ໜຶ່ງແລວໜຶ່ງເສັ້ນທາງ ສປ ຈີນ ຊ່ວຍພັດທະນາ ສປປ ລາວ ເປັນປະເທດເຊື່ອມຈອດ, ໂຄງການ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ຖືວ່າເປັນຍຸດທະສາດທີ່ສຳຄັນ ແລະ ມີຄວາມໝາຍເປັນຢ່າງຍິ່ງຊຶ່ງສາມາດຊ່ວຍ ສປປ ລາວ ຫັນປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມຈອດ.
ທ່ານ ວິໄລ ມະນີລັດ ຮອງຜູ້ອໍານວຍການໃຫຍ່ ສໍານັກງານຂ່າວສານປະເທດລາວໄດ້ກ່າວໃນງານພິທີສໍາພາດກ່ຽວກັບຜົນສໍາເລັດການຮ່ວມມືໃນການປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງລະຫວ່າງ ສອງຊາດ ລາວ-ຈີນ ໃຫ້ປະຊາຊົນລາວ ແລະ ຈີນ ໄດ້ຮັບຮູ້ ເມື່ອບໍ່ດົນມານີ້ວ່າ: ເພື່ອເຮັດໃຫ້ສອງຊາດລາວ-ຈີນ ສາມາດເຊື່ອມໂຍງ ແລະ ກົມກຽວໃນການພັດທະນາຕາມຄວາມມຸ່ງມາດປາຖະໜາຂອງຕົນ ເພື່ອນໍາເອົາຜົນປະໂຫຍດສູງສຸດມາໃຫ້ປະຊາຊົນສອງຊາດ, ການພັດທະນາແລວທາງເສດຖະກິດ ຖືເປັນເຄື່ອງມືສໍາຄັນໃນການນໍາໃຊ້ທີ່ຕັ້ງຍຸດທະສາດຂອງປະເທດ ເພື່ອເປົ້າໝາຍກາຍເປັນສູນກາງເຊື່ອມຕໍ່ທາງບົກໃນປະເທດອະນຸພາກພື້ນ, ສະນັ້ນລັດຖະບານລາວ ຈຶ່ງໃຫ້ຄວາມສໍາຄັນ ແລະ ຕີລາຄາສູງຕໍ່ ແລວທາງເສດຖະກິດລາວ-ຈີນ ຊຶ່ງເປັນພາກສ່ວນໜຶ່ງຂອງ 1 ໃນ 6 ແລວທາງເສດຖະກິດ ພາຍໃຕ້ກອບຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ.
ການພັດທະນາແລວທາງເສດຖະກິດລາວ-ຈີນ ໂດຍຖືເອົາເສັ້ນທາງລົດໄຟລາວ-ຈີນ ເປັນເສັ້ນເລືອດສໍາຄັນໄດ້ເປັນໂອກາດຊຸກຍູ້ການນໍາໃຊ້ທ່າແຮງຂອງປະເທດ ໃນການເປັນສູນກາງທາງດ້ານໂລຈິສຕິກ ແລະ ຊຸກຍູ້ບັນດາກິດຈະກໍາທາງເສດຖະກິດ, ໂດຍສະເພາະແມ່ນການທ່ອງທ່ຽວ, ການລົງທຶນ, ການຜະລິດ ແລະ ການຄ້າ, ຈາກທີ່ຕັ້ງທີ່ໂດດເດັ່ນ ແລະ ມີລົດໄຟແລ່ນຜ່ານ ສປປ ລາວ ກາຍເປັນຈຸດສົນໃຈ ແລະ ເປັນທີ່ດຶງດູດຂອງການລົງທຶນໂດຍກົງຈາກຕ່າງປະເທດ, ການຄ້າຕ່າງປະເທດຈະເພີ່ມຂຶ້ນ ຍ້ອນຄວາມສະດວກໃນການຂົນສົ່ງ ແລະ ປະຢັດຕົ້ນທຶນ, ອີງຕາມຜົນການສຶກສາຂອງທະນາຄານໂລກ (2019) ໄດ້ຄາດຄະເນຕົ້ນທຶນສໍາລັບການຄ້າສອງຝ່າຍລາວ-ຈີນ ດ້ວຍລົດໄຟ ທຽບກັບລົດບັນທຸກ ຈະຫຼຸດລົງ 41,1%-51,8% ແລະ ຕົ້ນທຶນການຂົນສົ່ງສໍາລັບການຄ້າພາຍໃນປະເທດ ຈະຫຼຸດລົງ 17,8%-39,8%, ເນື່ອງຈາກການພັດທະນາແລວທາງເສດຖະກິດລາວ-ຈີນ ມີຫຼາຍອົງປະກອບ, ມີຫຼາຍກິດຈະກໍາ ແລະ ມີຫຼາຍພາກສ່ວນ. ສະນັ້ນ, ນອກຈາກຜົນໄດ້ຮັບທາງກົງແລ້ວ ຍັງມີຜົນໄດ້ຮັບທາງອ້ອມອີກຫຼາຍດ້ານ ທີ່ຄາດວ່າຈະເປັນປະໂຫຍດໃຫ້ແກ່ ສປປ ລາວ ເປັນຕົ້ນແມ່ນ ເມື່ອມີກະແສການໄຫຼເຂົ້າມາຈາກການລົງທຶນໂດຍກົງຕ່າງປະເທດເພີ່ມຂຶ້ນ.
ປະເທດຈະໄດ້ຮັບຜົນທາງອ້ອມຈາກການຖ່າຍທອດເຕັກໂນໂລຊີ ແລະ ສີມືຄວາມຮູ້ຄວາມສາມາດ, ການພັດທະນາສິນຄ້າໃໝ່ເພື່ອການສົ່ງອອກ, ການເຂົ້າຫາຕະຫຼາດຕ່າງປະເທດ ແລະ ການສ້າງວຽກເຮັດງານທໍາໃນສັງຄົມ, ອີກດ້ານໜຶ່ງ, ຜົນການຄົ້ນຄວ້າຂອງ ສວສສຊ (2022) ໄດ້ຍົກໃຫ້ເຫັນວ່າ: ແລວທາງເສດຖະກິດ ລາວ-ຈີນ ສາມາດສ້າງຜົນກະທົບທາງບວກ ຕໍ່ອັດຕາຄວາມທຸກຍາກ, ເຮັດໃຫ້ສາມາດຫຼຸດຜ່ອນອັດຕາຄວາມທຸກຍາກຈາກ 17,0% ເປັນ 15,6%, ທັງໝົດນີ້, ແມ່ນຜົນກະທົບທາງກົງ ແລະ ທາງອ້ອມທີ່ຄາດວ່າຈະເກີດຂຶ້ນໃນຕໍ່ໜ້າ ບົນພື້ນຖານການສຶກສາຢ່າງມີວິທະຍາສາດ ແລະ ສິ່ງທີ່ເຮົາສາມາດເຫັນໄດ້ຢ່າງປະຈັກຕາທີ່ເກີດຂຶ້ນ, ພາຍຫຼັງ ເລີ່ມເປີດນໍາໃຊ້ເສັ້ນທາງລົດໄຟຢ່າງເປັນທາງການໃນທ້າຍປີ 2021, ໃນ ປີ 2022 ພາຍຫຼັງເປີດປະເທດຢ່າງເຕັມຮູບແບບ ຈາກມາດຕະການປ້ອງກັນການແຜ່ລະບາດຂອງພະຍາດໂຄວິດ-19, ສະພາບການທ່ອງທ່ຽວໄດ້ກັບມາຄຶກຄັກອີກຄັ້ງ ແລະ ສິ່ງສໍາຄັນທີ່ດຶງດູດໃຫ້ມີນັກທ່ອງທ່ຽວເຂົ້າມາ ກໍແມ່ນຢາກມາສໍາຜັດເສັ້ນທາງລົດໄຟ ລາວ-ຈີນ ທີ່ເຮັດໃຫ້ການເດີນທາງມີຄວາມສະດວກສະບາຍ ແລະ ປອດໄພຍິ່ງຂຶ້ນ.
ໂດຍ: ບຸນອູ້ມ
