ອົງການແພລນສາກົນ ປະຈໍາ ສປປ ລາວ ຮ່ວມກັບ ພະແນກສາທາລະນະສຸກ ແຂວງສາລະວັນ ໄດ້ຈັດພິທິເຊັນບົດບັນທຶກຄວາມເຂົ້າໃຈ (MOU) ພາຍໃຕ້ໂຄງການເຊື່ອມສານວຽກງານຮັກສາສຸຂະພາບ, ໂພຊະນາການ, ນໍ້າສະອາດ, ສຸຂາພິບານ ແລະ ສຸຂານາໄມ ໄລຍະ 4 ຢູ່ທີ່ແຂວງສາລະວັນ ຂຶ້ນໃນວັນທີ 7 ມິຖຸນານີ້ ທີ່ສະໂມສອນແຂວງ, ເຊັນໂດຍ ທ່ານ ອາຄົມ ລໍ່າວິຈິດ ຫົວໜ້າພະແນກສາທາແຂວງສາລະວັນ ແລະ ທ່ານ ແສງສັນຕິສິດ ຊະນະສີສານ ຮອງອຳນວຍການອົງການແພລນສາກົນ ປະຈຳ ສປປ ລາວ, ມີແຂກຖືກເຊີນຈາກກະຊວງການຕ່າງປະເທດ, ກະຊວງສາທາລະນະສຸກ, ຮອງຫົວໜ້າພະແນກການອ້ອມຂ້າງແຂວງ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ໂຄງການເຊື່ອມສານວຽກງານຮັກສາສຸຂະພາບ, ໂພຊະນາການ, ນໍ້າສະອາດ, ສຸຂາພິບານ ແລະ ສຸຂານາໄມ ໄລຍະ 4 ຈະໄດ້ສືບຕໍ່ຈາກຜົນສໍາເລັດຂອງການຈັດຕັ້ງປະຕິບັດໂຄງການໄລຍະ 3 ທີ່ຜ່ານມາ ແລະ ເພື່ອເປັນການປະກອບສ່ວນເຂົ້າໃນການຫຼຸດຜ່ອນການຂາດສານອາຫານ ປະເພດລວງສູງບໍ່ໄດ້ມາດຕະຖານ ໂດຍສະເພາະແມ່ນໃນເດັກອ່ອນ ແລະ ເດັກນ້ອຍ ຊຶ່ງເນັ້ນໃສ່ 1.000 ວັນທໍາອິດຂອງການມີຊີວິດ ແລະ ປັບປຸງໂພຊະນາການໃນກຸ່ມແມ່ຍິງຢູ່ໃນ 52 ບ້ານ ແລະ 13 ໂຮງໝໍນ້ອຍຂອງເມືອງສາລະວັນ ລວມເຖິງການກ້າວໄປສູ່ການປະກາດເມືອງ ແລະ ແຂວງສາລະວັນ ໃຫ້ເປັນເມືອງ ແລະ ແຂວງຢຸດຕິການຖ່າຍຊະຊາຍ ພາຍໃນປີ 2024 ແລະ ເຮັດໃຫ້ປະເທດ ສປປ ລາວ ກ້າວໄປສູ່ປະເທດຢຸດຕິການຖ່າຍຊະຊາຍພາຍໃນປີ 2025. ພ້ອມທັງເປັນການປະກອບສ່ວນເຂົ້າໃນເປົ້າໝາຍຍຸດທະສາດແຫ່ງຊາດດ້ານໂພຊະນາການ ແລະ ເປົ້າໝາຍການພັດທະນາແບບຍືນຍົງ (SDG) 2 ແລະ 6. ໂຄງການໄລຍະທີ 4 ຈະໄດ້ສຸມໃສ່ວຽກງານດ້ານວິຊາການໃນ 2 ຂົງເຂດຕົ້ນຕໍຄື: ສ້າງຄວາມອາດສາມາດໃຫ້ກັບຄະນະກຳມະການຊຸມຊົນເປັນເຈົ້າການດ້ານສຸຂານາໄມ ຫຼື ຊຈສ ກ່ຽວກັບວຽກງານການສື່ສານເພື່ອປ່ຽນແປງພຶດຕິກໍາຂອງຊຸມຊົນ-ຊຸມຊົນເປັນເຈົ້າການດ້ານສຸຂານາໄມ ໂດຍມີການປັບຕົວຕໍ່ການປ່ຽນແປງສະພາບດິນຟ້າອາກາດ; ຈັດຕັ້ງປະຕິບັດກິດຈະກຳ “ເພື່ອນແທ້” ຢູ່ຂັ້ນໂຮງໝໍນ້ອຍ ເນັ້ນໜັກໃສ່ ວຽກງານຮັກສາຄວາມສະອາດ, ປອດໄພ ແລະ ເປັນມິດກັບເດັກ ແລະ ແມ່ຍິງ ລວມເຖິງຜູ້ດ້ອຍໂອກາດ ແລະ ຄົນພິການ. ໂດຍສະເພາະແມ່ນແມ່ຍິງ, ເດັກນ້ອຍ ແລະ ແມ່ຍິງຖືພາ ໃນ 52 ບ້ານ ພາຍໃນເຂດບໍລິການຂອງໂຮງໝໍນ້ອຍ 13 ແຫ່ງ ແລະ ບ້ານໃກ້ຄຽງ ຈະໄດ້ຮັບຜົນປະໂຫຍດຈາກການໃຫ້ບໍລິການ ແລະ ສິ່ງອຳນວຍຄວາມສະດວກທີ່ໂຄງການຈະສະໜອງໃຫ້.”
ໂຄງການດັ່ງກ່າວ, ຈະໄດ້ຈັດຕັ້ງປະຕິບັດກິດຈະກໍາຢູ່ເມືອງສາລະວັນ ໄດ້ກວມເອົາ 52 ບ້ານ ແລະ 13 ໂຮງໝໍນ້ອຍ. ໄລຍະການຈັດຕັ້ງປະຕິບັດກິດຈະກຳໂຄງການ 3 ປີ ເລີ່ມແຕ່ປີ 2023-2025, ໂດຍໄດ້ຮັບທຶນສະໜັບສະໜູນຈາກອົງການແພລນສາກົນ ປະຈໍາ ອົສຕຣາລີ, ລັດຖະບານອົສຕຣາລີ ແລະ ຜູ້ໃຫ້ທຶນອື່ນໆ ພາຍໃຕ້ງົບປະມານທັງໝົດຈຳນວນ 195.119 ໂດລາ.
(ຂ່າວ-ພາບ: ທິດລານີ ໂຄດໂຍທາ).
