ເພື່ອເປັນການສ້າງຂະບວນການປູກຕົ້ນໄມ້ໃຫ້ເປັນຂະບວນການທົ່ວປະເທດ, ປູກຈິດສໍານຶກໃຫ້ທຸກໆຊັ້ນຄົນໃນສັງຄົມເຫັນໄດ້ຄວາມສໍາຄັນຂອງປ່າໄມ້, ໃນວັນທີ 1/6 ຫ້ອງວ່າການສໍານັກງານປະທານປະເທດ ຫສປທ ໄດ້ຈັດພິທີປູກຕົ້ນໄມ້ຂຶ້ນ, ໂດຍໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ມີບັນດາການນໍາພັກ, ລັດ, ຄະນະພັກ, ຄະນະນໍາ ຫສປທ ພ້ອມດ້ວຍບັນດາທ່ານແຂກຖືກເຊີນເຂົ້າຮ່ວມ.
ທ່ານນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ ກ່າວວ່າ: ຫສປທ ກໍຄື ອົງການອື່ນໆຂອງພັກ ແລະ ລັດຖະບານ ໄດ້ຖືເອົາວຽກງານສ້າງເມືອງສີຂຽວ, ສະອາດ ແລະ ສະຫງົບ ເປັນວຽກງານສໍາຄັນ ໂດຍຍົກສູງການປົກປັກຮັກສາ ແລະ ພັດທະນາປ່າໄມ້, ເວົ້າລວມ, ເວົ້າສະເພາະເອົາໃຈໃສ່ບົວລະບັດຮັກສາ ແລະ ເຮັດໃຫ້ທໍານຽບປະທານປະເທດມີສີຂຽວ ແລະ ບັນຍາກາດທີ່ດີ, ຢູ່ທໍານຽບປະທານປະເທດມີຕົ້ນໄມ້ທັງໝົດ 525 ຕົ້ນ, ປະກອບມີ 27 ຊະນິດໄມ້.
ປ່າໄມ້ມີຄວາມສໍາຄັນຕິດພັນກັບການດໍາລົງຊີວິດຂອງປວງຊົນລາວບັນດາເຜົ່າ ເປັນການປັບຄວາມສົມດູນຂອງສະພາບແວດລ້ອມທໍາມະຊາດ, ຍ້ອນເຫັນໄດ້ຄວາມສໍາຄັນດັ່ງກ່າວ ພັກ, ລັດຖະບານ ຈຶ່ງໄດ້ກໍານົດເອົາວັນທີ 1 ເດືອນ 6 ຂອງທຸກໆປີ ກົງກັບວັນເດັກນ້ອຍສາກົນ ເປັນວັນປູກຕົ້ນໄມ້ແຫ່ງຊາດ.
(ຂ່າວ-ພາບ: ແສງຈັນ)
