ພິທີສະເຫຼີມສະຫຼອງຜົນສຳເລັດ ແລະ ເປີດການຜະລິດ ໂບຣມິນ 10.000 ໂຕນຕໍ່ປີ ຂອງບໍລິສັດ ວັດສະດຸ ໃໝ່ອາຊີ ຈຳກັດ ໄດ້ຈັດຂຶ້ນໃນວັນທີ 31 ພຶດສະພາ ຜ່ານມາ ທີ່ບ້ານດົງໃຕ້ ເມືອງທ່າແຂກ ແຂວງຄຳມ່ວນ, ເປັນກຽດເຂົ້າຮ່ວມມີ ທ່ານ ຄໍາແພງ ໄຊສົມແພງ ລັດຖະມົນຕີປະຈຳສຳນັກງານນາຍົກລັດຖະມົນຕີ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ຖົງ ຢົງເຫິງ ຮອງປະທານ ບໍລິສັດ ອາຊີ-ໂປຕາສ ທັງເປັນຜູ້ອຳນວຍການ ບໍລິສັດ ຊີໂນ-ອາກຣີ ໂປຕາສ ຈຳກັດ, ມີບັນດາການນຳຂັ້ນສູນກາງ, ການນຳຂັ້ນແຂວງ, ການນໍາ ບໍລິສັດ ຊີໂນ-ອາກຣີ ໂປຕາສ ແລະ ແຂກຖືກເຊີນເຂົ້າຮ່ວມ.
ທ່ານ ຖົງ ຢົງເຫິງ ໄດ້ກ່າວຕໍ່ພິທີວ່າ: ຂ້າພະເຈົ້າຕາງໜ້າໃຫ້ແກ່ ບໍລິສັດ ອາຊີ-ໂປຕາສ ສະແດງ ຄວາມຂອບໃຈມາຍັງການນຳທຸກພາກສ່ວນທີ່ໄດ້ໃຫ້ການສະໜັບສະໜູນຊ່ວຍເຫຼືອໃຫ້ແກ່ບໍລິສັດດ້ວຍດີຕະຫຼອດມາ. ເມື່ອບໍ່ດົນມານີ້ ລັດຖະບານ ສປປ ລາວ ແລະ ບໍລິສັດ ກໍໄດ້ຮ່ວມເຊັນ MOU ເພື່ອສຶກສາຄວາມເປັນໄປໄດ້ ໃນການພັດທະນາໂຄງການສ້າງເຂດນິຄົມອຸດສາຫະກຳໝູນວຽນອັດສະລິຍະ ອາຊີ-ໂປຕາສ ຢູ່ທີ່ເຂດບ້ານດົງໃຕ້ ເມືອງທ່າແຂກ ແລະ ເຂດບ້ານດົງບູນ, ບ້ານນາຄຳ ເມືອງໜອງບົກ ແຂວງຄຳມ່ວນ ຊຶ່ງເປັນການເລີ່ມຈັດຕັ້ງປະຕິ ບັດໂຄງການພັດທະນາ ທີ່ປະກອບມີ ເຂດອຸດສາຫະກຳຝຸ່ນໂປຕາສ, ເຂດອຸດສາຫະກຳອະໂປຕາສ ແລະ ຕົວເມືອງອັດສະຣິຍະ ຊຶ່ງພາຍຫຼັງສ້າງສຳເລັດຄາດວ່າຈະໄດ້ມອບພັນທະໃຫ້ແກ່ງົບປະມານຂອງລັດຖະບານປະມານ 320 ລ້ານໂດລາຕໍ່ປີ, ຂັບເຄື່ອນການຈ້າງງານປະມານ 30.000 ຫາ 50.000 ຄົນ ຊຶ່ງມື້ນີ້ ແມ່ນພິທີເປີດທໍາການຜະລິດ ໃນໂຄງການໂບຣມິນ 10.000 ໂຕນຕໍ່ປີ ຊຶ່ງແມ່ນໂຄງການອະໂປຣຕາສ ແຫ່ງທໍາອິດທີ່ປະຕິບັດເປັນຈິງພາຍ ຫຼັງທີ່ໄດ້ເຊັນ MOU ສະແດງເຖິງທັດສະນະຂອງການເຮັດວຽກ ແລະ ຄວາມສາມາດປະຕິບັດຄຳໝັ້ນສັນຍາ ຕໍ່ລັດຖະບານ ໄປຄຽງຄູ່ກັບການເຕີບໃຫຍ່ຂອງໂຄງການເກືອໂປຕາສ ທີ່ເປັນທຸລະກິດຫຼັກຂອງບໍລິສັດ. ຜົນສຳເລັດຂອງ ໂຄງການຜະລິດໂບຣມິນ ໃນມື້ນີ້ ແມ່ນເປັນພຽງສ່ວນໜຶ່ງຂອງການຈັດສັນໃນການຫັນເປັນຫຼາກຫຼາຍກິດຈະກຳຂອງ ບໍລິສັດ ອາຊີ-ໂປຕາສ ເທົ່ານັ້ນ ໃນອະນາຄົດບໍລິສັດແມ່ນຈະສືບຕໍ່ນຳໃຊ້ແນວຄວາມຄິດແບບ ຕ່ອງໂສ້ຂອງການ ຜະລິດອຸດສາຫະກຳປະຕິບັດເປັນຈິງ, ວຽກງານການດຶງດູດລົງທຶນຂອງນິຄົມອຸດສາຫະກຳ, ຊຸກຍູ້ຢ່າງເລິກເຊິ່ງໃຫ້ແກ່ ບັນດາໂຄງການທີ່ມາລົງທຶນຕົວຈິງໃນເຂດນິຄົມອຸດສາຫະກຳ ເພື່ອເຮັດໃຫ້ການເຕົ້າໂຮມຕ່ອງໂສ້ການຜະລິດເຕີບໃຫຍ່ ເຂັ້ມແຂງ, ສ້າງເປັນໂຄງການຕົວແບບລະດັບປະເທດຂອງ ສປປ ລາວ.
ທ່ານ ວັນໄຊ ພອງສະຫວັນ ໄດ້ມີຄຳເຫັນກ່າວເປີດໂຄງການດັ່ງກ່າວວ່າ: ຂ້າພະເຈົ້າຕາງໜ້າໃຫ້ອົງການ ປົກຄອງແຂວງຄຳມ່ວນ ຂໍສະແດງຄວາມຊົມເຊີຍ ແລະ ຂອບໃຈ ທີ່ບໍລິສັດ ອາຊີ-ໂປຕາສ ກັບ ບໍລິສັດ ວັດສະດຸໃໝ່ອາຊີ ຈໍາກັດ ທີ່ໄດ້ໃຫ້ຄວາມສຳຄັນໃນການຜະລິດ ແລະ ພັດທະນາເກືອໂປຕາສ ແລະ ໂບຣມມິນ ຊຶ່ງໄດ້ນຳໃຊ້ເຕັກໂນໂລຊີທີ່ທັນສະໄໝ ເພື່ອດຳເນີນການຄົ້ນຄວ້າ, ພັດທະນາ ແລະ ຜະລິດໂບຣມິນ ທີ່ເປັນການນຳໃຊ້ຊັບພະຍາກອນຈາກສິ່ງເສດເຫຼືອໃນການຜະລິດເກືອໂປຕາສ ໃຫ້ເກີດປະໂຫຍດສູງສຸດ ກໍ່ໃຫ້ເກີດ ເປັນຜະລິດຕະພັນໃໝ່, ໃນໄລຍະຜ່ານມາ ບໍລິສັດ ຊີໂນ-ອາກຣີ ໂປຕາສ ແລະ ບໍລິສັດ ອາຊີ-ໂປຕາສ ກໍເປັນບໍລິສັດຕົວແບບໃນການພັດທະນາອຸດສາຫະກຳແຮ່ທາດ ຢູ່ແຂວງຄຳມ່ວນ, ເປັນບໍລິສັດທີ່ເອົາໃຈໃສ່ໃນການພັດ ທະນາກິດຈະການຂອງຕົນເອງ ຢ່າງບໍ່ຢຸດຢັ້ງ ແລະ ມີຫຼາຍກິດຈະການ, ເປັນບໍລິສັດໜຶ່ງທີ່ເອົາໃຈໃສ່ປະຕິບັດ ແລະ ເຄົາລົບລະບຽບກົດໝາຍຂອງ ສປປ ລາວ, ປະຕິບັດພັນທະຕາມສັນຍາຕໍ່ລັດຖະບານ, ເຄົາລົບນັບຖືຮີດຄອງປະ ເພນີຂອງທ້ອງຖິ່ນ ແລະ ໄດ້ປະກອບສ່ວນສໍາຄັນໃນການພັດທະນາບ້ານ, ເມືອງ ແລະ ແຂວງຄຳມ່ວນ, ການພັດທະນາ ແລະ ຂະຫຍາຍກິດຈະການຕ່າງໆຂອງບໍລິສັດ ໄດ້ສ້າງວຽກເຮັດງານທຳຈໍານວນຫຼວງຫຼາຍ ແລະ ຊ່ວຍປັບ ປຸງເງື່ອນໄຂຊີວິດການເປັນຢູ່ຂອງປະຊາຊົນຢູ່ໃນເຂດທີ່ຕັ້ງຂອງໂຄງການ ກໍຄືປະຊາຊົນຊາວແຂວງຄຳມ່ວນ. ພ້ອມກັນ ນັ້ນ, ການພັດທະນາເກືອໂປຕາສ ແລະ ອະໂປຕາສແບບປະສົມປະສານຂອງ ບໍລິສັດ ອາຊີ-ໂປຕາສ, ໂຄງການຜະ ລິດໂບຣມິນ ໄດ້ປະສົບຜົນສໍາເລັດໃນການຜະລິດ ກໍຈະເພີ່ມລາຍຮັບໃຫ້ແກ່ລັດຖະບານ ແລະ ແຂວງຄໍາມ່ວນ ປະກອບສ່ວນສໍາຄັນເຂົ້າໃນການສ້າງສາພັດທະນາປະເທດຊາດ ກໍຄືແຂວງຄຳມ່ວນພວກເຮົາ.
ພ້ອມນີ້ ທ່ານເຈົ້າແຂວງຍັງໄດ້ຮຽກຮ້ອງມາຍັງ ບໍລິສັດ ອາຊີ-ໂປຕາສ ແລະ ບໍລິສັດ ວັດສະດຸໃໝ່ອາຊີ ຈໍາກັດ ຈົ່ງໄດ້ສືບຕໍ່ເສີມຂະຫຍາຍມູນເຊື້ອທີ່ດີຂອງບໍລິສັດທີ່ໄດ້ປະຕິບັດຜ່ານມາ ແລະ ພ້ອມກັນນັ້ນກໍເພີ່ມ ທະວີການພົວ ພັນປະສານສົມທົບກັບຂະແໜງການຕ່າງໆກ່ຽວຂ້ອງ, ອົງການປົກຄອງທ້ອງຖິ່ນ ແລະ ຮຽກຮ້ອງມາຍັງບັນດາຂະ ແໜງການຕ່າງໆທີ່ກ່ຽວຂ້ອງຂັ້ນສູນກາງ, ຂັ້ນແຂວງ, ຂັ້ນເມືອງ, ບ້ານ ຕະຫຼອດຮອດພໍ່ແມ່ປະຊາຊົນ ຈົ່ງສືບຕໍ່ໃຫ້ ການຊ່ວຍເຫຼືອ, ອຳນວຍຄວາມສະດວກ ແລະ ໃຫ້ຄວາມຮ່ວມມື ເພື່ອເຮັດໃຫ້ການຜະລິດຂອງບໍລິສັດ ໄດ້ຮັບຜົນສຳ ເລັດຕາມແຜນການ ຫຼື ລື່ນແຜນການທີ່ວາງໄວ້.
ຂ່າວ-ພາບ: ກອງຄຳ
