ທະນາຄານແຫ່ງ ສປປ ລາວ (ທຫລ) ຈັດພິທີປະກາດສ້າງຕັ້ງກົມຄຸ້ມຄອງເງິນຕາຕ່າງປະເທດຂຶ້ນໃນວັນທີ 1 ມິຖຸນານີ້ ທີ່ ທຫລ, ໂດຍພາຫຍໃຕ້ການເປັນປະທານຂອງ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາ ຄານແຫ່ງ ສປປ ລາວ, ມີບັນດາຮອງຜູ້ວ່າການ ທຫລ, ຫົວໜ້າກົມ, ຮອງກົມກ່ຽວຂ້ອງເຂົ້າຮ່ວມ.
ທ່ານນາງ ວິນຄໍາ ລຸນທອນ ຮອງຫົວໜ້າຄະນະຮັບຜິດຊອບຄົ້ນຄວ້າສ້າງຕັ້ງກົມຄຸ້ມຄອງເງິນຕາຕ່າງປະ ເທດ ກ່າວວ່າ: ເພື່ອເປັນການຈັດຕັ້ງຜັນຂະຫຍາຍພາລະບົດບາດຂອງທະນາຄານແຫ່ງ ສປປ ລາວ ທີ່ເປັນເສນາທິການໃຫ້ແກ່ລັດຖະບານ ໃນການຄຸ້ມຄອງມະຫາພາກທາງດ້ານເງິນຕາ ແລະ ການຄຸ້ມຄອງເງິນຕາຕ່າງປະເທດໃນຂອບເຂດທົ່ວປະເທດ ຈຶ່ງມີຄວາມຈໍາເປັນຕ້ອງມີກົງຈັກຂັ້ນກົມຢູ່ທະນາຄານແຫ່ງ ສປປ ລາວ ເພື່ອເຮັດໜ້າທີ່ຄົ້ນຄວ້າ, ສ້າງ ແລະ ປັບປຸງນິຕິກຳກ່ຽວກັບການຄຸ້ມຄອງເງິນຕາຕ່າງປະເທດ, ພ້ອມທັງຈັດຕັ້ງປະຕິບັດວຽກງານການຄຸ້ມຄອງລາຍຮັບຈາກການຄ້າ, ການບໍລິການ, ການລົງທຶນ, ໜີ້ສິນ ແລະ ສິນເຊື່ອການຄ້າລະຫວ່າງປະເທດ, ພ້ອມທັງຕິດຕາມ, ກວດກາກະແສເງິນໄຫຼເຂົ້າ-ອອກ ສປປ ລາວ ໃຫ້ທັນສະພາບ, ຄົບຖ້ວນ, ທັນສະໄໝ ແລະ ສາມາດເຊື່ອມຈອດກັບພາກສ່ວນກ່ຽວຂ້ອງ ເຮັດໃຫ້ການຄຸ້ມຄອງເງິນຕາຕ່າງປະເທດເປັນລະບົບຄົບຊຸດ, ຊຸກຍູ້ສົ່ງເສີມການນໍາໃຊ້ເງິນກີບ-ຫຼຸດຜ່ອນການນຳໃຊ້ເງິນຕາຕ່າງປະເທດແບບຊະຊາຍໃນສັງຄົມ, ເປັນໃຈກາງປະສານສົມທົບກັບພາກສ່ວນທີ່ກ່ຽວຂ້ອງໃນການຈັດຕັ້ງປະຕິບັດ ແລະ ດຳເນີນມາດຕະການຕໍ່ຜູ້ລະເມີດກົດໝາຍ ແລະ ລະບຽບການ ພ້ອມທັງພົວພັນຮ່ວມມືກັບຕ່າງປະເທດກ່ຽວກັບວຽກງານຄຸ້ມຄອງເງິນຕາຕ່າງປະເທດ ແນໃສ່ເຮັດໃຫ້ກະແສເງິນຕາຕ່າງປະເທດ, ຜ່ານ ແລະ ລວມສູນຢູ່ໃນລະບົບທະນາຄານຫຼາຍຂຶ້ນ ເພື່ອສ້າງຄວາມເຂັ້ມແຂງໃນການຊຳລະເງິນກັບຕ່າງປະເທດ, ຄັງສຳຮອງເງິນຕາຕ່າງປະເທດ, ຮັກສາສະຖຽນລະພາບຂອງເງິນກີບຕໍ່ກັບເງິນຕາຕ່າງປະເທດ ແລະ ສົ່ງເສີມການຈໍລະຈອນສິນຄ້າ-ເງິນຕາພາຍໃນປະເທດເຮັດໃຫ້ເງິນຕາຂອງຊາດມີຄ່າທີ່ໝັ້ນທ່ຽງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.
ຂ່າວ-ພາບ: ບຸນອູ້ມ+ວັນເພັງ
