍ. ທ່ານປະທານ ສີຈິ້ນຜິງ ກ່າວວ່າ: “ປະຢັດ ແລະ ລຽບງ່າຍ, ສະກັດກັ້ນການສິ້ນເປືອງຟຸມເຟືອຍ ນີ້ແມ່ນມໍລະດົກທີ່ສືບທອດກັນມາໃນທຸກເຊັ່ນຄົນຂອງພັກເຮົາ. ປັດຈຸບັນ, ເງື່ອນໄຂການດຳລົງຊີວິດຂອງພວກເຮົາດີຂຶ້ນຫລາຍແລ້ວ, ແຕ່ຈິດໃຈສູ້ຊົນຢ່າງທໍລະຫົດອົດທົນບໍ່ໃຫ້ລົດລະແມ່ນແຕ່ໜ້ອຍດຽວ, ຕ້ອງຍຶດໝັ້ນການສ້າງຄຸນສົມບັດໃຫ້ກັບຕົນເອງ ແລະສ້າງພາລະກິດດ້ວຍການປະຢັດມັດທະຍັດ, ຍຶດໝັ້ນການເຮັດວຽກທຸກຢ່າງດ້ວຍຄວາມດຸໝັ່ນ ແລະ ປະຢັດມັດທະຍັດ.”
ແບບຢ່າງທີ່ີດີ ມີບົດບາດທີ່ສຳຄັນຢ່າງຍິ່ງ. ຄວາມເວົ້າ ແລະການປະພຶດຂອງພໍ່, ໄດ້ສອນທ່ານ ສີຈິ້ນຜິງ ວ່າ: ຄວນເຮັດແນວໃດຈຶ່ງຈະສາມາດກາຍເປັນຄົນທີ່ບໍລິສຸດ ແລະສ້າງປະໂຫຍດໃຫ້ແກ່ປະຊາຊົນໄດ້. ແນວທາງປະຊາຊົນເຊັ່ນ: ການສຳຫລວດຄົ້ນຄວ້າ ແລະການປະຢັດມັດທະຍັດ, ມໍລະດົກທີ່ສືບທອດກັນມາທຸກເຊັ່ນຄົນຢູ່ໃນພັກໃຫຍ່ທີ່ມີປະຫວັດສາດເປັນຮ້ອຍປີນີ້, ກໍແມ່ນຄຸນສົມບັດທີ່ລໍ້າຄ່າທີ່ໄດ້ສືບທອດ ແລະ ເສີມຂະຫຍາຍເລື້ອຍມາລະຫວ່າງທ່ານ ສີຈົ້ງຊຸ່ນ ແລະທ່ານ ສີຈິ້ນຜິງ ທີ່ເປັນຊາວພັກກອມມູນິດຈີນສອງເຊັ່ນຄົນ.
