ວັນທີ 18 ມິຖຸນາ ທີ່ຈະໝູນວຽນມາຮອດອີກວາລະໜຶ່ງນີ້ ແມ່ນເປັນວັນຄົບຮອບ 58 ປີ ວັນແພດລາວ ນອກຈາກເປັນວັນສ້າງຂະບວນການກິດຈະກຳຕ່າງໆ ເພື່ອລະນຶກເຖິງຜົນງານ ແລະ ຍ້ອງຍໍສັນລະເສີນຄຸນງາມ ຄວາມດີຂອງແພດລາວໃນແຕ່ລະໄລຍະ ກໍຍັງເປັນວັນທີ່ປູກຈິດສໍານຶກໃຫ້ແພດ-ໝໍ, ພະຍາບານ ໃຫ້ຕັ້ງໜ້າອອກແຮງຝຶກຝົນຫຼໍ່ຫຼອມສ້າງຕົນເອງໃຫ້ມີຄຸນສົມບັດສິນທໍາປະຕິວັັດ, ຈັນຍາທໍາວິຊາຊີບ ແລະ ຄວາມຊໍານານງານດ້ານວິຊາສະເພາະ ເພື່ອກາຍເປັນແພດແຫ່ງຊາດ ແລະ ແພດປະຊາຊົນ ຢ່າງສົມກຽດສັກສີ ແລະ ເປັນນັກຮົບເສື້ອຂາວປະຕິວັດຂອງພັກ.
ໃນນັ້ນ, ຂະແໜງສາທາລະນະສຸກ ແຂວງສະຫວັນນະເຂດ, ກໍເປັນພາກສ່ວນໜຶ່ງທີ່ເຫັນໄດ້ເຖິງຄວາມໝາຍສຳຄັນຂອງວັນດັ່ງກ່າວ ຊຶ່ງ ທ່ານ ສຸຄັນທອນ ສິງພວງເພັດ ຜູ້ອໍານວຍການ ວິທະຍາໄລ ວິທະຍາສາດ ສຸຂະພາບ ແຂວງສະຫວັນນະເຂດ (ວສສ) ໄດ້ໃຫ້ສຳພາດ ໃນວັນທີ 15 ມິຖຸນາ ຜ່ານມານີ້ວ່າ: ຄະນະພັກ-ຄະນະອຳນວຍການ ວສສ ຍາມໃດກໍໄດ້ເອົາໃຈໃສ່ ໃນການກໍ່ສ້າງ, ບໍາລຸງໃຫ້ ນັກສຶກສາ ແລະ ແພດ-ໝໍ, ພະຍາບານ ທີ່ໄດ້ມາສຶກສາ ຫຼື ມາຍົກລະດັບວິຊາສະເພາະ ດ້ວຍຄວາມເອົາໃຈໃສ່ ໂດຍສະເພາະ ໄລຍະຜ່ານມານີ້ ກໍຄືການຈັດຕັ້ງປະຕິບັດ ຕາມທິດທາງແຜນພັດທະນາສາທາລະນະສຸກ 5 ປີ ຄັ້ງທີ IX (2021-2025), ທິດທາງແຜນການພັດທະນາຂະແໜງສາທາລະນະສຸກແຂວງ ກໍຄື ແຜນການຂອງ ວສສ ຊຶ່ງໄດ້ເອົາໃຈໃສ່ປະຕິຮູບການສຶກສາສາທາລະນະສຸກ ເພື່ອຮັບປະກັນຄຸນນະພາບການສຶກສາສາທາລະນະສຸກ ເພື່ອເຮັດແນວໃດໃຫ້ສາມາດ ກໍ່ສ້າງໃຫ້ມີແພດ-ໝໍ, ພະຍາບານ ທີ່ສຳເລັດການສຶກສາ ຫຼື ການຝຶກອົບຮົມບໍາລຸງສ້າງ ທີ່ ວສສ ແຫ່ງນີ້ ໄດ້ມີລະດັບວິຊາສະເພາະທີ່ເກັ່ງ ແລະ ໃຫ້ພຽບພ້ອມ ໄປດ້ວຍຄຸນສົມບັດ ສິນທໍາປະຕິວັັດ, ຈັນຍາທໍາວິຊາຊີບ ແລະ ຄວາມຊໍານານງານດ້ານວິຊາສະເພາະ ເພື່ອກາຍເປັນແພດແຫ່ງຊາດ, ແພດປະຊາຊົນ ຢ່າງສົມກຽດສັກສີ, ເປັນນັກຮົບເສື້ອຂາວປະຕິວັດຂອງພັກ ຕາມທິດທາງຂອງພັກ ແລະ ລັດຖະບານເຮົາວາງໄວ້.
ເນື່ອງໃນໂອກາດວັນແພດລາວ ຄົບຮອບ 58 ປີ, ທ່ານ ສຸຄັນທອນ ສິງພວງເພັດ ກໍໄດ້ສະແດງຄວາມຮູ້ບຸນຄຸນຕໍ່ຜູ້ນໍາພັກ-ລັດ ຮຸ່ນກ່ອນ ແລະ ຮຸ່ນປັດຈຸບັນທີ່ໄດ້ໃຫ້ການສຶກສາອົບຮົມພະນັກງານແພດໝໍພ້ອມທັງຊີ້ທິດເຍືອງທາງໃນການພັດທະນາວຽກງານສາທາລະນະສຸກ ນັບແຕ່ມື້ ສ້າງຕັ້ງ ຈົນເຖິງທຸກວັນນີ້. ຂໍອວຍພອນໄຊໃຫ້ແກ່ແພດ-ໝໍ, ພະຍາບານລາວທຸກຖ້ວນໜ້າ ຈົ່ງມີຄວາມເບີກບານມ່ວນຊື່ນ ເຮັດຫຼອນໜ້າທີ່ວິຊາສະເພາະຂອງຕົນຮັບຜິດຊອບ ແລະ ມີສຸຂະພາບພະລານາໄມແຂງແຮງ ປະສົບຜົນສຳເລັດທຸກປະການ. ດັ່ງຄຳຂັວນຂອງປີນີ້: ສູ້ຊົນປະຕິບັດຈັນຍາບັນຈັນຍາທຳຂອງແພດໃຫ້ປະກົດຜົນເປັນຈິງ.
ໂດຍ: ຍຸພິນທອງ
