ທ່ານ ຮສ.ປອ ພຸດ ສິມມາລາວົງ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງສຶກສາທິການ ແລະ ກິລາ ຫຼື ສສກ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນ້ຳທາ ພ້ອມໄດ້ໂອ້ລົມຜູ້ບໍລິຫານການສຶກສາ ແລະ ກິລາແຂວງຫຼວງນໍ້າທາ ໃນວັນທີ 29 ພຶດສະພາ 2023 ທີ່ສະໂມສອນໂຮງຮຽນ ມສ ກິນນອນຊົນເຜົ່າແຂວງ, ໂດຍມີທ່ານ ແກ້ວ ເຊືອຍສົມບັດ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີຫົວໜ້າ-ຮອງຫົວໜ້າຫ້ອງການສຶກສາທິການ ແລະ ກິລາເມືອງຫຼວງນໍ້າທາ, ຄະນະອໍານວຍການໂຮງຮຽນ ມສ ແລະ ຄູອາຈານ ໂຮງຮຽນ ມສ ອ້ອມຂ້າງເທດສະບານແຂວງເຂົ້າຮ່ວມຮັບຟັງ.
ໃນພິທີ, ທ່ານ ແກ້ວ ເຊືອຍສົມບັດ ໄດ້ລາຍງານໂດຍຫຍໍ້ກ່ຽວກັບສະພາບການສຶກສາພາຍໃນແຂວງ ໃຫ້ຮູ້ວ່າ: ປັດຈຸບັນທົ່ວແຂວງ ມີລັດຖະກອນສຶກສາ ຈຳນວນ 2.986 ຄົນ, ຍິງ 1.606 ຄົນ, ມີອາສາສະໝັກ 147 ຄົນ, ຍິງ 83 ຄົນ, ມີໂຮງຮຽນອະນຸບານ 193 ແຫ່ງ, ໂຮງຮຽນສາມັນສຶກສາ 409 ແຫ່ງ, ມີຄູອາຈານ 2.404 ຄົນ, ຍິງ 1.242 ຄົນ, ມີນັກຮຽນ 40.610 ຄົນ, ຍິງ 19.215 ຄົນ. ການຈັດຕັ້ງປະຕິບັດ 12 ຄາດໝາຍຂອງຂະແໜງການສຶກສາ ແລະ ກິລາ ທີ່ສະພາແຫ່ງຊາດ ວາງອອກ ສາມາດບັນລຸໄດ້ 9 ຄາດໝາຍ, ໃກ້ຈະບັນລຸ 1 ຄາດໝາຍ ແລະ ບໍ່ບັນລຸ 2 ຄາດໝາຍ ຊຶ່ງມັນສະແດງອອກຄາດໝາຍທີ່ບັນລຸໄດ້ ຄື: ອັດຕາເຂົ້າຮຽນສຸດທິໃໝ່ ປ.1 ປະຕິບັດໄດ້ 95,9% ຄາດໝາຍແມ່ນ 95,5%; ອັດຕາເລື່ອນຂັ້ນ ແລະ ຈົບຊັ້ນປະຖົມປະຕິບັດໄດ້ 95,6% ຄາດໝາຍແມ່ນ 95,5%; ດັດຊະນີສະເໝີພາບ ຍິງ-ຊາຍ ອັດຕາເລື່ອນຊັ້ນ ແຕ່ ປ.1-ມ.1 ປະຕິບັດໄດ້ 0,99% ໝາຍແມ່ນ 0,97%-1,03%; ອັດຕາເຂົ້າຮຽນໃໝ່ ມ.4 ປະຕິບັດໄດ້ 72,6% ຄາດໝາຍ 71,5%; ອັດຕາປະລະຊັ້ນປະຖົມ ປະຕິບັດໄດ້ 1,8% ຄາດໝາຍແມ່ນ 2,3%; ອັດຕາເລື່ອນຂັ້ນ ປ.5 ຂຶ້ນ ມ.1 ປະຕິບັດໄດ້ 87,9% ຄາດໝາຍແມ່ນ 86,5%; ອັດຕາປະລະ ມ.ຕົ້ນ ປະຕິບັດໄດ້ 8,2% ຄາດໝາຍແມ່ນ 9%; ປະຊາກອນໜຸ່ມ ແລະ ຜູ້ປະລະໄດ້ບໍາລຸງຜ່ານການສຶກສານອກໂຮງຮຽນ ແລະ ຝຶກອົບຮົມວິຊາຊີບ ປະຕິບັດໄດ້ 1.242 ຄົນ ຄາດໝາຍ 936 ຄົນ; ສົ່ງເສີມມວນຊົນທຸກເພດໄວເຂົ້າຮ່ວມການອອກກຳລັງກາຍ ແລະ ຫຼິ້ນກິລາເພື່ອສຸຂະພາບ ປະຕິບັດໄດ້ 21,16% ຄາດໝາຍແມ່ນ 19%. ສຳລັບຄາດໝາຍທີ່ໃກ້ຈະບັນລຸ 1 ຄາດໝາຍແມ່ນການປະລະຂອງນັກຮຽນ ປ.1 ປະຕິບັດໄດ້ 2,6% ຄາດໝາຍແມ່ນ 2,5%; ຄາດໝາຍທີ່ບໍ່ບັນລຸ 2 ຄາດໝາຍແມ່ນອັດຕາເຂົ້າຮຽນເດັກໃນຊັ້ນການສຶກສາກ່ອນໄວຮຽນ 5 ປີ ປະຕິບັດໄດ້ 83,8% ຄາດໝາຍແມ່ນ 85%; ອັດຕາເຂົ້າຮຽນໃໝ່ ປ.5 ປະຕິບັດໄດ້ 98,4% ຄາດໝາຍແມ່ນ 100%.
ໂອກາດນີ້, ທ່ານ ຮສ.ປອ ພຸດ ສິມມາລາວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄູອາຈານ ທີ່ຍາດໄດ້ໃນໄລຍະຜ່ານກໍຄືປັດຈຸບັນ ພ້ອມຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາແຂວງຫຼວງນໍ້າທາ ໃຫ້ເອົາໃຈໃສ່ຫຼາຍບັນຫາເປັນຕົ້ນແມ່ນ ໃຫ້ມີຄວາມອົດທົນຕັດສິນໃຈຜ່ານຜ່າບັນຫາອຸປະສັກຕ່າງໆ ເຫັນໄດ້ ແລະ ເຂົ້າໃຈສະພາບລວມຂອງໂລກ ທັງເພີ່ມຄວາມຮັບຜິດຊອບການບໍລິຫານການຄຸ້ມຄອງ ສ້າງຄວາມເຂັ້ມແຂງປັບປຸງນິຕິກຳ ເຂົ້າຮ່ວມປັບປຸງກໍ່ສ້າງຄູໃຫ້ໄດ້ຄຸນນະພາບມາດຕະຖານ, ເພີ່ມຄວາມຮັບຜິດຊອບຕໍ່ການສິດສອນໃຫ້ໄປຕາມຫຼັກການ, ມີຫຼາຍຮູບແບບ, ຫຼາຍວິທີສິດສອນ, ປະເມີນຄູແມ່ນໃຫ້ເບິ່ງຄຸນນະພາບຂອງນັກຮຽນ ພ້ອມນີ້ກໍຍັງໃຫ້ເອົາໃຈໃສ່ເລື່ອງສະພາບແວດລ້ອມຂອງແຕ່ລະໂຮງຮຽນ ວ່າຈະເຮັດແນວໃດເພື່ອໃຫ້ໂຮງຮຽນຕ້ອງເປັນໂຮງຮຽນສີຂຽວ ທັງຮັບປະກັນບ້ານ- ເມືອງຕ້ອງມີສູນອອກກໍາລັງກາຍ ເພາະຄົນເຮົາສະຕິປັນຍາຈະດີ ສຸຂະພາບຈະແຂງແຮງ ຕ້ອງມີສະພາບແວດລ້ອມສະອາດ ແລະ ຕ້ອງໄດ້ອອກກຳລັງກາຍຢ່າງສະໝ່ຳສະເໝີ.
ຂ່າວໂດຍ: ທອງສຸດດວງໃຈ ອຸດົມສີລິ (ສກຂ ຫຼວງນ້ຳທາ)
