ໃນວັນທີ 1 ມິຖຸນາ ນີ້, ເມືອງໄຊຍະບູລີ ແຂວງໄຊຍະບູລີ ໄດ້ຈັດພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ 1 ມິຖຸນາ ຄົບຮອບ 43 ປີ (1 ມິຖຸນາ 1980 ຫາ 1 ມິຖຸນາ 2023) ຢູ່ສວນສາທາລະນະມິດຕະພາບລາວ-ຍີ່ປຸ່ນ ບ້ານທ່ານາ. ໂດຍການໃຫ້ກຽດເຂົ້າຮ່ວມຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີທ່ານ ບຸນແທນ ທີແກ້ວ ເຈົ້າເມືອງໄຊຍະບູລີ, ມີການນຳຂອງແຂວງ, ການນຳຂອງເມືອງ, ອົງການປົກຄອງບ້ານ ແລະ ນ້ອງນັກຮຽນເຂົ້າຮ່ວມ.
ໃນພິທີ, ທ່ານ ບຸນແທນ ທີແກ້ວ ໄດ້ກ່າວບາງຕອນ ວ່າ: ເພື່ອປະຕິບັດຕາມແຜນຍຸດທະສາດແຫ່ງຊາດ ຕໍ່ການປົກປັກຮັກສາສິ່ງແວດລ້ອມ ແລະ ຍຸດທະສາດວຽກງານປ່າໄມ້ແຕ່ນີ້ຫາປີ 2025 ຕາມ 4 ເປົ້າໝາຍ, 8 ແຜນງານ, 14 ມາດຕະການທີ່ກະຊວງກະສິກຳ ແລະ ປ່າໄມ້ ໄດ້ວາງອອກ, ເວົ້າສະເພາະແມ່ນການຈັດຕັ້ງປະຕິບັດແຜນຍຸດທະສາດຂອງແຂວງໄດ້ວາງໄວ້ ແນໃສ່ເຮັດໃຫ້ມີຊັບພະຍາກອນທຳມະຊາດ, ປ່າໄມ້, ຊີວະນາໆພັນ, ສັດນ້ຳ-ສັດປ່າຢ່າງອຸດົມສົມບູນ, ມີການຄຸ້ມຄອງ ນຳໃຊ້ແບບຍາວນານ ໂດຍບໍ່ມີວັນບົກແຫ້ງ ທັງເປັນການສ້າງຂະບວນການປູກຈິດສຳນຶກ ໃຫ້ທົ່ວປວງຊົນມີນ້ຳໃຈຮັກຊາດ, ຮັກຫອມຊັບພະຍາກອນ ອັນເປັນມໍລະດົກຂອງຊາດ ໃຫ້ນັບມື້ນັບອຸດົມສົມບູນຂຶ້ນຢ່າງບໍ່ຢຸດຢັ້ງ, ໃນໄລຍະຜ່ານມາການປະຕິບັດແຜນການປູກໄມ້ ແລະ ຟື້ນຟູປ່າ ໃນຂອບເຂດທົ່ວແຂວງເຫັນໄດ້ວ່າ: ຢູ່ບັນດາເມືອງໄດ້ມີການນໍາພາ-ຊີ້ນໍາຂອງຄະນະພັກ ແລະ ອົງການປົກຄອງທຸກຂັ້ນເອົາໃຈໃສ່ ບວກກັບສະພາບແວດລ້ອມດິນຟ້າອາກາດ ຟ້າຝົນອໍານວຍຄວາມສະດວກໃຫ້ແກ່ການປູກໄມ້ ໂດຍເລີ່ມປະຕິບັດແຕ່ຫົວປີ, ເຖິງແມ່ນວ່າຈະມີຄວາມຫຍຸ້ງຍາກກັບສະພາບການແຜ່ລະບາດຂອງພະຍາດໂຄວິດ-19 ກໍຕາມ, ອົງການປົກຄອງພັກ-ລັດ ທຸກຂັ້ນ, ທຸກພາກສ່ວນ, ຜູ້ປະກອບການຕະຫຼອດຮອດພໍ່ແມ່ປະຊາຊົນທຸກຊັ້ນຄົນໃນທົ່ວແຂວງ ກໍໄດ້ເອົາໃຈໃສ່ ໃນວຽກງານດັ່ງກ່າວຕາມແຜນໂຕເລກແບ່ງປັນປູກໄມ້ ແລະ ຟື້ນຟູປ່າຂອງກົມປ່າໄມ້, ແຂວງໄຊຍະບູລີ ໂດຍໄດ້ຮັບມອບໝາຍໂຕເລກແບ່ງປັນແຜນການ ໃນການຈັດຕັ້ງປະຕິບັດວຽກງານປູກໄມ້ ແລະ ຟື້ນຟູປ່າໄມ້ ປະຈໍາປີ 2023 ຊຶ່ງຜ່ານການຈັດຕັ້ງປະຕິບັດວຽກງານດັ່ງກ່າວ ສາມາດປະຕິບັດໄດ້: 1. ວຽກເກັບແກ່ນໄມ້: ເກັບແກ່ນໄດ້ 2.503 ກິໂລ (ລັດ 1.141 ກິໂລ, ປະຊາຊົນ 