ກອງປະຊຸມຂະແໜງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ປະຈຳປີ 2023 ໄດ້ຈັດຂຶ້ນໃນວັນທີ 7 ມີຖຸນາ ນີ້ ທີ່ສູນການຮ່ວມມືສາກົນ ແລະ ຝຶກອົບຮົມ ໂດຍການເຂົ້າຮ່ວມຂອງ ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງານ ແລະ ສະຫວັດດີການສັງຄົມ, ມີທ່ານນາງ ແຄັດເທີຣີນ ເຟືອງ ຮັກສາການຜູ້ຕາງໜ້າອົງການສະຫະປະຊາຊາດເພື່ອການພັດທະນາ (UNDP) ປະຈໍາລາວ, ມີບັນດາແຂກຖືກເຊີນກ່ຽວ ຂ້ອງເຂົ້າຮ່ວມ.
ທ່ານ ປະເດີມພອນ ສົນທະນີ ກ່າວວ່າ: ກອງປະຊຸມຄັ້ງນີ້ໄດ້ຮັບຟັງການລາຍງານຄວາມຄືບໜ້າກ່ຽວກັບວຽກງານການເກັບກູ້ລະເບີດບໍ່ທັນແຕກ, ບົດລາຍງານຜົນສໍາເລັດຂອງຂະແໜງການແກ້ໄຂບັນຫາ ລບຕ ໃນ 6 ເດືອນຕົ້ນປີ ແລະ ວຽກຈຸດສຸມ 6 ເດືອນທ້າຍປີ, ກາລະໂອກາດ ແລະ ສິ່ງທ້າທາຍຂອງອົງການປະຕິບັດງານແກ້ໄຂບັນຫາ ລບຕ ແຫ່ງຊາດ ແລະ ບົດລາຍງານກ່ຽວກັບການຄົ້ນຄວ້າບົດບາດຍິງ-ຊາຍ ໃນວຽກງານແກ້ໄຂບັນຫາ ລບຕ ແລະ ບົດລາຍງານການປະເມີນການນໍາໃຊ້ທີ່ດິນພາຍຫຼັງທີ່ໄດ້ຮັບການເກັບກູ້ ແລະ ບົດລາຍງານກ່ຽວກັບຄວາມຮັບຮູ້ ແລະ ການປ່ຽນແປງພຶດຕິກໍາ.
ກອງປະຊຸມໄດ້ສືບຕໍ່ປະສານສົມທົບກັບອົງການປະຕິບັດງານ ເພື່ອປັບປຸງມາດຕະຖານແຫ່ງຊາດໃຫ້ມີຄວາມສອດຄ່ອງກັບສະພາບ ແລະ ເງື່ອນໄຂຕົວຈິງຂອງ ສປປ ລາວ ຄຽງຄູ່ກັນນີ້ໃຫ້ຄະນະກໍາມະການຂັ້ນແຂວງ ແລະ ອົງການປະຕິບັດງານແກ້ໄຂບັນຫາ ລບຕ ເພື່ອມະນຸດສະທໍາສຸມໃສ່ການກວດກູ້ໃຫ້ຫຼາຍຂຶ້ນ ເພື່ອບັນລຸຄາດໝາຍສູ້ຊົນຕາມທີ່ໄດ້ກໍານົດໄວ້ໃນແຜນຍຸດທະສາດແຫ່ງຊາດ ເພື່ອແກ້ໄຂບັນຫາ ລບຕ “ເສັ້ນທາງກ້າວສູ່ຄວາມປອດໄພ III” ໄລຍະ 2021-2030, ຍົກສູງຄວາມຮັບຜິດຊອບຂອງທຸກພາກສ່ວນ ເພື່ອປະກອບສ່ວນເຂົ້າໃນການໂຄສະນາສຶກສາຄວາມສ່ຽງໄພ, ຊ່ວຍເຫຼືອຜູ້ຖືກເຄາະຮ້າຍຈາກ ລບຕ, ການສໍາຫຼວດ-ກວດກູ້ ແລະ ທໍາລາຍ ລບຕ ເພື່ອເຮັດໃຫ້ປະຊາຊົນລາວບັນດາເຜົ່າປອດໄພຈາກ ລບຕ ກໍຄືການຈັດຕັ້ງປະຕິບັດແຜນເປົ້າໝາຍພັດທະນາແບບຍືນຍົງທີ 18 (SDG 18), ເອົາໃຈໃສ່ຕິດຕາມ ແລະ ກວດກາໃນການນໍາໃຊ້ທີ່ດິນເພື່ອເຮັດໃຫ້ການນໍາໃຊ້ທີ່ດິນເກີດມີຜົນປະໂຫຍດສູງສຸດ, ເພີ່ມລາຍໄດ້ແກ່ຄອບຄົວ ແລະ ປະກອບສ່ວນຕໍ່ການລຶບລ້າງຄວາມທຸກຍາກຂອງປະຊາຊົນລາວບັນດາເຜົ່າໃນເຂດທີ່ມີຄວາມສ່ຽງຈາກ ລບຕ ທີ່ຕົກຄ້າງແຕ່ປາງສົງຄາມ, ເພີ່ມທະວີການປະສານງານກັບທຸກພາກ ສ່ວນ ເພື່ອສ້າງຄວາມເຂັ້ມແຂງໃຫ້ແກ່ກອງກວດກູ້ມະນຸດສະທໍາກອງທັບ ໄດ້ມີການເຄື່ອນໄຫວເປັນປົກກະຕິ, ເພື່ອເຮັດໃຫ້ວຽກງານແກ້ໄຂບັນຫາ ລບຕ ມີຄວາມຍືນຍົງໃນອະນາຄົດ, ເອົາໃຈໃສ່ເກັບກໍາຂໍ້ມູນ ແລະ ປຶກສາຫາລືກັບພາກສ່ວນກ່ຽວຂ້ອງ ເພື່ອກະກຽມບົດລາຍງານການຈັດຕັ້ງປະຕິບັດສົນທິສັນຍາ ແລະ ການຂໍຕໍ່ໄລຍະເວລາຕາມມາດຕາ 4 ຂອງສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ເພື່ອສະເໜີຕໍ່ຄະນະກຳມະການສາກົນຮັບຜິດຊອບ ແລະ ພິຈາລະນາຮັບຮອງ.
ຂ່າວ-ພາບ: ບຸນອູ້ມ
