ວິທະຍຸກະຈາຍສຽງຫວຽດນາມລາຍງານວ່າ: ການພົວພັນຄູ່ຮ່ວມມືຍຸດທະສາດ ຫວຽດນາມ – ອັງກິດ ນັບມື້ນັບພັດທະນາຢ່າງເລິກເຊິ່ງ, ກວ້າງຂວາງ ແລະ ຮອບດ້ານໃນທຸກຂົງເຂດ; ຄວາມໄວ້ເນື້ອເຊື່ອໃຈດ້ານການເມືອງໄດ້ຮັບການປັບປຸງ; ເສດຖະກິດ – ການຄ້າ ໄດ້ຮັບການເປີດກວ້າງຢ່າງບໍ່ຢຸດຢັ້ງ; ການຮ່ວມມືດ້ານປ້ອງກັນຊາດ – ປ້ອງກັນຄວາມສະຫງົບໄດ້ເຂົ້າສູ່ຕົວຈິງ… ນີ້ແມ່ນການຕີລາຄາຊຶ່ງທ່ານນາງ ເລທິທູຮັ່ງ ຮອງລັດຖະມົນຕີການຕ່າງປະເທດ ຫວຽດນາມ ແລະ ທ່ານນາງ Anne Marie Trevelyan ລັດຖະມົນຕີການຕ່າງປະເທດ ແລະ ພັດທະນາ ອັງກິດ ໄດ້ເຫັນດີນຳການສົນທະນາປຶກສາຫາລືຍຸດທະສາດ ຫວຽດນາມ – ອັງກິດ ຄັ້ງທີ 9 ຊຶ່ງຈັດຂຶ້ນເມື່ອບໍ່ດົນມານີ້ ຢູ່ ລອນດອນ ປະເທດອັງກິດ.
ໃນໄລຍະຈະມາເຖິງ, 2 ຝ່າຍເປັນເອກະພາບສືບຕໍ່ສົມທົບກັນຜັນຂະຫຍາຍສັນຍາການຄ້າເສລີລະຫວ່າງ ຫວຽດນາມ ກັບ ຣາຊະອານາຈັກ ອັງກິດ ແລະ ອຽກລັງເໜືອ (UKVFTA); ສົ່ງເສີມໃຫ້ວິສາຫະກິດ ອັງກິດ ເພີ່ມທະວີການລົງທຶນເຂົ້າ ຫວຽດນາມ ໃນບັນດາຂົງເຂດ, ຄື: ພະລັງງານທົດແທນ, ເຕັກນິກດີຈີຕອນ, ການປ່ຽນແປງໃໝ່ປະດິດຄິດສ້າງ, ພື້ນຖານໂຄງລ່າງມີຄຸນນະພາບສູງ, ຄວາມໝັ້ນຄົງ… 2 ຝ່າຍກໍແລກປ່ຽນບາງບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນໄດ້ເນັ້ນໜັກເຖິງຄວາມສຳຄັນຂອງການເຄົາລົບການປະຕິບັດກົດໝາຍສາກົນ ແລະ ບັນດາຫຼັກການພື້ນຖານຂອງກົດບັດສະຫະປະຊາຊາດ, ສະໜັບສະໜູນບົດບາດໃຈກາງຂອງ ອາຊຽນ ແລະ ຫຼັກໝັ້ນຂອງ ອາຊຽນ ໃນບັນດາບັນຫາຄວາມໝັ້ນຄົງຢູ່ພາກພື້ນ.