330 ກິໂລ ແລະ ບໍລິສັດ 1.032 ກິໂລ); 2. ວຽກສວນກ້າເບັ້ຍໄມ້: ມີສວນກ້າເບັ້ຍໄມ້ທັງໝົດ 55 ແຫ່ງ, ມີເນື້ອທີ່ 12,31 ເຮັກຕາຄື: ຂອງລັດ 11 ແຫ່ງ, ເນື້ອທີ່ 0,93 ເຮັກຕາ, ລວມໝູ່ (ປະຊາຊົນ) 36 ແຫ່ງ, ເນື້ອທີ່ 4,28 ເຮັກຕາ ແລະ ບໍລິສັດ 8 ແຫ່ງ, ເນື້ອທີ່ 5,10 ເຮັກຕາ; 3. ຜະລິດເບ້ຍໄມ້ໄດ້ທັງໝົດ 510.145 ເບ້ຍ, ທົ່ວແຂວງມາຮອດປັດຈຸບັນນີ້ ແມ່ນສາມາດສໍາຫຼວດເນື້ອທີ່ ທີ່ຈະປູກຕົ້ນໄມ້ໃນປີນີ້ ໄດ້ທັງໝົດ 318,90 ເຮັກຕາ (ພາກລັດ-ເອກະຊົນ ແລະ ປະຊາຊົນ). ສະເພາະໃນພິທີວັນປູກຕົ້ນໄມ້ແຫ່ງຊາດ ໃນວັນທີ 1 ມິຖຸ ນາ 2023 ທົ່ວແຂວງ ມີເນື້ອທີ່ 91,64 ເຮັກຕາ, ຈໍານວນເບ້ຍໄມ້ທີ່ຈະປູກ 71.725 ເບ້ຍ ແລະ ເບັ້ຍໄມ້ທີ່ຈະນໍາມາປູກມີ: ໄມ້ອຸດສາຫະກໍາ, ໄມ້ປະດັບ ແລະ ໄມ້ພື້ນເມືອງ.
ສໍາລັບເມືອງໄຊຍະບູລີ ຂອງພວກເຮົາ, ເພື່ອໃຫ້ບັນລຸຄາດໝາຍ ຕ້ອງສູ້ຊົນເຮັດໃຫ້ເນື້ອທີ່ຂອງປ່າໄມ້ປົກຫຸ້ມກວມເອົາ 73% ຂອງເນື້ອທີ່ປ່າໄມ້ທັງໝົດ ໃນປີ 2023 ນີ້. ສະນັ້ນ, ແຜນປະຈໍາປີ 2023 ນີ້ ທາງເມືອງໄຊຍະບູລີ ຈະໄດ້ອອກແຮງສູ້ຊົນປູກປ່າ ແລະ ຟື້ນຟູປ່າຕາມແຜນມອບໝາຍຂອງພະແນກກະສິກໍາ ແລະ ປ່າໄມ້ແຂວງໄຊຍະບູລີ ໃຫ້ໄດ້ 390 ເຮັກຕາ ແລະ ຟື້ນຟູປ່າໄມ້ໃຫ້ໄດ້ 3.000 ເຮັກຕາ (ປ່າປ້ອງກັນ 1.000 ເຮັກຕາ ແລະ ປ່າຜະລິດ 2.000 ເຮັກຕາ) ເພື່ອເຮັດໃຫ້ວຽກງານປູກໄມ້, ຟື້ນຟູປ່າ ປະຈໍາປີ 2023 ນີ້ໃຫ້ໄດ້ຮັບຜົນດີນັ້ນ ຄະນະຮັບຜິດຊອບ, ພະແນກການທີ່ກ່ຽວຂ້ອງ, ສຳນັກງານອົງການ, ກົມກອງ, ຫ້ອງການ, ລັດວິສາຫະກິດ, ໂຮງໝໍ, ໂຮງງານປຸງແຕ່ງໄມ້, ບໍລິສັດ ຕະຫຼອດຮອດອົງການປົກຄອງບ້ານ, ຫົວໜ່ວຍຄອບຄົວ ຕ້ອງໄດ້ເອົາໃຈໃສ່ຊຸກຍູ້ສົ່ງເສີມການປູກໄມ້ ໃຫ້ເປັນຂະບວນກວ້າງຂວາງ ປູກແລ້ວຕ້ອງໄດ້ເອົາໃຈໃສ່ບົວລະບັດຮັກສາໃຫ້ດີ, ຫຼຸດຜ່ອນການນຳໃຊ້ຊັບພະຍາກອນທຳມະຊາດແບບຟຸ່ມເຟືອຍ ກໍຄືການກິນຢູ່ບໍ່ຟຸ່ມເຟືອຍ, ການຖິ້ມຂີ້ເຫຍື້ອຊະຊາຍ ຈົ່ງຊ່ວຍກັນປູກຕົ້ນໄມ້ຟື້ນຟູປ່າທຳມະຊາດ ທັງໝົດນັ້ນເພື່ອປົກປັກຮັກສາສິ່ງແວດລ້ອມເຮັດໃຫ້ຊັບພະຍາກອນທຳມະຊາດ ນັບມື້ນັບອຸດົມສົມບູນ ແລະ ຍືນຍົງຕະຫຼອດໄປ, ຈາກນັ້ນໃນພິທີຄະນະປະທານ ແລະ ຜູ້ເຂົ້າຮ່ວມກໍໄດ້ເຂົ້າຮ່ວມປູກຕົ້ນໄມ້ຕາມເສັ້ນທາງຫຼວງແຫ່ງຊາດຕື່ມອີກ.
ຂ່າວ-ພາບ: ສົມພົງ ສີສະຫັວດ
