ອົງການກວດສອບແຫ່ງລັດໄດ້ຈັດກອງປະຊຸມວຽກງານກວດສອບແຫ່ງລັດຂຶ້ນໃນວັນ 1 ມິຖຸນາ ນີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ປະທານອົງການກວດສອບແຫ່ງລັດ, ມີບັນດາຮອງປະທານ ອົງການກວດສອບແຫ່ງລັດ, ຄະນະນໍາ ແລະ ພະນັກງານອົງການກວດສອບປະຈໍາພາກ, ບັນດາກົມ ແລະ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ເຂົ້າຮ່ວມ.
ກອງປະຊຸມຄັ້ງນີ້ ຈະໄດ້ປຶກສາຫາລື, ຄົົ້ນຄວ້າ ແລະ ເປັນເອກະພາບກັນ ຕໍ່ບັນຫາທີ່ສໍາຄັນ ແລະ ເຄັ່ງຮ້ອນ ໃນການຈັດຕັ້ງຜັນຂະຫຍາຍຕາມມະຕິກອງປະຊຸມສະພາແຫ່ງຊາດ ເລກທີ 076/ສພຊ, ຕິດພັນກັບບັນດາວຽກຈຸດສຸມຂອງອົງການກວດສອບແຫ່ງລັດ ໃນນັ້ນກອງປະຊຸມຈະໄດ້ເຜີຍແຜ່, ສ້າງຄວາມຮັບ ຮູ້, ຄວາມເຂົ້າໃຈ ທີ່ເປັນເອກະພາບ ຕໍ່ກົດໝາຍວ່າດ້ວຍການກວດສອບແຫ່ງລັດ ສະບັບປັບປຸງ 2022,ຖອດຖອນບົດຮຽນ ກ່ຽວກັບວຽກງານກວດສອບແຫ່ງລັດ ໃນປີຜ່ານມາ, ເພື່ອສົ່ງເສີມດ້ານດີ ແລະ ແກ້ໄຂ, ປັບປຸງດ້ານອ່ອນ ແລະ ຂໍ້ຄົງຄ້າງ, ສ້າງຄວາມຮັບຮູ້, ຄວາມເຂົ້າໃຈ ທີ່ເປັນເອກະພາບກັນ ຕໍ່ແນວທາງ, ວິທີທາງໃນການດຳເນີນວຽກງານກວດສອບແຫ່ງລັດ ໃນອະນາຄົດໃຫ້ມີປະສິດທິພາບ, ປະສິດທິຜົນ ກວ່າເກົ່າ.
ທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດໄດ້ລາຍງານການເຄື່ອນໄຫວວຽກງານກວດສອບແຫ່ງລັດ ປະຈຳປີ 2022 ແລະ ທິດທາງແຜນການເຄື່ອນໄຫວປີ 2023 ຂອງອົງການກວດສອບແຫ່ງລັດ ໂດຍໄດ້ຍົກໃຫ້ເຫັນວ່າ: ໃນໄລຍະຜ່ານມາອົງການກວດສອບແຫ່ງລັດ ແລະ ອົງການກວດສອບປະຈໍາພາກ ໄດ້ເອົາໃຈໃສ່ປະຕິບັດວຽກງານວິຊາສະເພາະກວດສອບ ຕາມພາລະບົດບາດ, ສິດ ແລະ ໜ້າທີ່ຂອງຕົນ ທີ່ໄດ້ກໍານົດໄວ້ໃນກົດໝາຍວ່າດ້ວຍການກວດສອບແຫ່ງລັດ ແລະ ມະຕິກອງປະຊຸມສະພາແຫ່ງຊາດ ຢ່າງເຂັ້ມງວດ ແລະ ໄດ້ຮັບຜົນສໍາເລັດ ເປັນຢ່າງດີຄື: ໃນປີ 2022 ໂດຍພື້ນຖານແລ້ວ ໄດ້ດໍາເນີນການກວດສອບເອກະສານລາຍງານການເງິນ, ຄວາມສອດຄ່ອງທາງດ້ານກົດໝາຍ ແລະ ຜົນການຈັດຕັ້ງປະຕິບັດແຕ່ລະເປົ້າໝາຍສໍາເລັດຜົນຕາມແຜນການທີ່ກໍານົດໄວ້, ແຜນການ ຈໍານວນ 108 ເປົ້າໝາຍ, ປະຕິບັດໄດ້ ຈໍານວນ 101 ເປົ້າໝາຍ ໃນນັ້ນ: ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດຈໍານວນ 33 ເປົ້າໝາຍ, ໂຄງການລົງທຶນຂອງລັດ 