ໃນປີ 2023 ນີ້, ລັດຖະບານ ຕັ້ງເປົ້າໃນຂອບເຂດທົ່ວປະເທດ ກຳນົດແຜນການເກັບແກ່ນພັນໃຫ້ໄດ້ 20 ພັນ ກິໂລກຼາມ, ກ້າເບ້ຍ 34 ລ້ານກວ່າເບ້ຍ ແລະ ປູກໄມ້ 42 ພັນເຮັກຕາ, ສະເພາະວັນປູກຕົ້ນໄມ້ແຫ່ງຊາດປີນີ້ ໃນທົ່ວປະເທດມີແຜນການຈະຈັດພິທີສ້າງຂະບວນການປູກຕົ້ນໄມ້ ປະມານ 3.480 ເຮັກຕາ, ລວມເບ້ຍໄມ້ທັງໝົດ ຈໍານວນ 3.484.000 ເບ້ຍ.
ທ່ານ ເພັດ ພົມພິພັກ ລັດຖະມົນຕີ ກະ ຊວງກະສິກຳ ແລະ ປ່າໄມ້ ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 29 ພຶດສະພາ 2023 ໃຫ້ຮູ້ວ່າ:
ເພື່ອສ້າງຂະບວນການສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ 1 ມິຖຸນາ ຄົບ ຮອບ 43 ປີ, ກະຊວງກະສິ ກຳ ແລະ ປ່າໄມ້ ໄດ້ອອກແຈ້ງການສະບັບເລກທີ 1786/ກປ ເພື່ອເປັນການຜັນຂະຫຍາຍມາດຕາ 60 ຂອງກົດໝາຍ ວ່າດ້ວຍປ່າໄມ້ ແລະ ສືບຕໍ່ຈັດຕັ້ງປະຕິບັດຄໍາສັ່ງສະບັບເລກທີ 15/ນຍ ວ່າດ້ວຍ ວຽກງານສົ່ງ ເສີມປູກໄມ້ ແລະ ຟື້ນຟູປ່າໄມ້ທໍາມະຊາດ ໃຫ້ເປັນຂະບວນກວ້າງຂວາງ ແລະ ບັນລຸຕາມແຜນການທີ່ວາງໄວ້.
ສະນັ້ນ, ໃນປີ 2023 ນີ້ ຂະແໜງການພວກເຮົາ ໄດ້ສົມທົບກັບ ຄະນະ ພັກ- ຄະ ນະນຳຂອງ ອົງການປົກຄອງຂັ້ນສູນກາງ ແລະ ທ້ອງຖິ່ນທົ່ວປະເທດ ກຳນົດແຜນ ການເກັບແກ່ນພັນໃຫ້ໄດ້ 20 ພັນກິໂລກຼາມ, ກ້າເບ້ຍ 34 ລ້ານ ກວ່າເບ້ຍ ແລະ ປູກໄມ້ 42 ພັນເຮັກຕາ. ໃນນີ້, ປູກໄມ້ ເພື່ອປົກປັກຮັກສາສິ່ງແວດລ້ອມ ຢູ່ໃນຂອບເຂດປ່າປ້ອງກັນ ແລະ ປ່າສະຫງວນ ປະມານ 8.535 ເຮັກຕາ, ປູກປ່າທົດແທນ ໃນເຂດໂຄງການພື້ນຖານໂຄງລ່າງ ແລະ ປູກໄມ້ອຸດສາຫະກໍາເປັນສິນຄ້າ ປະມານ 29.565 ເຮັກຕາ, ປູກໃນທີ່ດິນຂອງບຸກ ຄົນ ແລະ ນິຕິບຸກຄົນ ປະມານ 3.900 ເຮັກຕາ.
ສະເພາະ ວັນປູກຕົ້ນໄມ້ແຫ່ງຊາດ ປີນີ້, ໃນທົ່ວປະເທດ ມີແຜນການຈະຈັດພິທີສ້າງຂະບວນການປູກຕົ້ນໄມ້ ປະມານ 3.480 ເຮັກຕາ, ລວມເບ້ຍໄມ້ທັງໝົດ ປະມານ 3.484.000 ເບ້ຍ, ປະກອບມີ: ໄມ້ດູ່, ໄມ້ແຕ້ຄ່າ, ໄມ້ຍາງ, ໄມ້ສັກ, ໄມ້ແຄນ, ໄມ້ສົ້ມຝາດ, ໄມ້ຂະຍຸງ, ໄມ້ແຕ້ຮໍ, ໄມ້ສະຟາງ, ໄມ້ກາກະເລົາ, ໄມ້ຄູນ, ໄມ້ສາມສາ ແລະ ໄມ້ຊະນິດອື່ນໆ. ພ້ອມນີ້, ແຕ່ລະແຂວງ ແລະ ນະຄອນຫຼວງວຽງ ຈັນ ໄດ້ມີແຜນການຈັດງານວາງສະແດງເບ້ຍໄມ້ ເພື່ອສົ່ງເສີມການປູກໄມ້ເປັນສິນຄ້າ ແລະ ປົກປັກຮັກສາສິ່ງແວດລ້ອມ.
ເນື່ອງໃນໂອກາດ ວັນປູກຕົ້ນໄມ້ແຫ່ງ ຊາດ ວັນທີ 1 ມິຖຸນາ 2023 ຂໍຮຽກຮ້ອງມາຍັງປວງຊົນທັງຊາດ ຈົ່ງເຊີດຊູສະຕິຮັກຊາດ ແລະ ຫວງແຫນປ່າໄມ້ ປະກອບສ່ວນຕາມເງື່ອນໄຂຄວາມສາມາດໃນການປູກໄມ້ ແລະ ຟື້ນຟູປ່າ ໄປຄຽງຄູ່ກັບ ການຄຸ້ມຄອງ, ປົກປັກຮັກສາປ່າໄມ້ ອັນເປັນມໍລະດົກ ແລະ ຊັບສົມບັດຂອງວົງຄະນະ ຍາດແຫ່ງຊາດ ໃຫ້ນັບມື້ມີຄວາມອຸດົມສົມບູນ, ສາມາດຕອບສະໜອງຄວາມຮຽກຮ້ອງຕ້ອງການວັດຖຸດິບດ້ານໄມ້ ແລະ ຜະລິດຕະຜົນປ່າໄມ້ແບບຍືນນານ ໂດຍບໍ່ມີວັນບົກແຫ້ງ.
ເຊິ່ງຄໍາຂວັນຂອງ ວັນປູກຕົ້ນໄມ້ແຫ່ງຊາດ ປະຈໍາປີ 2023 ແມ່ນ: “ຊົມເຊີຍ ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຄົບ ຮອບ 43 ປີ ຢ່າງສຸດໃຈ, ປູກຕົ້ນໄມ້ໃນວັນນີ້ ເພື່ອລູກຫຼານໃນວັນໜ້າ ຈົ່ງຊ່ວຍກັນປູກຕົ້ນໄມ້ໃຫ້ເປັນປ່າ ເພື່ອເປັນສິນຄ້າ ແລະ ປົກປັກຮັກສາສິ່ງແວດລ້ອມ, ຫຼຸດຜ່ອນມົນລະຜິດທາງອາກາດ“.
(ຂ່າວ: ແກ້ວ)