23 ເປົ້າໝາຍ, ໂຄງການເງິນກູ້ຢືມ ແລະ ຊ່ວຍເຫຼືອ 19 ເປົ້າໝາຍ, ວິສາຫະກິດລັດ 20 ເປົ້າໝາຍ ແລະ ທະນາຄານທຸລະກິດລັດລົງທຶນ 6 ເປົ້າໝາຍ, ໄດ້ສໍາເລັດການສ້າງບົດສະຫຼຸບ ແລະ ລາຍງານການເຄື່ອນໄຫວວຽກງານປະຈໍາປີ ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ, ທະນາຄານແຫ່ງ ສປປ ລາວ, ທະນາຄານທຸລະກິດ, ບໍລິສັດລັດລົງທຶນ ແລະ ຜົນການກວດສອບໂຄງການລົງທຶນຂອງລັດ ຕໍ່ປະທານປະເທດ, ນາຍົກລັດຖະມົນຕີ, ຄະນະປະຈໍາສະພາແຫ່ງຊາດ, ກອງປະຊຸມສະພາແຫ່ງຊາດ, ຄະນະປະຈໍາສະພາປະຊາຊົນຂັ້ນແຂວງ ແລະ ກອງປະຊຸມສະພາປະຊາຊົນຂັ້ນແຂວງ. ນອກນັ້ນ, ຍັງໄດ້ສົ່ງບົດສະຫຼຸບຜົນການກວດສອບ ໃຫ້ອົງການຄຸ້ມຄອງເປົ້າໝາຍຖືກກວດສອບ ແລະ ເປົ້າໝາຍຖືກກວດສອບ ທັນຕາມກໍານົດເວລາ, ຜົນການກວດສອບ ໄດ້ປະກອບສ່ວນເຮັດໃຫ້ຫົວໜ່ວຍງົບປະມານ, ຫົວໜ່ວຍທຸລະກິດລັດລົງທຶນ ເຄື່ອນໄຫວຖືກຕ້ອງຕາມກົດໝາຍ, ສະກັດກັ້ນປະກົດການຫຍໍ້ທໍ້ທາງດ້ານການເງິນ, ງົບປະມານແຫ່ງລັດ, ປົກປ້ອງຜົນປະໂຫຍດ ຂອງລັດລວມໝູ່, ປະຊາຊົນ ເຮັດໃຫ້ການຄຸ້ມຄອງ ລັດ, ຄຸ້ມຄອງເສດຖະກິດ ມີຄວາມເຂັ້ມແຂງ, ໂປ່ງໃສ, ສົ່ງເສີມການລົງທຶນພາຍໃນ ແລະ ຕ່າງປະເທດ, ຊຸກຍູ້ການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວ
ສຳລັບໃນປີ 2023 ອົງການກວດສອບແຫ່ງລັດ ຈະໄດ້ປະຕິບັດ ຕາມພາລະບົດບາດ, ສິດ ແລະ ໜ້າທີ່ຂອງຕົນ ດໍາເນີນການກວດສອບ ຈໍານວນ 103 ເປົ້າໝາຍ, ໃນປີ 2023 ອົງການກວດສອບແຫ່ງລັດ ຈະໄດ້ປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນ ດໍາເນີນການກວດສອບ ຈໍານວນ 103 ເປົ້າ ໝາຍ ໃນນັ້ນ: 1. ກວດສອບ ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດ 36 ເປົ້າໝາຍ, (ຂັ້ນສູນກາງ 16 ເປົ້າໝາຍ ແລະ ຂັ້ນທ້ອງຖິ່ນ 20 ເປົ້າໝາຍ), 2. ກວດສອບໂຄງການລົງທຶນຂອງລັດ 20 ເປົ້າໝາຍ (ຂັ້ນສູນກາງ 7 ເປົ້າໝາຍ ແລະ ຂັ້ນທ້ອງຖິ່ນ 13 ເປົ້າໝາຍ, 3. ກວດສອບໂຄງການເງິນກູ້ຢືມ ແລະ ຊ່ວຍເຫຼືອ 22 ເປົ້າໝາຍ, 4. ທະນາຄານລັດ ແລະ ທະນາຄານທີ່ລັດຮ່ວມທຶນ 7 ເປົ້າໝາຍ ແລະ 5. ກວດສອບວິສາຫະກິດລັດລົງທຶນ 18 ເປົ້າໝາຍ (ຂັ້ນສູນກາງ 11 ເປົ້າໝາຍ ແລະ ຂັ້ນທ້ອງຖິ່ນ 7 ເປົ້າໝາຍ.
(ຂ່າວ-ພາບ: ສຳນານ).
